ROBO G

做開幾十年白家電的木村電器，研究部三位日日打卡等放工的大叔，突然收到老闆柯打要參與機械人展，臨時拉夫拼湊了一件失格品，死線臨近時還不受控飛墮下樓壯烈犧牲...幾日後，一位受家人冷待，長期腰痛兼終日無所事事的阿伯，看見了一則日薪三萬日圓兼要指定高度腰圍呎碼的招工廣告；就這樣，一個原以為只能為生命倒數的老人家與三個差不多走投無路的大叔，共同開展了一頁奇異的旅程...
未看"ROBO G"時，是被那個外型充滿舊式家電感的機械人吸引，戲中隨了滿溢的人情味外，還有其中一個拍攝場地是九洲的門司港；因為早前曾到此一遊，所以多少還有點親切感，而且機械人的名字更是以門司港的觀光小火車"潮風"號取名為"新潮風"。而影片後部替各人的醒悟安排了一個很好的結局，算是一套近來看過後心情很愉快的片子。

Iron Sky

納粹德軍於二戰末期敗走月球，舉家移民Dark side of the moon重整旗鼓，休養生息後有望重臨地球再次挑起戰爭，一雪戰敗之恥...在Iron Sky這個異想世界裡，失敗的不是納粹，而是編與導！有這樣一個上好題材卻可以糟蹋到如斯地步，除卻機械設定尚有可取之處外，故事認真不認真搞笑不搞笑，基本上是一齷爛到絕頂的屎片！其實以有限資金，特效慘不忍睹已是意料，但係納粹反攻地球如此勁爆的題材，真係稍為用吓腦寫都會震撼無比！是旦搵個軍事迷二戰粉絲都會有很好的見地...奈何第一步都行錯咗，導演要以喜劇手法去處理這個陰沈的題材，但係睇完除咗苦笑之外真係唔知邊到笑得出！一個有齊湯包配料麻油的即食麵也可以煮得一塌糊塗，真係連希特拉都要鬧爆完cut唔到有線之後就係鬧爆導演及制作Timo Vuorensola同Samuli Torssonen!

Dead Heads

很多喪屍片的第一場口總愛描述昏迷了的主角醒來後，要面對喪屍圍城的無助與孤單感，從而延伸出往後故事的壓迫力。DEAD HEADS亦是依樣畫了個葫蘆，不過分別是主角醒來後，自己也是一條喪屍... Mike與Brent分別是兩個受病毒感染後成為喪屍但又受到實驗藥物影响，保留著人性思維的不死身行屍。兩人好不容易接受了事實後，Mike靠著殘留的記憶和Brent的鼓勵(其實係無聊無嘢做)，出發找尋失散了的女朋友去，道上雖然有追殺他們的人類和神秘組織，但亦有幫助他們渡過重重險境的退伍老兵與路上收養忠心不二的大塊頭喪屍(寵物？)。歷盡險阻終於與女友近在咫尺...不過礙於當下身世，又如何得回美人歸...?? 無夢想嘅咸魚同有夢想嘅喪屍，邊個(活)得有義意啲...

Nude nuns with big guns

早前上影嘅機槍教父(Machine gun preacher)，以暴易暴的真人真事雖則大快人心但卻又令人萬般無奈；不如暫且抽離殘酷嘅現實，觀摩一吓雷霆修女(Nude nuns with big guns)支槍有幾大支...嘢。開宗明義全B片格局嘅Nude nuns with big guns，梗係唔少得大家都愛嘅暴力與色情。今次仲要响天父面前玩埋"女同"呢個大不違，一於置宗教於道外，道得規條於千里。於墨西哥的九反之地，教會上下都是一宗宗的買賣，上至樞機、神父下至修女長，包娼庇賭制毒販毒一條龍，勾結黑勢力有錢齊齊搵有飯齊齊食，更對叛徒毫不留情...莎拉修女等人就係被逼於教會工場制毒(唔知點解開工時唔比著衫，可能驚有人會落格？)嘅一班最低下層修女，不過响一次交收時被發現穿櫃桶底而遭賣落妓寨打毒針，不過又好彩得有心人所救，瞓醒仲話受天父指引要制裁罪惡，於是莎拉就手執兩支大口徑密林兼多款精良武器，身穿潔淨純白的修女袍，反轉教庭與惡勢力，為清洗世人身上的罪孽而沾滿一手血腥。

別問我是誰

即將上映嘅復仇者聯盟The Avengers，當然係本年度熱切期待的大片之一。不過自從戲內"要角"Hawkeye鷹眼俠造形曝光後(早於雷神奇俠裡)，我的嚕囌自此發過不停...Hawkeye是一個自細較喜歡的美國英雄，當然我並唔係睇開美國漫畫嘅人，只不過以前落街打機唔理三七廿一都會揀佢用，都係貪佢攻守兼備長短皆宜。漸漸用出個感情來...可惜令人期待嘅處女登場(已經無得擔正)嘅造形又係步向要有型而放棄原作特色的荷里活死症！一身黑色戰衣於實際環境下確然係好合理，亦比起其他著住馬騮衣嘅伙伴們落街買包煙方便。但係大家都明白呢啲係娛樂吓大家嘅娛樂大片，其實都唔介意响裝扮上花少少心思，起碼唔係家陣一個箭術運動員咁款。呢個通病其實响之前嘅社團式集體英雄總動員大片都犯上，好似我細路嗰時日日追嘅G.I.JOE咁，以前鐘意睇就係因為每個角式都有唔同嘅裝份同性格，就算有一百幾十個隊員都位位鮮明，無話混淆不清，出玩具都想買多幾個...不過真人版一出除咗個別有啲唔同色水外，不論忠奸又係搞到個個黑媽媽，開拖起嚟完全唔知邊個打邊個！之前嘅電影版X-MEN都係中晒呢樣嘢，如果兩班大俠有幸打起上嚟就真係好似香港警察大戰保安員咁嘅樣，分別係我哋啲制服比較醜樣。

武訓傳

這部號稱開國第一禁的武訓傳，以正常智商去觀賞判斷，著實是一部打動人心的劇情片，當年更被推舉為50年代的十大電影。可惜生不逢時的她，只風光了年多，便被無無謂謂地批判莫須有水蛇春長的罪名，一禁三十多年，到85年才得以平反，而到了2012年終於將武訓傳還原，卻曖昧地加上"供研究使用"...推出DVD重見天日。 武訓原名武七，生於清光緒年間的山東人；那時封建社會的私塾只為有錢人服務，窮家孩子因不能上學念書難有出頭天，只能一代一代的窮下去，被上層無止盡的欺壓剝削...武訓當然是劇中被壓榨的表表者，深明唯有知識改變命運，遂四處行乞討飯賣藝打散工，堅忍刻苦三十多年最終興辦起三所義學予窮苦孩子讀書，由最初受盡白眼冷嘲熱諷到後來被捧為山東聖人的武訓，自己仍是孓然一身至死方休。 共分上下集的武訓傳，開始時只以"粤語殘片"的心態去欣賞，不過隨後發覺編/導孫瑜的功力不是蓋的。以五十年代的標準而言，其拍攝手法剪接過鏡直把當年港式真正粤語長片比下去。老老實實三個多小時帶點說教呼天搶地式的黑白電影，絕無一刻令剛剛北上南下回來於深宵煲戲的我有半絲釣魚的衝動，看罷後竟還有點點動容。是時代令一部好片塵封，也是時代令一齣電影得以傳頌。

Tucker & Dale VS Evil

生得樣衰唔係罪，之不過遇上一班自以為是嘅大學生就會無辜受罪... 兩個不修篇幅但心地善良嘅中年漢Tucker & Dale帶整架生，去到偏遠荒郊一心為新置的湖邊小屋來個大翻身，路上卻撞正三男三女大學生驅車露營去。大學生們已先入為主認定兩人面目猙獰絕非善類嚇得無鞋挽屐走。偏偏兩條茂利晚上釣魚時陰差陽錯救起溺水大學生美媚後被人以為玩拐帶，同伙們便實行起冒失的拯救行動卻導致傷亡慘重。一邊廂以為撞著變態殺手會來個深山大屠殺，另一邊Tucker & Dale又以為遇上自殺集團衝著他們而來一鑊熟...誤會越鬧越大人越死越多，究竟最後點收科?

Hobo with a Shotgun

年邁的流浪漢Frank漫無目的來到一個城鎮，別無所求只望湊錢買一部二手剪草機打打散工自力救濟，但最後因不忍流氓所為而救了一位被欺凌的妓女，不幸地就此與全市最凶狠無道的黑幫為敵，然而這裡的警力又是一丘之貉...要殺出重圍便唯有先殺制人！放下手上有血有汗的$49.99，拿起二手散彈槍替天行道去！
早前仿照70年代《Grindhouse》拍攝的遊戲習作: "索女 喪屍 機關槍"及"玩命 飛車 殺人狂"裡的偽預告片"Machete"，因畫面太瘋狂有趣B味濃郁，遂被改拍成一套完整的影片，兼且得到激節讚賞與好評！而Hobo with a Shotgun這支同樣是得啖笑的"偽預告"，亦順理成章地被堒頓塔倫天奴老死，曾一起參與《Grindhouse》編劇及導演的Jason Eisener操刀搞他媽的一鑊痛快！各樣的處刑方式，鮮血噴洒度都沒有令人失望，而影片多處的致敬位更讓人看得心花怒放，若未看過"Machete"而能兩片同時觀賞，必定是一天中最痛快的娛樂!!

地球穿

The China Syndrome" (中國症候群)....是一齣舊片，亦是一個核工程術語；意謂若果美國發生核災難，核輻射就會如高熱火燄般貫穿地心直燒地球另一面嘅祖國。
影片如現實一樣都是以謊話蓋謊言，瞞騙加穏瞞。今日未達標聽日爆咗標，昨日受控制今日撳錯制。幾時搞得掂幾時有改善，日日新奇鑊鑊新鮮！死士不會無限供應，反應堆卻常時無限復活死唔斷氣勁屈機。人要虛耗大量無謂資源去滿足個人一己私慾，出得嚟行終要一次過還，沒有分期沒有資產重組，一舖要你破產清袋仲要禍延後代。針拮唔到肉始終唔會知有幾痛，又點會在意支針仲有破傷風...
The China Syndrome...79年上演，兩星期後發生了三哩島事件。

赤色富士山

二十年前，電影黑澤明之夢(Akira Kurosawa's Dreams)的其中一個故事：赤色富士山；人類濫用資源，終於發生事故，地動天搖，爆發的富士山像被染紅般...核電廠也被波及，釋出毒氣來，被有毒氣體逼迫到崖邊的日本民眾，都拋下一切跳崖自絕。原是核電廠技師的中年男子對身邊僅餘的男女及小孩說著道理來...遙指著漸漸飄近的毒霧，說有害氣體本是透明的，但因為要令人易於察覺，人類卻分別為它們加入不同顏色以辯認出毒氣(化學氣體)的種類；紅色的鈽239, 黃色的鍶90及紫色的銫137...但原來出事時依然是束手無策，亮麗的色彩只能令閣下知道自己是死於何種氣體如何死法而已...眼睜睜看著各種各樣不同顏色的氣體飄近，教授也身先士卒一躍而下，剩下的也只有無助地被濃霧吞噬。
惶恐沒有形但面上卻有懼色；地震海嘯核洩漏，看得見的浩劫人家都要咬緊牙關自食其力，看不見的恐慌令中港澳同胞大驚失色都只因為無鹽食。當局者清沒有被逼死，旁觀者迷總是被嚇死。

The Collector

朝早幫你裝門鎖，夜晚番嚟爆你格的倒霉賊仔不幸遇著一家人被變態殘殺，自己要全身而退已經唔容易，仲想救得一個得一個，係咪真係咁有辦法？
導演Marcus Dunstan是恐懼鬥室後半部系列的編劇，處女執導作：The Collector當然少不了變態殺手精心策劃的奪命機關。雖然其精密程度及驚喜感與SAW還有很大距離，但於一間大屋裡佈置著密密麻麻的機關陷阱，已叫主角步步唯營舉步為艱！加上噴血爆裂場面亦不瞬於前者，由主角入屋開始已沒有冷場，算是對得住看官們。至於點解會叫作Collector，戲裡只粗疏交待殺手的嗜好是喜歡收集"人"，究竟收集嚟搞乜同點用就真係問啲死唔去嘅生還者都未必知...兼且唔明為何每次都要用一個活人作"餌"去誘殺下一家人，睇怕要等續集至可以解釋一下。

波米叔叔的前世今生

勇套2010年康城金棕櫚大奬的泰國電影
人到臨死前才懂緬懷過去？什至有閒去緬懷自己的前世？？患上末期腎病的波米叔叔決定回鄉渡過餘生，在這裡休養期間卻重遇死去19年的妻子亡魂，之後連失蹤了多年的兒子也化身成猴靈出現，回來照顧看守他。波米叔叔更夢見自己可能是古代一位公主，因容貌有損一直耿耿於懷，更被湖中鯰魚誘使獻身...
整齣電影用了大量long take手法拍攝，即是我們常說的lock機。一個鏡頭下來數分鐘不移不動是閒事，加上陰沈的森林和寂寥的環境，令到全片的格局都是靜靜的流淌著，就如波米叔叔面對死亡的一種平靜心境，放下一切隨著命運帶領自己走完最後一步。
看完波米叔叔的前世今生，在網上搜尋一下原來有蠻多深層意義，包括導演對拍攝手法的譂釋，泰國與寮國的地區關係，及角色的多重象徵，當然少不了電影的藝術角度與劇本背後的隱喻...看得一頭霧水的我亦無謂扮有型搬字過紙寫影評，睇唔明就直認睇唔明。

Deadgirl

兩條高校生逃學到荒廢了的精神病院胡混，隊吓草飲吓酒四圍騰，突然又會被狗追，荒不擇路下又唔知點解去到一個地下密室，又硬係覺得密室後會有出路，所以就拗開咗度鐵門，呢個時候竟然發現凌亂不堪嘅密室內有張手術床，床上要仲鎖住個赤條條嘅美女，當兩條懵炳以為係死屍一條時，條女原來仲有呼吸...
講番呢兩條九十後，一個係色膽包天滿咀歪理嘅混世死飛仔，一個就係生性怕事但都仲有啲良知嘅宅男。佢哋唔係第一時間報警而係番屋企瞓一晚諗諗先。不過死飛仔當晚就心思思返轉頭試好嘢，仲發現佢係一條不死身女喪屍！
無論係現實世界定虛構情節，之前你有幾巴閉都好，比人鎖住動彈不得嘅時候就只能任人魚肉，可憐美女就係咁比死飛仔淪為洩慾工具，仲要得閒招呼吓啲老死，最後比佢發現大量製造呢類活動吹氣公仔嘅竅門，初號機茅頭仲直指宅男心儀嘅女神...

青春片手法恐怖片格局，由人比喪屍追變成鎖住比人隊。最好比啲地產商睇吓，唔知咩叫物極必反都要記住唔好落難，落水狗就一定打硬！

天凶之城 Skyline

生存題：打不死的外星人入侵，你會冒住被吸走的危險出外逃亡，還是留响室內等人拯救？
啊！原來出外與否都會被人吸走，留响邊度都唔會有人打救...
勁屈機無限復活外星人遇上竭斯底理地球人，少不了的緊張戰鬥場面真的很少，口水不用多的對話場景又真的很多...角色無特質無個性如途人甲乙丙！成班人無無謂謂走上走落慳皮製作又拍不出壓迫無助絕望感。設定左抄右抄天煞強戰世界殺人網絡末世凶煞大匯演，虛張阿凡達特技還不如十年前的ID4...還好值得慶幸的是沒有3D特技，慳番幾十皮可以買包爆谷睇戲！

人形蜈蚣 The Human Centipede

終於有時間睇咗網上鬧得沸沸揚揚的人形蜈蚣 (The Human Centipede)。其內容與評論於網上搜尋得多的是，在此無謂重複又重複咁大呼小叫什麼變態嘔心搵戲嚟做，皆因睇得呢啲戲唔夠變態嘔心就真係搵戲嚟做(已經比想像中輕手)。係度不如補完一下製作人形蜈蚣嘅幾點要注意嘅地方，好讓海特醫生來世唔洗比自己隻竉物玩死...
人形蜈蚣是將三個成人串聯起來，要切除膝頭韌帶使其不能直立只宜爬行，之後便是用手術將適格者們以口接肛門的方式連合起來，但製作前最好先留意以下幾點：
帶頭的最好是沒有正常心智的，如像片中的宅男為著那勞什子的幾両尊嚴而自尋短見便真的搞到蛇無頭不行。而且有正常思維的必起反抗心，看海特醫生最後被弄個雞手鴨腳可知一二；
又是帶頭的，一定要多吃牛黃解毒片，防止大便結秘兼無咁熱氣，對中間(即係佢後面嗰位)進食時都週到啲，一來保證有得供應，二來供應物未至於太結實太難下嚥；
中間及包尾的一定要確保呼吸順暢不能有鼻塞，咁人哋個口真係唔方便嘛...；
中間，由其是包尾的一定要多打營養液，啲好嘢都比前面隔晒渣，都係無謂等放飯；
由於包尾的確實無啖好食，為保存其體力，建議裝上滾輪輔助行走；
若前頭是雄性便可將尿管引導到後者口中，起碼後面有啖水濕吓口；
如果前面是雌性的便要留意經期，如果唔係真個一面血比佢搞到...解決辦法是折開跟尾者的口較一次過接合肛門及陰部，一來可減少前者月事時對其造成之不便，二來跟尾的隔中有紫河車補身，命都長啲；
仲有......講唔到嘢嘅女人依然會好煩，我諗醫生下次一定會割咗佢哋條聲帶...。

勞師動眾整條咁嘢搵自己笨，不如睇下呢套跟風玩嘢之作：性愛蜈蚣 (The Human Sexipede)，其69式連接更令人嘆為觀止啊！！(呢度唔上三級圖啦，自己search吓啦)

MACHETE

罪惡城導演羅拔洛迪格斯幾年前同昆頓塔侖天奴玩轉經典B片的"玩命 飛車 殺人狂" & "索女 喪屍 機關槍"，點會咁易夠喉，直情要將其執導的"索女"播放前的假預告片“MACHETE“ 弄假成真(其實都預咗)！不過就無預佢竟然搵埋荷里活一線巨星幹這敝渾水，實行巨星齊喪B；羅拔迪尼路，謝茜嘉艾巴玩得不亦樂乎，仲有爛片之王史提芬史葛就真係拍爛手掌！演過阿凡達女兵的米雪露芝姬絲更是好身手之餘又性感可人。
“MACHETE“ 彎刀／殺千刀；這齣電影由始至終都是一場效忠與背叛的遊戲，男主角兩次被出賣到走上復仇之路，而片子裡描述的墨西哥黑工的被利用與捨棄，既得利益者的虛偽與自利，上至政客下至黑工都無不為己損人...但由此亦反射了一個為墨西哥人偷渡的地下組織無畏精神，直情是黃雀行動的實體。透過一路的忠誠卻被陷害，由懷疑卻生憐愛，被靠害到復仇單挑到群毆，全片的分鏡剪接到所謂特效，就是為B而B...所以痛快倡狂暴力血腥一定唔會令大家失望，更何況唔多唔少洒番啲鹽花，令大家肉緊之餘又適時輕鬆一下...



淨係謝茜嘉艾巴係片中嗰僅僅幾秒噴血演出，作為男人點可以錯過！！

熱血係要嚟灑嘅！！

有名有利有錢無憂米，比我35歲都想退休享清福，何況高齡65!
有啲嘢睇唔過眼就要付諸行動，戲裡戲外作風如一！由慳水慳力藍幕後期，到無無謂謂搶錢3D，無特技打甩脾嘅動作戲真係式晒微...不過龍哥話只要仲有一口氣，一於起來打底脂粉味！今次一呼百應，係雲頓同碌葛唔生性，全城動莫問劇情只要衝衝衝，拍埋你班三角褲港男合埋眼都知邊個係龍邊個係蟲！係男人就趕快去朝拜一下荷里活呢趟夕陽工業啦喂！

鼠路

鼹鼠於地下深處迎著頭頂些微光線向上挖掘，到破土而出時，突如其來的刺眼陽光卻把牠弄瞎...

帶著赤裸的七歲兒子，打著雨傘騎著馬到處警惡懲奸的黑衣槍客得到打救回來的女人之啟示：
要成為最強槍手，先要打敗四大神槍...
神槍一：入定苦行憎，中槍不見血，眼盲心不盲！手下兩名隨從一個無腳一個無手，合而為一更勝常人！
神槍二：手巧心靈，粗中有細槍法如神但卻是個戀母裙腳仔，帶著一頭獅子的浪人；
神槍三：閒來吹奏笛子過著優悠生活的養兔人，不過係响寸草不生嘅沙漠中圈養...
神槍四：生無長物，連愛槍也換了捕蝶網的睿智老人，用網可反擊子彈，神乎奇技。

要勝過頭三位神槍不難，只要捂著良心使詐便成！不過到了最後一關，卻無助又無奈地甚麼也使不了，更令主角幾許瘋狂，生命跌宕...

智利藉墨西哥裔導演Alejandro Jodorowsky，自編自導自演的EI Topo(中譯：鼹鼠／遁地鼠), 於1970年上映，其難以捉摸推敲的情節，博大的宗教隱喻及騎呢設定神經刀剪接無厘頭出牌，被 John Lennon點名一讚，成了cult片殿堂裡一面重要旗幟。

夢裡共醉

一個有錢佬在頭等機倉睡著後造了一個又一個比Photoshop更多Layer的夢；因受著一個侷限空間內的腦電波相互交纏，與及第一眼於陌生環境下無意識的影像植入大腦下層所影嚮，夢裡的人就自然地出現了同倉的幾名乘客。夢中不斷搖晃及無重環境正是飛機遇上氣流的真實投射，到尾段仲要去咗雪山證明頭等冷氣真係幾凍。醒來後環伺週圍的同機客，因受過教育都向主角報以禮貌微笑；瞥見鄰座的日本人用剛看完AV的呆滯眼神凝視著他，被發現後又不好意思扮打電話，斷定自己剛剛的睡相可能好不雅...過境時戰戰競競好明顯係買咗包煙無報一支煙稅，不過對住有錢人關員一定放行梗係welcome home! 出閘後各同倉客又報以瞹眛一笑好明顯頭先瞓覺實係出咗洋相...好彩出閘後有阿爸接機快快離開此地。返到屋企覺得有嘢"銀"住褲袋，伸手一摷，e...幾時多咗個日式爆旋陀螺...心諗唔通係個日本痴漢靜靜塞比我?? 唔怪得個個乘客都偷偷笑咗...

ironman2

今日終於有時間睇ironman2, 好明顯呢集係專為睇開Marvel嘅fans而設，亦順理成章擺明車馬帶出Avengers呢個萬眾期待嘅不日上映重頭戲。略知皮毛的我都未至於R晒頭...今集擺到明出場嘅S.H.I.E.L.D.組織大佬Nick Fury作用舉足輕重，而黑寡婦Black Widow直情搶晒桂莉芙栢德露啲戲！不過最驚喜莫過於隱藏出場的美國隊長同埋變形俠醫，當然少不了字幕後的雷神！不過老實說整部電影要帶出咁多人物事，打鬥場面便得犧牲一下，臨尾仲有啲草草了事嘅感覺，仲有...ironman suit好似人人都識整識用咁，係咪兒嬉咗啲？