開平碉樓

由香港發車三個多鐘就到嘅開平確實係超短線遊好選擇。到開平必去嘅碉樓今次因為包咗架車仔，所以開放收錢同廢棄偏遠都有幸一看(當然為數千多棟散落全市又無可能睇得晒，盡人事睇吓較有代表性嗰啲咁啦！)。加上遊走一吓赤砍古城就三日兩夜非常充實，若加上梅家大院就更加要馬不能停碲早起晚歸！ 今次中秋撞正星期六日，諗住人山又人海，好彩的是大多數人都選擇回家過節，總算避過人民如潮湧的惡夢，而嚴格嚟講碉樓的旅遊開發未如想像般恐佈，除了"立園"與"馬降龍"外，基本上未見太多過份修飾...始終看歴史遺跡總要帶一點風霜一點經歷，至能感受箇中存在價值。 路上師傅最多提起的是以前建築用料的講究及嚴謹的施工模式/態度，與現今豈止相差以光年計！屹立過百載的碉樓就是要保障住戶的人命財產，就算完成了歷史任務後依然能抵擋住時間的沖刷，為後人訴說昔日血汗故事！當今強國獨步天下的豆腐渣工程，要說要追憶只有一段段不堪回首的喪事與癲喪事。

腥家喱拿

去旅行前都係勁勁多嘢做，做到網誌都少update兼言之無味，令本身微量的人流極速流失，家陣仲要帶病旅行認真無癮！明天出發的目的地是香格里拉雲南段，由麗江去梅里玩十日，全程租車超輕鬆，不過未知所經地方有沒有被地震所影嚮，加上已開發過度及濫收門券呢啲臨出發都講一次嘅大陸性氣候都會預咗打個折扣，只要唔好類似上一劑鳳凰之行咁驚喜不斷就當還得神落...

烏克麗麗

身痕難耐，卒之買咗個四絃琴回來。對著一堆似熟悉又陌生的chord,　用手指勉力地按著琴頸上細小的格子，一粒粒不大清脆的調子被彈奏出來，雖然不大順耳時有甩漏亦令初心者如我樂不可支。難怪這種叫作Ukulele的夏威夷小結他能令這麼多人著迷！簡單幾粒單音或兩三個和絃便能奏出跳脫的曲子，當然要複雜的樂曲彈起來亦絕不失禮！而因為其輕盈小巧所以可於任何地方也能即興彈奏，所以放一個响公司細細聲練習解吓悶也蠻不錯的說。

捨身成癮

用刀仔拮自己大脾嚟話你知把刀有幾咁鋒利，世上無幾。以身作則的典範，你咁都唔留神穏穏陣陣...點對得住苦心一片嘅火柴人。

豁出去

出嚟做事，無論屁眼比人隊，定係遭人抽後腿...都要心如止水，昂然踏著前路去...

鳳凰旅

24號趁聖誕假飛去湖南張家界，其實係志在樓下嘅鳳凰古鎮多啲。因為張家界被圈劃出不同地形景區設施，行得入去就逐樣同你計，真係少個崩都唔使旨意全身而退。倒不如坐幾粒鐘車南下吉首直插鳳凰古鎮hea兩日，伴著沱江舒舒服服嘆杯茶，閒閒適適食得招積。兼且咁啱又遇著寒流，希望都可以過番個白色聖誕，不過如果遇著大風雪起唔到機，唔知我哋扭吓計揼吓地，政府會唔會派番架包機飛過嚟接我哋...呢？

食玩

我唔知呢啲係咩嚟，亦唔記得細個食咗乜嘢會送啲咁嘢...總之就係收埋十幾廿年又比我掘番出嚟。以前有機會買零食，一定以有嘢送為首選，因為好辛苦先有一個幾毫洗吓，一定要物盡其用，一次過實現幾個願望。唔似得而家嗌聲"軒哥"就有人塞錢落你袋！所以以前嘅零食好流行送埋啲無聊得嚟你又會被佢吸引到嘅嘢，由其是來自寶島嘅"乖乖"就深明此道！所送贈嘅小玩意簡直就係瘋魔一眾小學生，因為佢捉摸到細路們總愛認叻鬥一番嘅變態心理，所以响設計玩具上都係一啲可以响小息時候讓各路英雄比試一吓嘅玩意，而為咗得到呢啲神器，無錢嘅就死慳死抵，有錢嘅就買多幾包請無錢嘅幫手食，望能盡收天下神兵為己用...當然大家又要為那快來快去嘅新款式奔波，窮苦學生只能玩玩上手啲過期玩意，有個銅臭嘅就即時留意最新電視廣告睇準時機入定貨返學校威番吓！那年縱使沒有軒哥慷概嘅一百幾十i-phone科，但係就有大家發自內心嘅笑呵呵。錢，唔一定要鬥多。

預訂

番開柜桶底，搵到一啲陳年舊物，原來驚見我呢條孽畜都觀摩過唔少見證怖道會...曾經。當年神推神擁跟啲朋友去襯吓熱鬧，救贖與否同有無得著大家睇吓我個款就知，難得嘅係仲有儲埋睇完嘅飛尾，唔通諗住第時升咗天都可以當入場券，唔使上到去先話打個白鴿轉...

貓拍點滴

每逢行經街舖遇見貓，都會膽粗粗進店厚著面皮硬著頭皮舉機影貓兼逗牠玩玩。遇著愛貓店主更會主動吩咐貓員工擺好pose任影，當然要於不碍做生意之大前題底下才能如此大模斯樣...若遇上黑口黑面店主便要快手快腳兼要賠個笑影幾張趕快離開，最怕自身所作所為不幸遷怒於無辜貓兒身上，要連累貓貓被迫收監就真係講句唔好意思！如果個個老闆都好似深水埗這間石油氣火水舖一樣就皆大歡喜；為其愛貓拍照無任歡迎，還張貼電郵地址於當眼處著閣下send番張玉照比佢...係囉，養貓係一件開心事，養嗰個開心，影嘅又開心，連隻貓自己都開心，咁世界咪少啲紛爭！

牛糞上

這三支不同時期但都係响日本揹番來的Bass, 它們不幸地落在一個不太懂彈奏但偏愛耍酷的茂利手上，下場就係...右邊的已廢掉，中間的廢了七成...左邊的每日把玩中，看來離死期不遠矣。

色影

Pentax Kx帶起的機身色彩革命順利完成，現在漸漸交捧給更誇張的Kr。但Kx臨行前餘威猶在，與日本女子美術大學玩設計比賽，優異作品仲會係銀座展出添！





好多貓呀！yeah!!

狗瞓

去旅行多數影貓，但今次桂林貓多是閃的閃避的避，相反懶洋洋享受著日光的多是大唐狗，就拍下牠們給愛狗的同事吧。(前兩張內子拍得不錯呀)

桂林 陽朔

極速一轉桂林陽朔，坐了膠管摩打竹伐遊漓江，遊走了興坪與大墟兩個古鎮，踩單車經過遇龍河月亮山，到了以紅葉著名但一片紅葉也沒有的古東，穿梭於倒模步行街，吃了兩次名大於實的米線...沒有探索七彩射燈岩洞，沒錢看印象-劉三姐，更不願附錢看被監生圍起來的景點，平常心走平常路，沒遺憾未有到過那裡那裡，只因到過的景點貨辦其實都不對...

桂林山水夾硬嚟

今個星期有一日補假，唔好嘥！夾番個六同日，星期五收工即飛桂林玩足三日三夜！落點是桂林，但目標是陽朔及沿途的古鎮。桂林被開發得體無完膚，甚至有道著名的景點已被重重圍擋，焗住大家要附費觀賞。小學時教科書上的象鼻山駱駝峰七彩射燈七星岩真係少個崩都唔使旨意瞄一眼！被市政府包銷的漓江遊更加食水深，更不用說張大導的印象﹣劉三姐歌舞秀...
不過志不在此亦無謂介意，但求比我舒舒服服行行企企吃吃喝喝，看別人不看賞他人不賞，唔好比人咿咿哦哦就已經當中咗奬！

乾物類

家中防潮柜無啦啦失靈，濕度計長期劍指臨界點，為保柜內神器能繼續保持乾爽正常運作免受霉濕感染，十萬火急下出城重賞徵召新柜一個頂替，以免血本無歸。老遠托咗番嚟同舊嘅換位一睇......原來係鬆咗插制！都怪一時情急曾sir講乜都唔記得；凡係電器有親頭暈身㷫梗要檢查電源是否正常就為之基本維修第一步！老貓故然燒了鬚，仲要多咗一個防潮柜响屋企獻世，唯有趁早入定啲海味乾貨，橫掂有個好位存放恒溫保鮮又乾爽！就唔使臨過年先同人迫年貨買貴餸啦！

雷聲大

同事們call咗老麥嘅新產品推廣New York Taxi載你去食包服務，以為有幾霸氣，原來只係一架Corolla改裝車，莫講話真正美帝福特通用雪佛蘭，就連本地原裝的士大皇冠亦將它比下去！司機唔知訂要我哋呆等幾個字不特止，所謂優惠都只不過係四個人共享一張買汽水送一個包coupon咁大把...勞師動眾搞宣傳就好心咪㩒住個荷包，請人食嘢同請人做嘢都一樣出手咁寒酸，個包有幾好食都真係無去幫襯嘅打算...

如風

第一次學人托架單車去旅行，跟隨友人走一轉廈門及福建土樓。原先是計畫到鼓浪嶼一踩的，不過到達碼頭才知整個島嶼都不准踩車，所以先踩半個廈門島後再轉戰南靖田螺坑土樓群一遊，兼住在土樓一晚四圍遊歷。雖然坐臥舖大巴依然痛苦，踩車上斜非常吃力，於馬路左穿右插偶有驚險，幸得隊友體諒扶持，老骨頭才能緊隨其後，風馳電掣地過了一個有趣不一樣的週末。

熱血係要嚟灑嘅！！

有名有利有錢無憂米，比我35歲都想退休享清福，何況高齡65!
有啲嘢睇唔過眼就要付諸行動，戲裡戲外作風如一！由慳水慳力藍幕後期，到無無謂謂搶錢3D，無特技打甩脾嘅動作戲真係式晒微...不過龍哥話只要仲有一口氣，一於起來打底脂粉味！今次一呼百應，係雲頓同碌葛唔生性，全城動莫問劇情只要衝衝衝，拍埋你班三角褲港男合埋眼都知邊個係龍邊個係蟲！係男人就趕快去朝拜一下荷里活呢趟夕陽工業啦喂！

止禁誠

鉅記週圍有得賣，白之戀人有貨派，林珍香又賣通街，Mos burger食唔晒，度小月仲好易買，無印優衣庫要開都開晒，就連米老鼠都喺本地過街......
其實呢度會比錢買書扮嘢嘅人好少㗎咋，大路書籍有三聯商務天地，另類啲嘅有披廚溫輸不死，小道嘅咪留番比樓上書店搵啖食囉，連報紙雜誌都有便利店同報販爭；你响香港插旗，咪盞嚟得最多嘅都係啲霸住個位打幾粒鐘PSP嘅毒男腐女。HMV大變細，Tower Record執晒粒，呢度邊有文化㗎！可唔可以唔好嚟呀誠品書店...等我去寶島夜晚都仲有啲嘢做吓oY!!

連椅

香港出名茶餐廳，茶餐廳出名不是菠蘿油奶茶炸雞脾紅荳冰豉油餐...而係卡位。每次待應推介的不是當店熱賣，而係只要一聲“有卡位“，人便似有磁石般被吸進店內，所以話一張好坐嘅卡位係幾咁重要...不過成功誘騙閣下內進後，你都會因為"繁忙時間，請坐一邊"，由面對變並肩，而徹底失去坐卡位的義意...
某舊式茶餐廳僅存的幾張心相印卡座，全實木入筍超紮實手功貨，後面位人兄點屹都影响唔到閣下，好想要！