多一事不如旦牛治

自從深水埗滑滑腸粉檔被少年?淫神點過相後，搞到家陣風聲鶴唳排晒隊多得佢唔少。好彩自以為識食嘅佢無推介到同一條街嘅頂級旦牛治，如果唔係就搞到已經好多人嘅舖頭仔仲多條人龍就真係做到已經嘈嘈閉嘅水吧阿哥更唔老嚟！都係襯唔使點等位，得閒嚟多件啦喂~

樓上雅座

自北角祥利與中環蛇竇等較出名的舊式茶餐廳相繼結業後，佔有唐樓兩層的茶餐廳／冰室越是買少見少。這間屹立於砵蘭街的便更見珍貴...由其是樓上還養了貓呢...

神山

初三﹣沙巴
來到沙巴的第一天已是晚飯時間，會合了友人後便直奔向頂頂大名的佑記品嘗肉骨茶，不幸的是平日可能太過好生意，過年過節要休市個十日八日，直到登山潛水回來後也只得閉門羹吃...唯有過一街之隔的金記頂吓肚咁啦...
這裡的肉骨茶分三種：原味／當歸／胡椒...經實證後發覺差別不大


家嫂麵要晨早先有得食，無緣見嫂子一面


真係食到成身濕晒




之後心有不甘，便到有蓋大排檔吃燒海鮮，地方出奇地通風，仲幾好味喎~


就這樣過了一晚，就當作預留體力行山吧。

閒逛

每個月都要到訪一次以上的深水埗，必食劉森記！記住要去桂林街的舊檔，風味與人情味俱在！
吃完無敵蝦子麵就去抓貓貓！



牠是隔隣糖水舖的貓，很爛玩





福榮街玩具舖見親都總是在午睡的店員

牛下雞蛋仔

可以有遮天蔽日的屏風樓，可以有過萬尺的超級超級超市，可以有一千幾佰個倒模商場，可以有高聳入雲的國金天璽...卻容不下一個舊式屋村，容不下一檔熟食小販，容不下一客傳統炭燒雞蛋仔，容不下一段成長回憶...是香港地小還是心胸小，抑或我們的目光確實太短小。
專誠來一嚐雞蛋仔的人太多，而一樣懷舊的砂糖格仔餅卻不斷出爐，老闆娘唯有一味嗌格仔餅唔使等喎...咁囉！


炭爐火路猛，師傅手勢好時會出現糖芯雞蛋仔的奇景，非常好味！

向豬囉說再見

牛下興記茶餐廳的惹味豬排飽快將完成它的歷史任務，淹蓋於港式資本摧毀主義洪流中，得閒好去咬多兩啖啦~

大隱隱於市

每次喺彌敦道恆豐對面等車，都會企咗喺賓館林立嘅北京酒樓下面，各式賓館招牌隱含一條幽幽小樓梯帶嚟無限暇思，每每令人有試菜的衝動...

幾十年的舊樓，裝修的裝修，改建的改建，維修的維修，唯獨不變的就是北京酒樓



主打是老京菜片皮鴨，水準不俗，但少了在閣下面前即片的視覺享受



手撕雞很惹味，吃套餐記住加錢升格



賽螃蟹做得非常爽滑，比坊間食肆出色何止一班



小籠包有點令人失望，棄蒸籠改用碟上已經要扣分，加上皮確實太厚...



銅鎉豆腐亦是必叫佳作，別處很難吃得到




內裡的裝璜實實在在就是荷里活電影裡的China town酒樓格局



大哥送的銀河旋風也來摻一口

至暈飯局

呢間喺上環太平山道同四方街交界嘅廣記食店，表面上係一間涼茶舖，實則係一間車仔麵店；你以為佢賣麵咩，佢又似一間中藥店；當你認定佢係一間中藥店時，佢又似一個唐樓單位；你以為自己喺人哋屋企嗰時，原來你坐咗响地舖...奇哉！奇哉！

消脂豬油

酷熱天氣警告下的中午，到了深水埗的鐵皮檔長發麵家搵食，平時食開都係馳名魚旦牛腩，今次就試一下更出名的古法秘制豉油皇撈麵，17個大洋一執仔麵相對19蚊有餸麵已算很貴，但係好味又真係無乜計，濃香豉油皇配上必殺豬油，不消一分鐘已將其灌進胃中...真係咁好味？喂！你無睇清楚咩？係豬油喎，家陣追捧著健康廋身低脂排毒高纖少油清淡練精養生滋陰補腎嘅年代，除咗食神韜哥都無乜邊個敢大大聲話擺明要落豬油。而有豬油嘅撈麵，又點會吾香口先？而香口咗嘅豬油加上甜甜嘅豉油皇，又點會吾好食先？而喺個焗爐入面食到汗流浹背底褲都濕晒嘅我哋，區區嗰兩羹豬油，又肥得去邊先？

呵他踢

母親大人從北海道遊玩歸來，原機空運兩大箱新鮮帶子肉，隻隻拳頭咁大，肉質異常鮮味，入口甘甜仲隱約有陣北海道海水味。晚晚飯後都劏番幾隻做甜品，搞到出街食壽司都睇吾起人家嗰D帶子仔...
我地呢D見識少，咪就係咁易滿足囉！

日食

年中又有計劃去日本，我最愛吃的"光麵"......等我啊！

ps...諗下姐，吾係吾得呀？