Bee Toy Digital 8mm Movie

自己一向也很喜歡low-tech嘢，由其一條沒有對白只配上音樂的8米厘粗畫質影片，令人感覺很悠然舒泰，隨意馳騁於無邊的想像空間。可惜8米厘的底片由購買到沖洗都不是件易事，雖然網上總會找到人代辦，但只可偶一為之窮等人如我難作長期投資。不過早前到日本看見扮晒8米厘的低像素攝錄機終於到港，雖然之前也有類似可模仿拍攝8米厘的產品，但外型還是這趟來得強大很多，有空要出外走走試試！

http://www.fuuvi.com/

食玩

我唔知呢啲係咩嚟，亦唔記得細個食咗乜嘢會送啲咁嘢...總之就係收埋十幾廿年又比我掘番出嚟。以前有機會買零食，一定以有嘢送為首選，因為好辛苦先有一個幾毫洗吓，一定要物盡其用，一次過實現幾個願望。唔似得而家嗌聲"軒哥"就有人塞錢落你袋！所以以前嘅零食好流行送埋啲無聊得嚟你又會被佢吸引到嘅嘢，由其是來自寶島嘅"乖乖"就深明此道！所送贈嘅小玩意簡直就係瘋魔一眾小學生，因為佢捉摸到細路們總愛認叻鬥一番嘅變態心理，所以响設計玩具上都係一啲可以响小息時候讓各路英雄比試一吓嘅玩意，而為咗得到呢啲神器，無錢嘅就死慳死抵，有錢嘅就買多幾包請無錢嘅幫手食，望能盡收天下神兵為己用...當然大家又要為那快來快去嘅新款式奔波，窮苦學生只能玩玩上手啲過期玩意，有個銅臭嘅就即時留意最新電視廣告睇準時機入定貨返學校威番吓！那年縱使沒有軒哥慷概嘅一百幾十i-phone科，但係就有大家發自內心嘅笑呵呵。錢，唔一定要鬥多。

公仔紙

那年的公仔紙與豹虎(金絲貓)，就是今日的爆旋陀螺與四驅車。四者都在兩個不同的年代裡擔當著為小孩渲泄暴力的角式。其實在那年代反而未真正玩過公仔紙，用什麼什麼技巧去拍番對手也只是道聽途說，反而留意的是公仔紙上的超人怪獸圖案，但風頭總不及印刷精美每張五角的七彩螢光膠貼吸引，難得扭計有嘢買就一定不會先考慮粗糙的公仔紙。這張已分解開的公仔紙是於卡片遊戲機及超合金當道的80年代遺物，被士多老闆用作墊層架用...見我咁有誠意問價就唔使錢比咗我玩，可惜保存不當而帶點破爛，大力拍幾吓也怕支離破碎，只能閑時拿來緬懷一番也。

預訂

番開柜桶底，搵到一啲陳年舊物，原來驚見我呢條孽畜都觀摩過唔少見證怖道會...曾經。當年神推神擁跟啲朋友去襯吓熱鬧，救贖與否同有無得著大家睇吓我個款就知，難得嘅係仲有儲埋睇完嘅飛尾，唔通諗住第時升咗天都可以當入場券，唔使上到去先話打個白鴿轉...

牛糞上

這三支不同時期但都係响日本揹番來的Bass, 它們不幸地落在一個不太懂彈奏但偏愛耍酷的茂利手上，下場就係...右邊的已廢掉，中間的廢了七成...左邊的每日把玩中，看來離死期不遠矣。

星火

父親喜愛集郵，我們三兄弟就愛到處收集火柴盒，那年頭最廉宜的宣傳技倆，卻是我們兄弟間最大的期盼；幾條塞豆窿和父母逛街時總愛鑽進有火柴盒贈送的食肆或機構，伸手拿取只適合十八歲的贈品。到親戚朋友家作客時更不會放過搜索的機會，迫令屋主就地繳械。
這種嗜好隨年月漸長物質較豐裕時，不用打火機來淘汰，很自然地由每天拿著比畫鑑賞到長眠於模型盒裡，模型盒又長置天花的吊櫃內，它們也只有長埋於我們的記憶之中。
最近大哥將火柴盒出土拍照，小時候的片段又被它們擦亮。

妖怪集結號

Universal Monster系列"Red"終於上架；狼人、科學怪人1931、木乃伊、歌聲魅影到著！

ROCK ON!!! The Dragon

日本各不同風格單位集結，"The Dragon's Walk On"...將李小龍每齣電影內的音樂以多樣性曲風重現，不過可能龍爭虎鬥首音樂太深入民心，淨係佢都有幾個版本。不過連久違了的LUNA SEA 結他手SUGIZO都參與埋一份確係令成隻碟錦上添花！隨碟更附送死亡遊戲的長袖黑邊大碼黃色Tee, 最正係有埋渣巴個大腳印...
講咁耐,咁即係幾錢呀？
見本盤，多謝HK48蚊！

開棺大典

上星期在信和的見本盤店中左巨奬(對我而言)！竟然發現UNIVERSAL MONSTER 系列日本棺材DVD套裝，內有："黑湖妖"，"科學怪人與新娘"，"透明人魔"及"吸血彊屍德古拉斯"4套5/60's年代的經典科幻電影。這套裝應是有兩set共八隻的，各地亦是以棺材形式發售，不過日本版副棺就係做得靚D! 約15,000日圓只收HK$68仲吾速磅真係對吾住自己！最大驚喜的是2區日本碟竟有埋中文字幕！680都會即買何況68!!而內裡的"黑湖妖"更是我的至愛，想當年是荷里活第一部黑白立體電影，十分震撼！那年頭電視播放時要用土砲立體眼鏡(紅藍玻璃紙製那種)觀看，一家人關掉燈光輪流用眼鏡欣賞，若眼鏡未輪到自己而錯過一些攻擊鏡頭亦只有在旁咬牙切齒！
早兩年在Amzon.com訂購了"黑湖妖"的Collection套裝，包括續集的"黑湖妖復仇記"連郵費要HK$200多，現在居然以超低價入手四齣巨片，真係開心到震，希望可以有機會搜購埋另一set啦！
兩款DVD對比