鐵心

獨立品牌inspire貴膠系列早前推出的限定50隻銀面飛俠等身版本要索價$450一隻！真係啋佢都嫌錢腥。而新出的另一款"金霸龍"又無乜興趣，以為可以慳番多少之際，聞足成年樓梯響嘅Iron King 卻突然彈出！唯有食少兩餐乖乖比訂等貨到...其實都戒緊買玩具，不過呢D經典少有嘅角色，真係吾捨得甩。
Iron King


順便重溫一下之前推出過的部份角色！
電子分光人／鐵金剛／金霸龍

銀面飛俠：天藍等身版／銀色巨人版及兩個灰色等身版

三款(其實有四款)電光科學人：TV前期／原設定／透明鏡間

漫畫家内山まもる版超人

遺情

今晚改到九龍灣band房練習，見有時間梗係走去牛頭角下村食好野，一條友去"文記傳統車仔麵"都係一個吾錯既選擇。進食途中已覺門口有點擾攘，原來是一位婆婆坐在麵檔很久，忘記了家在那裡，要勞動警察叔叔幫手，正當阿Sir "R"晒頭之際，有位好心食客認得阿婆，還說出阿婆大概的居住位置，待食客哥哥攪掂碗麵就會幫幫手，而婆婆除了謝過食客外還覺得阻住麵檔做生意而頻向老闆娘陪過不是。怎料老闆娘吾介意不特止仲叮囑婆婆下次搵吾到屋企記得返來這裡，等我哋再幫你返去......
阿Sir, 諗諗下我哋都有野遺忘左呀：咪就係街坊街里相互守望嗰Ｄ人情味，比一座座冷冰冰既商場搶走晒，有無邊位可以幫香港人搵番呀？

貓之恩返

連環的虐殺貓狗暴行，反影出當下糞青真係食左屎忽上松棵體、警方選擇性扮努力及只預以打手板式懲罰的法律確能保障"年少無知"的施暴者得到改過自身承認錯誤長大當上美國總統的機會外，還鼓吹市民將向特衰政府施政的不滿轉嫁發洩在標籤著影響市容環境衛生的流浪貓狗身上。此舉亦大大減輕了食環漁農消防衛生處的出勤率，因報警都嘥氣而減少對警力的無謂浪費，從而省回納稅人大量血汗錢得以上繳地產商，簡接令本地樓市持續升溫，造就一片歌舞昇平的投資泡沫，令庫房滾存千億盈餘回饋各界，小市民有閒錢飽暖思行善積德遺愛，冒寒餵飼流浪貓狗普渡眾生...生生不息天理循環，本小利大，犧牲幾條賤命供人類享樂造福千萬生靈免遭塗炭，實乃幾生修到之福份，小小痛，忍下囉！

Go to DMC

警世漫畫"爆粗Band友"裡的死亡金屬樂隊DMC的御用愛豚；平日是便利店的慈腸收銀大叔，晚間化身被虐狂渲泄抑壓於內心的不安。一副軀殼兩重人格，可塑性高的漫畫人物借題發揮潛力無限令人樂不可支。現實裡週遭人物事黑白陰暗面比漫畫精彩百倍，人格豈止雙重簡直怪盗七十二面相，見不得光生不下來的鬼胎只好各自懷在肚裡......唉！講講下又咁灰，都係睇下公仔書嘻嘻哈哈算啦。

p.s.多謝brother手信，一抽即中特別版

述數

對於一個頻死的病人來說，看似生命流逝如風飛，現實可能卻是時間多得一刻難耐；
呱呱墮地的嬰孩，彷彿有用不完的時間在面前等著他去揮霍，說穿了，只是生命正式開始點滴倒數；
三十歲前任由青春燃燒，步入壯年卻燃燒著僅餘的壯志；
行內通病早上九吾搭八無無謂謂等著時間流走，晚上加班埋首伏案卻埋怨時間不等人；
假期賦閒在家是享受時間定虛耗光陰，往街上瞎跑血拼是浪費時間金錢又或是買來心靈滿足誰去定論；
時間總和我們過不去定是我們迷失在時間面前過不了去，過去的又不大了了，未來的沒甚大不了，活在當下的又不甚了了。
時間從來沒多沒少，用作量度時間的單位不是"多少"，而是"生命"。生命卻又是以"長短"去衡量的，生命長者時間相對多，短命的就要接受時不我與，而量度生命的單位叫"意義"，時間在白活一世的人身上亳無意義，活得有意義但卻又短命，那未做人又真的更無意義，那麼，各位有命有時間的，不妨開始活得更有意義，因為量度意義的不是"時間" 又抑或"長短".......正是："多少"。

三不賣

係書城遊走幾粒鐘，都找不著半本廣告參考書籍，卒之都要死死地氣觀摩一下水牌，
不望由至可，一望開心到我........原來書城另辟一隅全將有關書籍放响一個"ART & DESIGN"區！拿拿臨排隊付款收買選好的旅遊書等，去locker取回包包橫越幾條馬路到對岸血拼一番。
進入區內已感到氣息與之前截然不同，少了那份囂鬧焗促，亦沒有太多隨處倚坐的同胞，只有廖廖十數人在埋頭找尋心水書籍。而那十數人當中的一個我卻顯然是比較失望的一位，皆因佢真係夠膽死 Art & Design照字面解：藝術與設計！純藝術的水墨字畫工藝鑑賞明式家具古玩玉器...純設計的平面網頁招牌logo家居字體...想搵一本廣告參考書簡直係妄想！連羅湖聯檢大樓一帶的書店比它還多選擇......既然人家咁執著，我都無謂堅持落去，唯有打道回府啦！

廣告...咪就係廣而告之！

點樣一分鐘內塞爆公司大招牌；
點樣爭分奪秒令你印象難忘！
點樣近乎零製作成本卻蕩氣迴腸！
點樣同時加上賀年形像又不窒礙畫面！
點樣令畫面平靜得來又生動活潑！
點樣令一條片用足一甲子！
點樣令你發夢都扎醒流一身淡汗！
史上最爛廣告今天為你型造！
恆源祥；睇一次就記得！
就是永恆又源遠流長......

坐困書城

今天上深圳一趟買月底到上海的機票，三折票千一蚊來回雜費全包。有時間順道到深圳書城打下書釘。聞名已久今次都係第一次見面，地方真有夠大兼書籍種類五花八門得來花多眼亂，有心慢慢睇真係成日都吾夠仲要腳仔都軟，如果多幾張櫈真係勁過圖書館，但就係因為吾多櫈(以人流計)，以營商角度就係要你見到好書乖乖地比錢回家慢慢品嚐。但係好書成千上萬，再平都係一舊數。知識改變命運，以毅力見稱的同胞們以陣地戰農村包圍城市，時間換取空間，實行無產階級鬥跨資本家...不論單人匹馬情侶襯家一室大小家爺仔乸，身處櫃邊牆角欄河走廊通道兩旁...全部手執愛書一屁股坐下，埋頭苦讀旁若無人盡情沉醉書中章節，元神直像脫韁野馬奔馳於自我無邊空間...如廝忘我超然之境像，在香港只有網吧裡的邊青才可比擬。

必love豆

無限復活系列第二彈---枝豆！
繼上一回女士至愛泡泡紙大賣後，今次對像係晚晚去辟酒食支豆嘅倭寇男子。係香港日式食肆D茂利最鐘意扮晒野整番碟又貴又無味嘅豆豆，吾通就係貪呢下"必"出嚟嘅快感....？？

民明書房搞電影

http://www.otokojuku-the-movie.com/
史上最熱血漫畫：魁!!男塾 終於都有真人版！雖然個個奀挑鬼命，不過都係志在緬懷一下大家的輕狂歲月。
一句講晒：我係男塾塾長！江田島平八！！！！！！！！

甜甜圈套

http://pony-hp4.web.infoseek.co.jp/PONDE.htm
在日本當飯食的Mister Donut, 除了新鮮好味的Donut外，為的就是他們定期更新的兒童餐獅子玩具，只要加好少錢就可以換取在本地奇貨可居的得意精品，真係食吾晒都要打包走！點解台灣開左幾十間，就連上海都吾執輸嘅時候，我地仲要食埋D甜到嘔嘅大美國Donut㗎！

官網：
http://www.misterdonut.jp/index.html

給Brother的信

好brother, 吾該你過日本時幫我掃本番來，首領落Order 呀！

日食

年中又有計劃去日本，我最愛吃的"光麵"......等我啊！

ps...諗下姐，吾係吾得呀？

貓肥屋潤

年初二的開年飯，特意開了貓罐頭予我家的長尾賀年，平時只給牠乾糧吃的口寡寡，每次一聽見開罐頭聲也急不及待的飛撲過來，看牠的猴擒相還以為是一隻餓了十日八日身手敏捷的瘦貓，其實又肥又懶又怕事才是牠的真本性呢！

萬事性意

各位看官身體健康！
今年拜年雷打不動的話題，必然是相片欣賞鑑定這一門，真假辨別已再沒有人質疑，重點全在於數量及人物分析，大家緊張的是有否看漏和鬥誰看得多，一日間暴增二百多張並不是一個尋常家庭可承受消化得到，沒有鑑賞過最新作品的只有乾著急兼牙癢癢，難得各方親友聚首一堂，便是體現血濃於水的時候，彼此興高采烈地交換電郵地址，大家都盼望以後能相互間多點問候，盡量關心各人的最新資訊及動向(網上的)，互補長短...與往年大家只顧各自剝瓜子，睇直播賀歲波的冰冷場境相比，煞是溫馨感人，真希望受雪災困擾的湖南同胞，也能感受到這股人間暖流啊！

Linda Linda...

最近樂隊番玩了8-90年代日本j-punk ：The Blue Hearts的Linda Linda；在網上搜尋樂譜及相關資料時，得知導演山下敦弘因這首歌而拍攝了一部叫Linda Linda Linda的青春校園電影。描述四位女生為參演校園文化祭而拉雜成軍由零開始日夜操練的逸事。日語不靈光的韓籍交換生當上了主音；因原有結他手受傷而頂上的keyboard手要重新學習結他；Bass手除要努力練習外更要負上照顧家人的責任；加上樂觀友善的鼓手，組成了PARANMAUM去面對重重困難，去完成心中的目標：演出成功！而劇中亦收錄另外兩首The Blue Hearts的歌曲《終わらない歌》及《僕の右手》都是簡單得來不失年青人熱血的作品！

石磨男

NASA的火星探測車Mars Explorer Spirit, 早前在火星巡邏時，拍下了一張備受太空迷爭議的"火星人喪跑回頭望"肉照。其動作姿態很像1967年的假造錄像裡的野人，加州兩條茂利拍下17秒的8米厘短片"昆"左世人幾十年。不過今次頂多玩你幾十秒，睇真D，咪石頭一舊！我地香港人睇左望夫石幾廿年，無錯嘅！

幪面衰人

幪面超人頭像第四彈特別版竟然係佢！！
~嘰！

落葉牡丹

昨晚收工學完bass同stone心血來潮去左廟街興記食好出名既炭爐煲仔飯，以前來過遇著條見首不見尾既人龍都掉頭走，所以今次係第一次試，都係嗌 D隱隱陣陣既排骨同滑雞，最多加條潤腸。係等出飯期間梗係整碟炒蜆加支大啤！不過碟蜆亳無鑊氣仲凍冰冰，好明顯係整定一大盤慢慢"筆"果隻！啤酒又無燕京哈爾濱，迫住要支吾好飲既嘉仕伯。到主角煲仔飯上場，18蚊煲要求吾高，飯同豉油都無問題，但係就爭D野咁，潤腸吾算好靚又吾係難食，排骨略鞋，雞入得口都叫滑。但係成煲飯硬係寡寡地，咁係出左咩事呢......？啊！咪就係缺少左排骨上既豉椒同雞上面既薑䓤law! 吾好睇少呢班小兄弟，無論要來吊味同加強賣相，佢地都功不可抺！就等如食麵無落䓤花，銀行門口無左阿差一樣......梗係爭少少吾到肺兼吾順眼咁law...




P.S.總結吾去並無蝕底

彆扭

PENTAX的銘鏡：FA17-28 f3.5是一支極有創意的魚眼至廣角變焦鏡，加上其高晰的解像及SMC的抗耀斑能力，由當年乃至現今仍屬一支受各界熱烈追捧的鏡頭。以這支鏡頭拍攝人像，配以週遭境物的點線面，成品別有一番玩味...可惜，吾係人人懂得欣賞。

唯我

在對岸渡頭迎接我們的花貓，鐘意行行下忽然拉筋；以為再行入南生圍仲會有好多貓，點知係空手而回，失望！

百年修得同船渡，收少幾蚊好吾好？

灣仔去北角小巴五蚊；
地鐵搭兩三個站睇怕都係五蚊左右；
筲箕灣搭巴士去灣仔好似吾使五蚊；
電車由頭搭到尾來回兩次五蚊仲有找
係南生圍坐半分鐘橫水渡阿叔你收我五蚊一程！！
又吾使入油入氣過橋過隧道，頭不回氣不喘見你吾使好用力...
吾係叫你吾收錢，咪咁狼吖喂，開口仲大過貝貝，搵漁農處捉埋你呀！

死開D

我吾反對吸煙，你要點死其實吾關我事；
同樣地，我好憎二手煙，我想點死亦不用閣下替我操心！

妖怪集結號

Universal Monster系列"Red"終於上架；狼人、科學怪人1931、木乃伊、歌聲魅影到著！

革他媽的命

因超反建制(國內即被演譯成反共革命宣傳煽動罪)被中國追緝兼扣押財產繼而流亡台灣的中國樂隊：盤古，徹頭徹尾體現Punk Rock是如何運作！香港果D無的放矢，無病呻吟自稱及標籤為"龐克"的MK band，真要好好自我教育反省一下。
盤古到了台灣除了繼續反共外，更索性搞埋台獨！他們的歌跟大多Punk Music一樣，都是簡單的旋律和粗糙的技術，配上辛辣的歌詞，向權貴建制作出鞭撻控訴；仲有...
盤古樂隊英文名譯音就係叫：Punk God啊！

部份歌詞節錄：
《有槍誰都能幹掉》
你不就欺負我們沒有槍嗎？
就是因為我們沒有槍才讓你壓在我們的頭上。
我們一定要有槍，
有槍誰都能幹掉......

《最近應該死幾個人》
最近應該死幾個人，才能解我心頭恨。
死幾個好呢？死誰好呢？
你們真能活，你們真能活........

《我第一次到人間》
我第一次到台灣，
我第一次到了人間，
我第一次離開中國，
我第一次離開地獄，
我第一次離開絕望，
我第一次見到了自由......

帶住呢隻CD番大陸被人搜到吾知洗吾洗坐番十碌八碌？

我的青春小鳥一去不回來

平安夜，食好野。吾想同D MK仔女迫，唯有係屋企食，吾使點花功夫既Sabu Sabu就至好，食吾起和牛，平D既加拿大牛都係幾好選擇，來多盒紐西蘭羊肉，湯底要日式華雞湯，加兩條日本大䓤同燒豆腐...雙璜生抽，日式麻醬，酒水...全部係Citysuper搞掂晒，返到樓下買丸類菇菜 。沖乾淨涼擺好個陣慢慢歎！記得扭開電視睇住班MK食住風起勢迫吾知為乜，咁餐飯就更滋味。