家吓有批新貨

製作屎滾滾，交貨淡淡然的益力多四十週年廣告；
有幸掹車邊參與，大家看過了沒有？
這是三份一部的大雨下果欄內叔父篇...
上Youtube就可以睇晒三部45秒足本。

又係牛豬貓

又去牛下又去興記又食豬排又係搵貓又係一大班攝影痴漢...
今勻唔食豬排包，改為福麵，一樣惹味！





文具舖爛玩的白貓卻被牢牢鎖著，只有跳上跳落的份兒









係石油氣爐上酣睡的懶貓，照例被我們搞醒

逢生

懷孕黃麖無啦啦被人用鐵鏟...打死
跌進引水道的赤麖於圍捕時...嚇死
黑狗攝進祠堂隙失救...夾死
野豬誤闖民居被獵人開槍...淝死
茶果嶺木廠流浪狗遭看更烹調...煮死
國寶中華鱘監粗輸港不適水性...玩死
家禽打個乞嚏即遭屠殺...割死
牛肉價格颷升時山邊黃牛被偷宰...劏死
國內不法之徒跨境獵馬騮補身...狼死
流浪貓狗虐殺案無日無之...慘死
飛鳥不時碰上遮天蔽日的玻璃幕牆...撞死
特區嘜頭白海豚被無休止的填海與基建...迫死

下一位...
迷路座頭鯨被八卦群眾好事之徒...煩死
希望小鯨魚能夠盡快逃離這個比北冰洋還令人冰冷心寒的水域，
和走失的同伴一起繼續遷移之路，別要在此...枉死

災星

颱風三級制：颱風／強颱風／超強颱風
高官三級制：庸官／狗官／貪官
超強颱風出現的機會率只有一成；
本埠庸狗貪官直如恆河沙數...
颱風再強死傷總有限數；庸狗貪官胡作非為死得人多
颱風更強總會過去；庸狗貪官暴行總和大家過不去

三姑六婆的語言暴力

有不滿的，說出來；
有不如意的，道出來；
有不順心的，攤出來；
有怒火的，爆出來；
含冤的，吐出來；
嚥不下的，嘔出來；
有口難言的，可以拍枱動氣；
詞難達意的，可以用粗口來補完；
不想表達的，可收於心底，再山長水遠的到吳哥窟向樹窿訴說；
但千萬不要以一聲"o習!"來交待......
"o習!"一聲令我腦海中閃過幾個畫面：
葉劉淑儀的嘴角
董趙洪pink坐唔到A1位的面容
曾太見到曾蔭權偷食...油角
牛頭角順嫂的眼角
甜在心饅頭的老闆娘
蔡素玉滲著香汗的額角
馬可斯夫人的高跟鞋
落選的佩琳
抱著愛犬的鄺美雲
陳細潔的紅酒
穿起透視晚裝現出大半對下墮木瓜的名媛
迫男友孭手袋的港女
搬是弄非小女人的指頭
歐巴桑嘴角上的痣
劉吳惠蘭林鄭月娥這類四字成語...

唔好"o習!"~由其是你係一個男人...

恃強

西藏無端端被"解放"五十週年，週邊地區四川九寨黃龍已實施禁足清場，加上青海的爆炸事件，首府拉薩的緊張情況著實難以想像...
監硬除人條褲拮人屎忽唔比掙扎嗌痛，仲住埋喺你屋企開飯又要加餸。
厚顏無恥大大聲話係愛嘅表現...共產黨有幾好大家睇得見。

鹹得有道理

無夢想嘅人就同一條鹹魚無分別；要同一條鹹魚講夢想，其實講唔講都無乜分別；要分別一條鹹魚同一個人，就唔使點睇佢有無夢想；有夢想嘅鹹魚頂多是想做一條霉香鹹魚，無夢想嘅人未發霉已嗅到陣陣霉香；最怕聽人家講夢想，越聽越覺得原來佢真係一條鹹魚；鹹魚內藏被掏空，沒有夢想的人心靈亦趨乾癟；我的夢想亦有陣陣鹹魚味，只因我的夢想和鹹魚一樣...正被吊起風乾著。

換伴

金融海潚下，鐵人28竟然有能力換新車，金田正太郎確實寵得他太過份了...


新歡



舊愛
http://www.eonet.ne.jp/~robot/index.html

牛下雞蛋仔

可以有遮天蔽日的屏風樓，可以有過萬尺的超級超級超市，可以有一千幾佰個倒模商場，可以有高聳入雲的國金天璽...卻容不下一個舊式屋村，容不下一檔熟食小販，容不下一客傳統炭燒雞蛋仔，容不下一段成長回憶...是香港地小還是心胸小，抑或我們的目光確實太短小。
專誠來一嚐雞蛋仔的人太多，而一樣懷舊的砂糖格仔餅卻不斷出爐，老闆娘唯有一味嗌格仔餅唔使等喎...咁囉！


炭爐火路猛，師傅手勢好時會出現糖芯雞蛋仔的奇景，非常好味！

向豬囉說再見

牛下興記茶餐廳的惹味豬排飽快將完成它的歷史任務，淹蓋於港式資本摧毀主義洪流中，得閒好去咬多兩啖啦~

牛頭角順嫂個friend~~倒數！

今日身痕再探牛下，希望喺臨近清拆前作多點記錄。可惜的是這個快將消失的香港老記憶活化石，內裡已少了很多商舖，少了很多貓咪，少了很多村民；但卻多了很多攝影痴漢，不論男女長幼，人人手執一機你又影我又影係又影唔係又影...搞到我都唔係咁好意思攞部機出嚟影，既然有咁多師兄為牛下拍遺照，咁我就梗係响度逛下食下觀賞下，慢慢感受下瀰留中的歲月情懷罷啦！

大量攝影痴漢由四方八面湧入牛下，任何物事也會被人包圍狂掃一餐...






貓貓也被大量人群嚇怕，出場率非常之少...

爛泥

最新預算案圖謀攞我哋D血汗錢津貼比老闆們用四千蚊請個大學生做下實習，如果番大陸勞動就有三千蚊兼一千萬保險咁話...D記者梗係又煞有介事咁訪問下呢班尖子棟樑睇下有乜反應；點知個個耍手擰頭話直頭廉價勞工開飯都唔夠，更惶論行街睇戲打機索K去Neway...對政府呢舊良心如狗肺般看待，寧願長眠家中做其宅男腐女都唔出去見下世面，以免被政府呢個無肉價侮辱，認真有骨氣型到痺！
早前為咗加嗰幾百蚊生果金就喺度阿支阿咗，要D老人家又跪又拜都置若罔聞。家下攞舊錢比班食塞米送佢哋上青雲路反而比人奚落；走去扶一班企都唔願企嘅阿斗，掛個西樵大餅喺佢哋條頸都話懶得舔。 反而年老失業水深火熱日捱夜捱仲要比地產商打劫嘅就唔幫唔理不聞不問...資源錯配藥石亂投至此，呢班高官真係食屎食到低低哋智。

夠僵入手

十年前與友人喺戲院睇過一齷火拼吸血鬼的西片，戲𥚃的情節多年來都無時無刻間歇浮現喺腦門，但苦於忘了戲名兼且戲𥚃的演員並不為港人熟識，在網上及店舖尋尋覓覓都係白果一粒...卻機緣下於上年歐遊最後一站英國最後一日响HMV等人的最後一刻，埋首一列列恐怖片特賣架上尋寶時，竟然就比我搜刮到呢隻苦覓多年的"VAMPIRES"！！就好似吸血鬼遇上肥美的大動脈一樣興奮莫名，一睇個封面D記憶即時湧番晒出嚟！後來於國內網站查探下得知其中文譯名為："夠僵行動"或"V字特攻隊"...香港譯名都係前者為準啦...睇怕!
呢齷戲一開場就好有西部公路片feel, 一班用上各種custom武器的教廷僱傭兵，走去墨西哥圍剿匿藏喺荒廢大宅入面嘅大批吸血鬼！可惜晚上慶功時不防鬼王尋仇報復，最終梗係不敵幾近全軍盡墨...之後就實係主角與僅餘嘅成員同鬼王來個沒完沒了，兼且順便阻止阿鬼王得到可以令佢喺日間太陽底下行動自如嘅黑十字架咁囉...不過主角好唔好彩身邊兩位同伴又不幸分別被咬，隨時變埋吸血鬼，再加一個隱藏著教廷秘密嘅新紮神父參戰，真係搞到阿主角頭都痕埋...
呢齦有別一般吸血鬼片嘅VAMPIRES...咦！咪住，導演原來係John Carpenter...月光光心慌慌，唔怪得之啦！

認真的槍認真的搶

小命擔保100%會响我有生之年重拍嘅超經典科幻片：Forbidden Planet；當年除了捧紅咗片中機械人Robby the Robot外，戲中探索隊所使用的"死光槍"，同Robby the Robot一樣，其前瞻性對後世電影及玩具均有著所向披靡的影響力！
Robby the Robot產品由認真到唔認真的可謂多如恆河沙數，但呢支咁巴閉嘅死光槍嘅唔認真產品就有好多，最泛濫的要算是金色塑膠槍身紅色透明槍頭的火石槍，是兒時指定裝備，而認真的就睇怕只此一支號稱超高品質世界水準嘅一比一仿真槍...索價十幾萬日圓限推50支，要訂購都要同支槍一樣認真...Ｄ考慮下先好。

大隱隱於市

每次喺彌敦道恆豐對面等車，都會企咗喺賓館林立嘅北京酒樓下面，各式賓館招牌隱含一條幽幽小樓梯帶嚟無限暇思，每每令人有試菜的衝動...

幾十年的舊樓，裝修的裝修，改建的改建，維修的維修，唯獨不變的就是北京酒樓



主打是老京菜片皮鴨，水準不俗，但少了在閣下面前即片的視覺享受



手撕雞很惹味，吃套餐記住加錢升格



賽螃蟹做得非常爽滑，比坊間食肆出色何止一班



小籠包有點令人失望，棄蒸籠改用碟上已經要扣分，加上皮確實太厚...



銅鎉豆腐亦是必叫佳作，別處很難吃得到




內裡的裝璜實實在在就是荷里活電影裡的China town酒樓格局



大哥送的銀河旋風也來摻一口

城裡的月光

10-02-09 12:00am的月色

元宵佳節終於可以喺一堆零IQ爛gag題裡透透氣，聽番D真係有紋有路嘅燈謎，連家陣城裡的目光--天氣小姐黃婉曼都忍唔住要問大家乜嘢係"彎月伴三星"...(估一個字) 喎~

世上本無事 庸人自擾之

特衰政府呢班庸官食塞米，最鐘意攞舊石頭揼下自己隻腳。新正頭又懶咩咁走去求支籤，一邊摧毀否定傳統文化瞎搞建設，呢頭過年又扮與民同樂入鄉隨俗。搞到車公都睇唔過眼整支下籤大家嘆下！明明導人迷信出咗事就叫人唔好盡信。不過話時話阿車公呢劑真係非常靈驗，直情古人智慧今世盡發揮，嚇到班契弟屎忽窿都無肉！

君不須防人不肖---橫竪日日被人屌
眼前鬼卒皆為妖---請埋班友得啖笑
秦王徒把長城築---有事就把龜頭縮
禍去禍來因自招---又要比人掟香蕉