穿藏:6>家陣唔係事必要你去

24/6 日喀則--納木錯--拉薩
7點起身驅車直撲聖湖納木措(4718m)，當駛至城鎮路口時，歐珠師傅停車扮晒比我哋落車影相，實則係講數。由於往納木措行程是另加的，就算日數一樣但佢話公里不一樣，油錢好襟計，所以玩四日要收番五日錢...諗落好似好有道理實則充滿破綻，不過為免被賣豬仔，每人比多少少但扣番佢啲貼士便繼續上路免傷和氣...
一路上風景優美非常，到後段路更走上了小部份青藏公路，到三時許終於到達納木錯，門票120人仔，前後坐八小時車飯都無食，真係散晒。
到湖邊飯店吃了面條後便沿湖走走看看，做生意的確比往年暴增了許多，人多野狗更多，聽說野狗們早上睡覺晚上狂吠，加上高反真係想瞓個好覺都難，若非有心拍日出日落，過晚夜並不是最好決定。閒逛了兩三小時便打道回府，往拉薩的路還遠呢...
全速開抵拉薩已是九時多，入住之前訂好的賓館，休整一下便外出食個藏式火鍋，再轉戰岡拉梅朵飲酒吹水。
講數現場...拉薩河



途經遍地油菜花田



還有多個雪山


快到達時下了一陣雨雪




很多商鋪很多狗



納木措一隅




漫天經幡與遍地瑪尼石



晚飯的藏式火鍋，最大不同的只是肥牛換作耗牛

生命無希望，前路坦蕩蕩

遊記停一期，因為夜晚睇完至愛嘅F檔案(Fringe)想無聊吟一吟...
Fringe 今集一開場就講廣東話咁鬼親切，以為揀咗麗音，睇多陣原來係講有班香港人，要集體起錨坐貨船偷渡到阿美利堅做黑工改善生活，人蛇慘況雖然同世紀大cult片"打蛇"有啲距離，不過華工血淚屎呢啲級數就一定走唔甩...一家大細屈係船倉底，衣不蔽體又焗又翳，阿女仲係揸住件爛鬼鐵皮玩具雀仔...呢個年代NDS都無部傍身，唔怪得要遠走高飛逃離香港地。宣傳易晚晚"艾甩康江"同胞大舉移居香港，港人卻受不了只賺最低工資做足最高工時，貧富懸殊官商勾結，生前賣身為咗層樓，死後搵個位都仲要輪籌...真係有得走就好快啲走！
香港一日未有真普選，與歐美列強共享真正民主；老外一日都當我哋係蠻荒，話之你外匯儲備有幾多金糠，人哋眼中你都係茹毛飲血扎辮著清裝！

穿藏:5>好努力，到咗地球第三極

23/6 定日--珠穆朗瑪峰大本營--定日--日喀則
今朝要趕路往大本營，六時起床發覺還未供電，唯有靠微弱的手電筒摸黑收拾梳洗。
由定日往珠峰要稍為離開國道318, 沒有柏油路可走，只有崎嶇的土路。拐過五千多米的山口，沿途經過幾個村落及兩個邊防檢查站，其中一個要人車分隔過關，持回鄉証的港客不用像內地人或外國遊客般要申請禁區紙，只要乖乖排隊登記便可！
過埋驗票站約十時許到達珠峰大本營門口(5200m), 此時又要多附25蚊人仔轉乘小巴上山到base camp，同香港小巴一樣坐滿開車，由於小巴避震能力近乎零，十幾分鐘車程拋上拋落，令高反中的同行友人難受非常，語無倫次...
上到營地又要被解放軍登記一次，之後再步行上一個小山崗到警界線前不能再寸進時，大批國內同胞爭相霸佔有利位置和遠方的聖母合照，扭盡六壬擺盡姿勢慌死蝕底...我們初時還禮貌地退守一旁靜待時機，但後來發覺這是與希望工程一樣是永無休止時，就咪怕羞兼好唔客氣咁爭埋一份，先至影到幾幅相交差咋...
因為小山崗上企位有限又人多擠迫，搞多兩搞都無咩好搞時，眾人又一窩蜂地下山，一齊上小巴又一齊“凳“番落山。之後又要和同胞們爭住寄出大本營明信片。完事後會合了師傅，離開這處趕了兩天半路玩咗唔夠兩個鐘半嘅地方...
遠看喜瑪拉亞山脈


到達大本營入口等轉車，今日非常天清氣爽，能見得聖母大人全相


終於抵達base camp


sorry...支鏡係得咁長


與經幡合照


全球最高郵局，票尾是明信片一張，當然唔好嘥，備有多款造形郵戳，每個好似五蚊


回程途經世上最高寺廟--絨布寺；與珠峰遙遙相對，提供宿位，可以過一晚拍攝珠峰日出日落，或計畫前往絨布冰川


傍晚回到日喀則，住進師傅介紹的旅館，全藏式裝修，100/房，舒適抵住

穿藏:4>食飯同去玩都咪就住就住先得㗎~

22/6 日喀則--拉孜--定日
今天先要到扎什倫布寺逛一下，面積達30萬平方米的後藏最大寺廟，都係收你55人仔，對比起布達拉宮以至藏區其它寺廟，扎什倫布寺絕對抵睇！不過有心想慢慢蹓躂，細心參觀，最好預番半日，因為真係......好大。
以為無乜時間嘅我哋只係玩咗個幾鐘就返酒店退房出車，臨走又中咗內地常見嘅屈你唔見嘢奇招，今次係一條市值五毫炒價五蚊嘅小毛巾，口同鼻拗，佢話唔見咗部電視你都要賠，五蚊人仔算仁慈的了！
沿途一路到拉孜的景色都沒什看頭，就算到咗拉孜都係食個飯就走。格桑歐珠師傅對點菜總是耍手擰頭，由我哋發板唔係問題，不過你最好話比我哋聽有咩食得過有乜不能錯過，你太客氣咪大家都無好嘢食囉...
到達定日都係5時許 (後來問師傅乃知此地為新定日，與幾年前到的老定日好明顯係專為接待遊客而開發)，早知係扎什倫布寺玩多陣！師傅安排入住睇嚟係最肆正的"定日雪域賓館"，聲稱二十四小時熱水，但係限時供電，兼且電視接收不到任何訊號即係今晚無波睇，200蚊人仔喎你收緊我....唔係呀！？
一早來到無嘢做等食飯，唯有洗吓衫打發時間，其間有隊友出現高反，飯都食唔落。好彩問題不算嚴重，話晒我哋都身處4400m, 係要有啲反應先合理嘅...聽朝要晨早坐幾粒鐘車上五千幾米嘅珠峰大本營，早啲瞓啦各位！




扎什倫布寺隨影



走在318國道，拉孜距上海5000公里



新定日是一個悶出鳥來了的新城鎮，可在這裡預先買好車輛進山票400/車，及珠峰門票180/人



同樣沒事兒幹的小貓來造訪

穿藏:3>錢能通神，神不過人

21/6 拉薩--羊卓雍措--卡惹拉冰川--江孜白居寺--日喀則
早上9時出車，來接載我們的是藏族的格桑歐珠師傅，不愛說話的他正合喜歡路上靜靜看風景的我們！
今日頭盤是攀越五千多米的崗巴拉山口，到達藏民心中三大聖湖之一，亦是世上最高的咸淡水湖泊--羊卓雍措(4474m)。車一到埗，預期的耗牛黨藏獒黨抱羊黨早早恭候，沒有令大家失望！之但係要企响舊刻有羊卓雍措嘅大石隔離影相都要收五蚊人仔就真係恕我見識少...睇怕响金紫荊廣場都可以搵到啖食...
隨後的卡惹拉冰川(5036m), 都係離遠影吓相就算，見到有標石大家都咪行咁近...提防土霸出沒注意！
師傅下午駛到江孜，其實到日喀則可以不停經江孜的，但這裡有一間頗有歴史價值的白居寺，及藏民慘烈抵抗英軍入侵的宗山古堡遺趾，所以你唔使指明，全西藏司機都會送閣下到此一遊的！
玩晒各主要景點，於下午5:30抵達後藏最大城市日喀則，師傅安排的賓館頗為隔涉，於是我們便挑選了較近扎什倫布寺(後藏最大寺廟)的剛堅酒店140/房(又貴又甩漏！)，今晚早啲瞓，聽朝爭取時間到扎什倫布寺逛逛，彌補去不了布達拉宮的遺憾。
沿著崗巴拉山的之字路上升二千多米，冬天這裡全是白暟暟的雪山呢！





羊卓雍措，陽光絢爛時，可以看見湖面泛著不同顏色



終年不化的卡惹拉冰川，難敵全球暖化而節節後退...


門口影張相都被僧侶鬼打咁的白居寺，要我比錢入場，慳啲啦你！



寺門口的小貓，被藏民抱著討錢用的招財工具...



想整杯酥油茶，但係勁多蒼蠅...放棄

穿藏:2>習慣性需要

20/6 拉薩
為了習慣高原氣候，所以需要安排在拉薩逗留兩天，昨天大無畏與友人飲啤酒，所以今日頭痛依舊，不過整體上大家都表現良好，沒有出現什麼狀況，可以繼續行街買嘢...
今次竭腳點為北京路上的"岡拉梅朵"，近期風頭被瑪吉阿米淹蓋，但係就勝在夠清靜，看看書聽聽音樂，hea得十分自在。
今日要預訂好24號從珠峰回來後的房間，因為山長水遠返嚟都想住好少少，所以就揀咗同處北京路上的凱拉斯旅館，要成180人仔/房，比多少少瞓番個靚覺，沖個涼花灑都好力啲...
晚飯到驢客餐廳食飯，這裡老闆會說廣東話兼賣粤菜，可解鄉愁但咪期望十分好食。
回到旅舍接收到訂車走川藏線的師傅說要遲一日至有車出，所以臨時決定從珠峰回來再多走一天納木措 (海拔4700m藏區首屈一指聖湖之一), 玩到盡！
八廓街中了高反的貓


藏語"岡拉梅朵"意謂藏蓮花



所有旅館都必有徵人啟示



三蚊位的三輪車，吹吹風挺舒服...不過上車前最好不厭其煩重覆一下價錢


每日無可避免涉足的八廓街一偶

穿藏:1>適應性生活

19/6廣州--拉薩
晨早9:00機，早一日上定廣州hea一晚，飛機停經重慶一陣之後就直奔拉薩，轉機時有職員神神秘秘問定要唔要車接送入市區，50人仔一車；其實都係啲送完人嘅回程車，機場大巴都要位位30，計落絕對有著數仲唔使等，咁就一家便宜兩家著！2:30pm飛抵貢嘎機場果然有接送，不過沿途梗係會介紹番啲一日團過你參考，但係我哋咁潚洒，當然唔會就範！
到達預先book定嘅平措康桑青年旅舍休整一下，呢度一個四人房連衛浴都係位位四十，不過要揹住大包包撐上四樓就真係向高反作出宣戰！
落樓去布達拉宮探究一下門票銷情，其實都一早預咗比人包起晒，原價一佰漲價到二佰多仲要跟購物團就寧死不屈，但係又懶得晨早九時排大隊訂翌日票，所以決定放棄參觀計畫，唔失望之餘仲覺得幾有型添...
走到八廓街，大昭寺行吓街購吓物，接近黃昏高反終於上頭，體力開始下降兼頭暈眼花，立即躲進"瑪吉阿米"攤一陣，點知攤吓坐吓飲吓食吓，就咁就食咗四佰幾人仔，第一晚就洗咁大，頭開始唔痛但個心有啲痛...
這是舊"平措康桑"，五樓可以上網睇波飲酒吹水，不過對面新樓天台卻可遠眺布宮


布宮不只建得高，連入場難度都可比登天


血拼是暫時忘記高反的良葯


吹水in瑪吉阿米，不過因為電視效應，成日都咁多人...有啲煩

關鍵

有過往的"糟"遇，盤算著今次西域之旅的艱苦度與各隊員接受能力，將所有生存門檻降低，事先張揚作大靠嚇落足料 ，搞咁多嘢裝胸作勢，都係怕大家怪罪落嚟...不過今趟事與願違，原來各位只要肯附出多少少，衣食住行都可以好好過...西部過度大開發，城市農村番兩番。為人民幣服務開放改革大步走，食得招積住得舒適是否就是增了值？

久向西奔走

出發出發！像霧又像花的16天西域之旅多得各隊員近月加速運轉，終於搞定一切，明天全速起行！戲肉是後七天的川藏線疾走，有幸一闖這條聞名於世又滿途凶險的風景走廊，二千多公里途經大山大水最高五千多米啞口，希望大家多多容忍相互扶持共同享受這個難忘旅程！
以前加收人仔拾元錢便可登上布達拉宮金頂一遊，現因遊客太多要保育封閉，只能望門輕嘆一下...

牦牛感

牦牛是高原的駱駝，無論拉車與軚貨，都少不得牠們幫上一把；當然甚麼都會放進肚內的中國人少不免亦會將牠們放到桌上。形形式式的牦牛料理方法不下於坊間任何飛禽走獸蛇蟲鼠蟻。而牛革牛角牛毛等亦順理成章地成為各類商品，就算不劏不殺，將其粉飾一番讓遊客合照騎乘，也是一小商機。任何好東西落到中國人手中，必是一件憾事苦事傷心事...牦牛們當然不會倖免。過度捕獵已使野生牦牛群買少見少，只靠圈養繁殖來支撐人們的過度無謂需索...。聞言道先輩們快樂地在草原奔跑嬉戲，吃著最滋補的野生冬草夏草，喝著天山純淨雪水，日看照映金山，夜觀繁星若璨，只會是我輩夢裡的一個期盼。

營望

那年頭只能在門口擾攘一下，今次一定要進內放肆一番!!!

納木措木訥

這是藏民心中的聖境，位處世上最高海拔的湖泊納木措。到西域的不順道往這裡一訪，便有白來一趟的感覺...但當年不識好歹，第一天還未能適應高原環境下，翌日便跑到比拉薩還高出千多米的納木措來。受更強烈的高反影響著，頭痛欲裂寸步難行呼吸困難，幾經艱苦耗盡全身氣力才能慢步到湖邊眺望一下，極目遠處的念青唐古拉山脈映照於碧綠湖水中，映襯著比憂鬱更藍的蔚藍色天空，迎著陣陣冷風吹送，所見所感，再不用多費唇舌搬文弄墨大費週章去描述聖湖於藏民心底裡的模樣。可惜自我沉醉總敵不過力弱氣虛，不用諸神指引只有連爬帶滾，死回去營帳死去活來，苦等第二朝到來急急離開，遺下的只有嗚呼哀哉...

更嗚呼哀哉的是這個被過度開發成地垃圾的聖湖，伴隨著大量遊客而至的騎馬黨藏獒黨牦牛黨施捨黨，以及為不需洗滌心靈的大款而設的娛樂營帳卡拉OK的士高等，都令這顆從天上掉下來的寶石不再絢爛枯竭暗淡。

蟹...始終不能向前行

官員們硬著頭皮繼續落區做Show，要聽"民意"...卒之求仁得仁被大多數反對聲音包圍，即時黑晒面口起晒對河蟹桿，硬要瞎說成只是少數激進派滋事阻住巨賊輪船前行云云，仍然一貫死口指鹿為馬顛倒黑白得過且過烚熟狗頭。不過以政府計算遊行人數邏輯，小圈子選舉思維，人多即係人少，小數即係多數，有法不依叫依法辦事，自誇如輪樣般的政改謊案，起錨後也只是迎著北風航行而已。

蟹...是不能向前行的

廿一年前不分左中右，都一致對如蟹般橫行的中共政權作出聲討、控訴...
廿一年後輪到河蟹橫行的今天，人們選擇噤聲或將真相扭曲...幸而身邊多數朋友都沒有被蟹化，反而見著更多的年青友人都能夠認清歷史，走著正確的道路，在這歪理謊話似是而非昨非今是的世俗裡，要堅持心中的正義，著實不容易，多得各路有心之仕與年青一輩將這份執著傳承下去，平反六四，並不是遙遠的事。

唔使急最緊要快

坐小巴要等齊人先開車，是約定俗成；路線受歡迎的，車停泊在站頭很快便可以滿客開行。最討厭司機大佬係唔係都出咗車先左兜右兜，一時停下來無了期等客，一時又衝前鬥搶客，最後來來回回又返到站頭拉客...又煩又浪費時間損耗資源。我寧願大哥你搞得妥妥當當先好出車，咁咪唔使折磨各位焗住要上你車嘅乘客，直通目的地啦...咁心急起錨把撚咩！