頭文字D.......aihatsu

擘大個脾,最好就係揸住架5/60年代既大發三腳雞遊下車河啦！！你睇佢個樣幾疏肝...

乜企圖...

三個鐵人28好兄弟一齊擘大個脾，你估佢地想點？

新地盤

因為舊有日誌pandamania密碼失效，隨時有執粒之危，所以重新set up新網誌，歡迎繼續幫襯，天南地北風花雪月......
舊文轉移計劃亦要慢慢進行, 但不知何年月日先完成...要番舊脹暫可上舊Link一遊：
http://kenjiroxx.blogspot.com/

講番D新野，現存日本唯一鐵皮機械人設計師：芝原秀夫，其作品展將於4月21日-5月8日在涉谷舉行，展出其30多件不得了機械人，淨睇海報已叫人口水直流，機械人更會即場發售！芝原先生的作品造形忠於懷舊之餘亦不失現代幽默，可觀及收藏性極高，巴不得即刻預定機票執定行李請埋假飛過去排隊守夜等入場......現在終於明白那些瞓幾日街排隊買PS3儍仔們的心情了！

玩具日再開

一年計落大大小小的玩具乜乜物物日真是多若繁星，要全部參與真係幾個倉都吾掂！但這個好友的好友搞的玩具日就必定要支持，就算無野賣幫手看檔又點話...

頂住先

最近在網上用HK$260bid了部6/70年代的Konica AutoS2，但我的真正心頭好是這部純黑色的Auto S3, 同是HEXANON, 但用上了38mm f1.8 比S2的45mm好用，從網上資料對比質素亦較強！在ebay成色好的也要2,000多元....唯有用十分一價錢玩住S2 先啦.

相片來源：
http://www.in-photoart.com/modules/newbb/viewtopic.php?topic_id=1235&forum=1&post_id=83390

小公仔大英雄

小廠家inspire近期開發的巨大特撮英雄膠公仔系列令我非常心動。彫刻精細但價錢昂貴，高17cm，賣3850日圓已是同類偏貴。來港價錢可以在二百尾到四百頭，因產量不及大厰及只有水貨，所以價錢都視老闆心情而定。正因如此，便不能每隻也給敗下來...早前買了電光科學人(左)，下一個便等著電子分光人(右)的大貨了！而計劃推出的還有鐵金剛，銀面飛俠及Iron King, 全是我的最愛，令人十分期待！

入夢

最近公司有同事即將前往柬埔寨旅行，令我心癢癢重看年多前的相薄回味這個叫人難以忘懷的國度......
這張在Angkor Wat 小睡片刻的照片是我老婆的傑作！寺外烈日當空，寺內卻異常的清爽，走累了來個午睡養神，忘卻週遭的喧鬧，進入沓沓夢鄉.....聽見吳哥城的一片夢話 ：但願一直沉睡於森林裡，不致醒來時被弄得支離破碎......

終極Smoking

這款Smoking Robot 是鐵皮機械人的經典，類似其造形的同門師兄弟更是恆河沙數，其原型可追溯到1950年，日本Yonezawa出品的兩足步行頭頂發光口部噴煙的電動機械人。今次復刻的這個更配備搖控裝置，而搖控器亦用上以前最流行的線控設計：頭部原形！全新步行裝置更註冊了專利。限定100個，背後鋁片刻上獨立編號。盛惠250,000日圓，再排隊3個月才有機會擁有......吾怪得阿Ray師傅當佢仔咁抱住影張相過你睇啦！

命裡有匙

吾......這條刻有雷鳥拯救隊THUNDER BIRD 嘜頭的上鍊鎖匙，令人每次替機械人上鍊的時候都充滿了正義感！好想去救人....

求人不如求己

這個大阪玩具資料室出品的鐵皮電動機械人，是50,000多日圓，四款Colour各出50隻的超限定品！這機械人的特色就是駕駛員都是機械人......鐵人28號是也！圓柱頭的是第一代，最新推出第二代方頭版更覺有趣，心口的機關槍是行行下先打開發射，非常陰濕！不過就苦了金田正太郎，因為要遙控住鐵人28架駕駛機械人殺敵，咁麻煩把幾火自己跳上去揸把啦！！

伸直器官伸番直！

屋企張爛鬼宜家櫈真係爛鬼左之後，每晚躱在書房裡上網作樂就是坐著一張膠摺櫈。久而久之，背部因失去倚靠而日漸酸痛，坐得太耐整個人也像散開一樣，必需離開崗位稍事休息。其實早幾個月前已在francfranc 睇中張 ALVY SOHO CHAIR， 但礙於事態未算太嚴重而沒有行動！ 但近日背痛難擋，卒之的起心肝在過年前訂購下來，放完假後一直安置在公司。終於剩昨日OT坐的士回家時順道運返屋企，今天回來後將它裝嵌完成！從此腰樑終可板直！

抵插！

係網上找到這個開心大發現：相機腰插；將此物裝上閣下指定型號相機(Pentax ME或類似Model)後，外拍時便可以好似 "蚊 "槍咁.....WA! 型到呀！好得喎！個盒上面條友係當年一定係叫做 "有型士" 啦！

相片來源：http://forum.xitek.com/showthread.php?threadid=327773

路難行

早前買了劉以達與國內女畫家李璐璐的新組合“達與璐“的同名CD，近排又再拿來細聽。這張穏陣有餘, 創意不足（以達叔的功力計算）的pop rock?? 大碟，亦可算是o6年的滄海遺珠。若不介意李璐璐的聲線有心或無意與王菲相似的話（我又無乜所謂），其實都幾好聽。大碟貫穿著優美輕快的旋律，達叔的編曲亦見心思。歌詞雖爪不到癢處又未到言之無物。整體表現以流行音樂來說已是水準之作！奈何宣傳不足加上部份樂迷的成見，令達叔這次音樂革命又像前幾次一樣，靜靜的來靜靜的去......

去看看他們的MV :
http://www.youtube.com/watch?v=G1T9O37ydCc

貪心？

由上年年尾到現在, 不論公事私事與家事都非常繁忙，這兩年過得真不容易，希望不開心的事快點過去，惋惜過後便重新上路，人生路仍漫漫長......新年不求財，但求人人健康。

Annual Dinner Side Project

以下首拙作係諗住响Annual Dinner 前用作呼籲各同事們積極參與扮野大會的，但交貨後吾知乜事石沉大海.....唯有擺係自己地盤緬懷一番...嗚嗚

閃得太潮 （原曲：愛得太遲）

去派對 　係要玩　先有樂趣
靚爆鏡要最閃　不怕疲累
寧願輸左著草　若逃避面對　不會默許...
落力扮　扮吊燈　閃粉必噴
要刺眼　咪錫身　裝到最"行"
全身都 想變金　但無奈極重　太耐會抽筋
閃出意義　要錢咪遲
勝出的你　即刻可以有銀紙
要比足心思　來來來齊扮白痴
盛裝夠耀眼　那怕你話我低智
咪得個恨　屁股會痕
閃得出眾　獎品多到有排分
盲目地放肆　化作你愛的 E.T.
要買野掃貨最好趁早
必要趕快裝扮一次......

Puffy! Make up! Puffy!

Puffy 新近為kanebo Lavshuca化妝品系列所拍攝之造形......\@o@/

金光閃閃多美麗，金光閃閃叫人迷...

剛過去的星期五是公司的Annual Dinner, 今年的主題是“閃爍之夜Shining Night", 我們成Team人加外援組成十八銅人出陣，人人身披金光閃閃架紗兼搽金塊面,手持閃亮武器擺出各種架式, 務求與其它參賽人仕爭奪一千元現金大獎！但礙於贏左每人都係分得幾十蚊兼蝕埋材料錢的情況下，小的唯有再開一瓣，重新構思日夜趕工.....終於係大家比面下贏左。多謝晒！我扮乜？中間果個黃金戰士Lo.......

平到死先豪得起

睇既吾厭寫果個都厭既青島遊記又來過....都接近尾聲咪比下面lo.....
參觀完呢個被當地人介定為 “未去好渴望，去左好後悔“ 既嶗山後.....（早D知就乜事都無啦！） 適逢遇著在青島的最後晚餐，夫人隨即勒令一生起碼豪一次！再度殺入韓國街，找上昨晚路過的五星級韓烤，一股腦兒衝進去，不理三七廿一點了最上乘的牛肋骨，豬肉排，牛脊里，參雞湯....當然係由專人即燒即食，將今天所有戻氣盡情轉化為食慾，瘋狂掠奪一輪拎定一疊人仔準備同你死過既時候....."多謝二佰七十三“
車！！！！！有幾豪呀又...

四隻腳係乜傢伙？睇真D, 係駱駝...

太清宮的駱駝...

只要有恆心，自制機械人

一位來自荷蘭的奇人Mark Ho，花了兩年時間學習金屬加工技術，再用六年創制了這個43cm高，6公斤重以青銅及鋼鑄造的人偶：ZOHOARTFORM No.1。全身共920個關節，可造出人類大部份甚至過之的動作！呢位仁兄仲話下次用五個月就可以完成一個，死未！