Day3:原來第二日仲長

26-4-09 格爾木--西大灘4200m
晨早八點幾起身等召集，今日要到4200m嘅西大灘作高度適應。但係時間一分一秒咁過去，都無任何行動跡像，昨天遇見嘅隊員一個都見唔到，所有登山辦嘅人都消失無蹤。就連對面房自駕一行八人都準備出發。成間賓館鬼影都無隻唯有搵經理求救，希望唔係乜嘢世紀大騙局，如果係就真係太過勞師動眾舟車勞頓山長水又遠，第時警訊要拍番案件重演就太過浪費納稅人嘅血汗...不過好彩，經一輪擾攘，好明顯係接載我哋條友唔知醒，裙拉褲甩即刻上車撇啦喂！
等到下午終於可以上路，車程兩粒鐘到西大灘


今次要响呢間食店磨一日


自駕的富貴兵團亦已到達


屋外的昆侖山脈，但因刮起沙塵暴而不能外出走走


青藏地區多靠這種炭爐取暖兼煲水，有別於國內其他城市的煤爐


後園設有大鑊收電視，但卻不設廁所


美其名適應高度，實情係終日你眼望我眼...


適應高反除咗你眼望我眼之外就係要不斷大量飲水...


同埋唔好有太大動作


晚飯其實都無乜胃口食


傍晚到屋外慢行，適應一下環境


今晚就响食店隔籬房仔過夜，班大陸同胞未瞓就吹水叫囂勁煲煙，瞓著就勁扯鼻鼾，加上高反頭痛，成晚眼光光

Day2:點解一日可以咁長

25-4-09 西寧--格爾木 2800m
西寧到格爾木係條起好幾十年嘅青藏鐵路第一期，而格爾木呢個城市都係因為車站而崛起，以工業為主，與其他主要城市相比就顯得較為荒蕪。
今次青海登山辦召集嘅地方就係响格爾木嘅金地賓館。
算幾好瞓嘅十二小時臥舖火車


呢盒soyjoy係旅程中嘅重要口糧


到達格爾木車站，天空灰灰的能見度很低，若果天清氣爽時會見到昆侖山脈


早上10:00左右嚟到金地賓館報到，出面成條banner歡迎我哋呢班水魚，幾威呀！


入面泊滿多部救急車輛，令人有放心晒嘅感覺！(不過好似唔關我哋事)


報到，交錢，檢查裝備後就無嘢好做，要等聽日先出發...影吓隨街行嘅走地雞先~



再影吓無得隨街行嘅藏狗先


這是格爾木附近的察爾汗鹽湖網上風景照；察爾汗鹽湖是青海最大的鹽湖，湖中形態各異的鹽晶柱鬼斧神工。見大把時間便顧的士前往。120人仔加10蚊路費


這段個多小時畢直嘅青藏公路令司機叔叔打瞌睡...



臨近察爾汗鹽湖先見到噴出毒煙嘅核電廠...


再見到採探船貪婪地搜挖鹽湖


為挖掘湖中礦物"鉀肥"至稀巴爛嘅湖床，毒塵四處飄揚，都係溜之大吉

出番嚟市中心嘅一個公園，全市人民嘅消閒場所


仲有水上單車玩...


D設施九流流，都係去食嘢最實際


串燒羊脾羊肝一蚊人仔


返到賓館樓下條細路


係賓館坐坐下又肚餓，落去食個清真名菜"大盤雞"---咪就係用個大盤裝住D雞，土豆同雜菜咁煮囉，食完都係八點幾...早D瞓啦唯有

Day1: 無咩多係時間多

24-4-09 廣州--西寧
今朝六點鐘左右就起身趕搭機場大巴，好彩擒晚仲守得住個尾門，上車再瞓過...
四個多小時嘅機程，途經西安企咗陣，就嚟到青藏鐵路第一站：西寧

由於青海高原有大量回族人，所以清真食物同川菜都成為日後嘅主食(清真牛肉麵係接近無乜牛肉嘅淨麵)


老闆娘好專心咁...午睡


時間尚早，遊吓巴士河先啦，呢度D巴士真係會停車熄匙喎


去到一個叫虎台嘅公園，有對妺子响度登斜坡仔，一個健步如飛，一個驚到死，係時候伸出援手


由於距離晚上十點四十五分嘅臥舖車真係有太多時間，唯有去食個火鍋磨下鐘...呢間嘢生意相當紅火，要等番粒鐘先有得食，都係105人仔


飲飲吓啤酒比服務員倒咗D茶落去...點呀！見過酒杯同茶杯係點嘅未呀

Day0: 千年修得同共寢...啋！

23-4-09 香港--廣州
由於第日晨咁早要喺廣州飛西寧，所以放工就孭住一家大細上去住番晚，但係適逢廣交會期間，住房都比較吃緊。之不過都係瞓果幾粒鐘咁，所以間房需然一打開門就係張疑似單人床嘅雙人床，無窗無冷氣得把風扇兩條麻甩佬都要將就吓纏綿住先...不過對比往後嘅旅途，呢度都算幾舒服㗎嘞！
背囊放返落地下就門都爭D關唔埋...盛惠100蚊晚

得咗！

由最初被國內同胞看淡到第一批登頂...14人去僅4人成功...算為自己爭番口氣！

遊記隨後送上。

GO! 高! 再上!

23/4> 放工直奔廣州過番晚...希望唔使OT啦！

24/4> 晨早廣州機往青海--西寧 (2800m)，
再轉鐵路往格爾木與青海登山辦聯系，檢查個人裝備

25/4> 高山反應都嚟唔切適應，就要乘車到西大灘，
進行登山技巧講解(4200m)

26/4> 乘車進入大本營接受登山器械操作訓練，
雖然個人仲未好清醒(5040m)

27/4> 渾渾噩噩中繼續訓練下先...(5300m)

28/4> 負重徒步往C1，進駐高山營地...最痛苦應該係呢日(5600)

29/4> 天氣及身體壯況許可下分批攻頂(----6178m)
...成數有幾高，各安天命

30/4> 全員下撤回格爾木...咪阻住第二隊得㗎！

係咪急咗D咁呢，雖則我趕住返工...

肉酸峰

每次喺youtube番看無記嘅"勇闖玉珠峰"都覺得班友肉麻嘔心又造作...係！我知高山反應係好難受，我都知你哋班大帝係比陳總迫嘅情非得已。我都知D懶勵志說話同辛苦到露晒骨嘅表情係為咗加強戲味嚟掩飾日日等行山其實好無聊...我都知你哋收咗贊助唔企出嚟晒下D裝備交唔到差...呢D咁唔負責任嘅批評，喺一個月前响我心中仲係成立嘅，之不過到咗今個星期尾，當我企係响5000m玉珠峰基地營眺望6178m嘅峰頂時，我諗我會比佢哋更肉麻嘔心同造作，辛苦嘅表情何止露晒骨，直情反晒出嚟比大家欣賞添呀！

我想要個四次元百寶袋呀~叮噹！

一個 -20度國產黑芯綿睡袋已佔去70L背囊泰半位置，還有衝鋒衣，衝鋒衣內膽，羽絨，雪褲，地蓆，雪套，羊毛襪，登山厚手套，冷熱水壼備用衫褲鞋襪帽攝影器材頭燈電筒梳洗餐具藥物登山杖......呢次大劑！

抱佛腳

為應付月尾的高原登山計劃，近幾星期都到城門水塘操山，由第一次"撻番著副偈"抽筋斷氣扯晒蝦；到一口氣不休息直搗針山草山大帽山，雖則進步非常明顯，但卻伴隨著雙膝舊患復發的隱憂...時間緊迫要加強操練難度又怕出師未捷膝先死，諗諗下都係攤抖吓聽天由命把啦~

難耐

依波路

被懷疑打假波的甲組球隊於護級生死戰絕地反擊，以勝利換取信任，以行動粉碎流言！
係囉...呃咗球迷成季都搵落唔少，臨尾護級唔認真，出年降咗班上面D賭波集團仲受你玩咩！

閒逛

每個月都要到訪一次以上的深水埗，必食劉森記！記住要去桂林街的舊檔，風味與人情味俱在！
吃完無敵蝦子麵就去抓貓貓！



牠是隔隣糖水舖的貓，很爛玩





福榮街玩具舖見親都總是在午睡的店員