Day6:乜行極都唔完咁㗎~

29-4-09 上午
C1--玉珠峰頂(6178m)
昨晚三條大漢同三個大包包攝咗喺個塞唔落三個人嘅三人營度過咗半晚，响清晨4:30就吹定雞坐起身等攻頂，由於要等天氣較穩定先可以出發，(至於點睇邊個決定就佢哋先知)所以坐咗起身都係得個等字！由滿心期待週身是勁等到雙眼半合到轉番入睡袋大覺瞓...終於响7:30一聲令下倒瀉蘿蟹收拾裝備拿拿聲出發！早餐？大家都無咗呢件事啦~
快快趣著安全坐帶，穿好高山靴，套上冰爪及雪套，帶齊上升器，冰鎬，相機等，仲要著多件羽絨外套...GO!GO!GO!

咪以為好近幾步路，呢度上去要又唔知要玩幾耐！


排好隊一個跟一個...點解得番四個？因為友人不慎病倒，失卻氣力攀登這最後的路程



頭段都仲有D碎石比大家休息吓


之後多數都係D咁平滑嘅冰面，企定都難，咪話坐


所以繩索同上升器係時候出動！




真係行極都唔到頂，明明就好似係眼前咁...無計，行得四五步就要回氣，無得急


撞你個鬼，教練們唔怕無氣抖最怕無煙抽


我就想飲啖水，不過淨係得思樂冰...


e...乜突然間太陽離我咁近...


原來經過五小時嘅煎熬，終於都到咗頂峰，即刻攞支旗嚟扯吓先！


我哋上嚟嘅係平民路線：南坡，身後嘅北坡更為凶險



另一邊嘅鐵塔好多人都想過去，但係好多人都唔比你過去


呢度地方淺窄，坐一陣就要離開留個位比上緊嚟嘅隊員


其實上到頂果煞那都無乜嘢諗，淨係覺得好肚餓同埋終於捱完唔使呆等多一日...嗰D有關思考人生處世大道理生命滿希望努力向上積極生存意義嘅心聲，都係留番比無線D編劇度掂佢啦！
未完㗎！未完㗎！仲有下山報告...

Day5:慢步人生路

28-4-09 下午
玉珠峰大本營--C1 (5600m)
重裝上陣究竟要帶乜？淨係綿胎咁大嘅睡袋都用咗70L背囊三分一，另加羽絨外套一件就得番一半位。(其實睡袋係可以再壓縮得細D，不過淨係將佢捲好都扯晒大蝦，莫講話要用畢生吃奶力將佢擠壓) 之後就係放埋租番嚟果堆架生，糧水，相機暖包地蓆等，為咗身體取得平衡，就分咗大小背囊前後孭，不過壞處就係前面唔係好睇到路，由其係落山就更大鑊。
要走一大段路才會到山腳


多得大哥的行山杖先至行得快咗跌得少咗


接近山腳的冰川，崔建邦响度瞓咗覺



橫越結了冰的河面時要加倍小心




過了冰川後全部都是碎石路，好易拗柴


喺香港這叫小山坡，响高原這叫攞你命三千，每行十幾步都要休息成分鐘，口水鼻涕都無力抹


上升500多米要花五小時，更接近頂峰，更冷更餓更攰...形同虛脫



紮好高山營帳後便快快迫入去煮個方便麵暖下身(真係僅限暖身，雖然肚餓但係超無胃口，食得半碗...)
處理完個麵後教練同我哋兩個港漢就迫咗喺個轉唔到身嘅三人營瞓番晚，第二朝先知原來得五位隊員上到山，與教練比率接近一比一！

Day5:邁出最沉重嘅步伐

28-4-09 上午
玉珠峰大本營(5100m)
昨晚頭痛依舊，斷斷續續都瞓到幾粒鐘，今朝8:00起身食早餐，不過食食吓終於按奈唔住連日以嚟嘅反胃感，飛奔到營後大口大口咁將幾日嘅食材反吐出嚟，連隨多日嘅鬱悶感都一吐千里，見到地上多咗個pizza，胃袋雖空空如也亦感到無比暢快，係時候食番個靚早餐補吓身...
餐後隨即展開登山器材使用訓練，個個都好比心機反覆練習，準備應付聽日嘅終極考驗！
早上醒來，水壼內的開水已結成冰


今朝天氣非常好，很清楚見到峰頂


終於有餐清淡嘢食吓...早餐主食係粥，麵及雞蛋，仲有牛奶


敬玉珠峰一碗粥！


穿上又硬又重的高山靴及套上冰爪


練習冰上步行

學習使用上升器；(玉珠峰攻頂中後段由於坡度大及多是平滑冰面，所以要用繩索攀登)上升器的慣性動作只能向前推進，拉後時會自動鎖死，加多一個安全快扣固定繩與人的距離，以保安全


一字排開練習，不得超越！


身後的峰頂正呼喚著我


分發上山的乾糧(預兩天滯留):方便麵，八寶粥，巧克力，餅乾，蘋果，肉乾，兩瓶蒸餾水等...太重了，只帶麵與水賭一鋪！


收拾行裝1:30pm出發，目的地是5600m的C1營地


臨行前又有一位隊員倒下...高原負重行平路都想死，仲要上山...氣都喘不過來！(上C1的強度審核亦是教練決定攻頂日的排位次序)

Day4:這麼近那麼遠

27-4-09
西大灘--玉珠峰大本營(5100m)
昨晚於毒煙房頭痛咗成晚，見天矇光不如出去方便下兼吸番啖新鮮空氣。响無乜胃口下都啜番兩啖麵條，以提供氣力作適應性步行，今次諗住行去對面山下嘅青藏鐵路軌，學下啲野生動物穿越其中...
行咗兩粒鐘返去食個飯就要準備出發，三部jeep徐徐向玉珠峰大本營前進！
行多D路，飲多D水，屙多D尿...盡快適應高反！


青藏鐵路橋躉下有很多這樣的動物通道，不至於要越軌咁危險


國營鐵路局碑石，另有很多是光纜標石，仲註明光纜無銅，咪偷！


呢幅唔係爆光過度，而係沿路刮起的沙塵，能見度是零，有無對頭車就各安天命




已進入可可西里無人區，向保護藏羚羊而殉命的索南達杰烈士致以崇高敬意！(索南達杰率領的巡山隊在嚴重缺乏資源與裝備下與盜獵者週旋，最後不幸命喪於盜獵集團槍下)


藏羚羊就見唔到，淨係有班野藏騾喺度嘆下午茶


見到啦！見到啦！呢個咪昆侖山脈最高峰--玉珠峰囉！


全祖國總之你想去嘅地方都有個共通點---買門票


終於到達5100m嘅大本營，營地並非如閣下响電視見到嘅咁大陣象，只不過係紮咗幾個軍營係度咁啫...


負20度睡袋係出場嘅時候，希望頂得住！(加幾個暖包唔少得啦梗係！)


無嘢做都可以打下麻將



又嚟適應性行軍，今次明顯更喘氣...


分配所租用嘅裝備...咁就八舊水，無佢又唔得！


呢兩架就係救命車，同想像爭好遠噃！(有部仲唔係幾撻得著)


廚房與高效能廚師，燃料係石油氣


無胃口遇上辣，咸，肥膩，勁味精，真係唔該晒，手都震埋


今日有兩位隊員出現嚴重高反，要緊急下徹！


臨瞓前係咁倚講解吓裝備應用，然後大家盡量夜D瞓，以適應高反(因為瞓著之後呼吸較淺，供氧量明顯減少)


大本營遙望玉珠峰，等我啊~~~~~~啊！