嚇死人咩！

天津黑死金屬樂團大召集，全隊徽海報入面，我諗最勁果個名係..."祭月姦屍"

進步

#超市#
嘟...
嘟...
嘟...
........
.......
嘟吾到，抺抺抺，捽捽捽...都係嘟吾到...
輸入...3...4....2...5...7...9...0...0...3...4...
嘟...
嘟...
我：...呢隻好似十蚊三件...
收銀員：係咩？等陣...
釘！釘！(㩒鐘)
收銀員：阿陳仔，幫我睇下呢樣係咪十蚊三件！
.......
......
阿陳仔：係呀，芬姐！
芬姐：吾好意思，未入電腦...
嘟...
嘟...
嘟...
嘟...
芬姐：多謝六十四個二呀！
芬姐：先生要吾要試下呢隻薯片，新返個喎！
先生：吾試。
芬姐：先生加五蚊可以換呢隻洗頭水試用裝喎。
先生：吾要。
芬姐：簽咭有95折，先生簽咭定比現金呀？
先生：現金。
芬姐：係咪用八達通呀？
先生：...都可以。
芬姐：有無"草"積分呀？
先生：吾使。
芬姐：有無"草"開大頭狗印花？
先生：無。
芬姐：先生爭幾蚊就可以多一個印花，要吾要買多少少？
先生：吾使。
芬姐：有無本超市積分咭或附屬咭？
先生：都無。
芬姐：先生今日係無膠袋日，如果要膠袋介吾介意捐兩亳？
先生：吾使袋。
芬姐：多謝支持環保！
先生：啊！
芬姐：先生找番錢, 多謝！


#街市#
六十四個二！
嗱！
多謝！

Gibson Robot Guitar

話係話Robot Guitar, 不過吾係變形金剛，而係一支內置Tuner既結他，學老死Stone話齌，都吾算係咩野高科技，只不過有無人諗到又要將佢實行je...再加上一條懶有型好似好Hi-tech既宣傳片，人稱結他教父既霆鋒吾買，自稱科技男既伊健都整番支看門口啦！







........其實我都想要，幾時出bass呀？

如果睇吾到條咁勁既片,可直接到以下連結：
http://www.youtube.com/watch?v=WetVXbYRfWk

帕妃到著

New Album:HoneyCreeper
吾......鍾意還鍾意，都係等三分一價錢既"見本盤"先買啦...

死忠！

唐朝鐵定要於年尾發片了(信住先)！由第一張"夢迴唐朝"到第二張"演義"足足相隔十年，而一直只聞樓梯响的第三張新碟至今已等了七年...Bassist張炬的逝去故然是一大打擊，Guitarist劉義君的中途單飛亦一時窒礙了團隊，幸得新Bassist顧忠的相助及始創人Guitarist郭怡廣抜刀，"演義"才得以橫空出世，但隨著郭怡廣再組樂隊"春秋"，又令團隊陷入膠著，此時劉義君的回歸，令唐朝得以重回到正軌，而另一Guitarist陳磊的加盟，與雷打不動的Vocal丁武，Drummer趙年。塑做地球其中之一隊最具霸氣樂隊：全新唐朝......咪再放我飛機嘞!

動身...?

向前難伸，移後被困；
靠左抽筋，郁右見暈；
擰側拗親，屈身撞棍；
高攀不穏，紓尊難堪；
食飽無份，餓我吾親；
走馬看燈，富貴浮雲；
進退失據，孑然一身。

不勝寒

係無神論主義既共產越南居然矗立著一個與巴西稱兄道弟既耶穌像，除左揾遊客錢之外，我諗實際意義不大。點解吾係共產最愛既一座崇拜偉大領袖思想胡志明像？據我詮釋應該係怕D遊客捐上去頂樓(頭部)時，發現胡生個腦係空既，草都無條掛...
阿耶穌都求神拜佛望越南繼續改革開放，响一個極權國家被朝拜，一個吾覺意難免會成為下一個巴米揚...

肥差一著

狗仔隊拍得咩奴Dee當眾晒腩，好明顯人氣急跌要谷肥自己以博得各路纖體公司修身合約乙份；不過吾覺意影到佢食緊煙仲登埋出lai，有損形象教壞細路就吾好啦，趕客咩...

份內事

香港越來越少正統糖水舖，多數已被Ｄ左溝右溝撈乜撈物睇見都覺得會肚痛既新派甜品舖侵食。唯有係D舊區先可以品嘗到久違了的傳統味覺，除了出晒名既西營盤源記，係廟街既又記都係一間碩果僅存的老舖。吾係度度都食到既馬碲沙呢度有得食之餘仲整得好好味，馬碲磨得很幼細碗水又吾會杰撻撻，價錢亦比較合理，食完又夠正氣。同依家幾十蚊食到一肚冰再屙花灑果D垃圾比，我不如整杯崩大碗啦！

啪獲甘

吾知點解，十個女人九個都鍾意㩒要來包野既"泡泡紙"。無聊時成卷新既都可以同你啪晒佢，可況係平時用完吾要果D。情形就如貓愛捐紙皮箱一樣，係吾使解釋既。所以乜都搞一餐既日本人就推出左“無限復活泡泡紙“！仲要係匙扣，等你去到邊都可以啪一餐，過足手癮！而隨機仲會有車聲同女人聲出現。女人聲？？.....我想㩒呀！！！

PS.成800幾日幣...貴左D喎。

企定呀喂！

Konica AF2 第一代對焦系統係物體稍為郁動下都好難中焦，令廟街麵飽舖隻貓好似內子咁好難觸摸...

變天

駕著車在加州公路黃昏看日落，泛紅的天空映照著晚霞，透過天窗迎面微風吹送......
浪漫嗎？對，未世來臨總帶點點憂怨淒滄，感性點，總能令心裡不致太難受。
南加州災難式山火，身處現場不算太接近災區的好友Clara，日光日白的無添加照片，烘烘烈焰卻教人心寒。


相片盗自http://claracheang.blogspot.com/

加拿大鑊遊-4

來到大鑊遊最後一站：滿地可唐人街。其實一個發育健全既唐人，去到第二個國家係無乜理由要去參觀D唔湯唔水既華人集散地，幸好今趟舅父醒水，帶我地行左去滿地可舊碼頭區，這個將以前碼頭一帶貨倉沿岸用地加以保留活化發展出來的休閒文娛區，正正就是我們特衰政府要學習的楷模。唔好下下用個考立名目既殼去包裝地產項目先得架！你唔係我選出來，吹你班契弟唔賬我都要鬧爆呀！

加拿大鑊遊-3

經三寶山一役，對行程沒有太大期望的我們，更不敢對下一站"小瑞士"抱有任何奢望。車程個多小時除了領隊沿途叫囂外，今次仲慌死我地未收成正果，竟在車上播放"寧波車"VCD給大家欣賞...登時全車充滿著煩人的梵音，頭頂就像套上緊箍咒一樣，只有跳車才能得到解脫。
好不容易涯到目的地，這個所謂的"小瑞士"正正就是我們特區政府最愛的把戲......一個毫無本地文化硬生生借屍還魂搬字過紙的主題公園。騙遊客的舖頭，千編一律的名店，無聊的親子活動，貴到離奇的食肆，讓一車車絡繹不絕的遊客一頭頭栽進這個搶錢陷阱。而我們唯有找個地方坐下，喝杯咖啡食件餅，草草消磨在這個加拿大"凌霄閣"的兩粒鐘。

殺出個越南

同大家遊遊下加拿大期間，內子已去完五天越南回來，大家無福消受的手信由我接收慢慢享用，係度比佢D作品大家欣賞下！打頭陣又係D細路，今次同遊既係清森限定蘋果B，大家見佢衫都吾著趕住開飯就知果度係幾咁熱啦！

加拿大灰不黑貓

呢隻貓奇奇怪怪，叫佢就會行過來比你摸，但係想抱佢就會走...走無遠再嗌又會番來比你又摸，見你想抱佢咩，又走...再叫又番來...如是者，幾條大漢加一隻怪貓就咁騰來騰去玩成朝。

加拿大鑊遊-2

扺達目的地後，抬頭但見漫山楓樹環抱，秋意盎然，翠綠的樹海中點綴著十月獨有的紅黃色彩，落葉於風中飛舞，蕩漾到此身處的三寶山寺領域......咦？間寺廟呢？放眼山谷中的平原，只見幾座簡陋的平房錯落地遍怖肆野，全是塗上了啡紅鐵銹色，其中較大的一間便是大雄寶殿！內裡昏昏暗暗的陳設了幾尊佛像，同行的師奶彷彿慢了半秒會被佛祖掌摑般，已急不及待蜂湧入內參拜。
殿外遠處零星散佈了大大小小猶如清水灣電視城道具般的觀音如來羅漢銅人佛陀等的尊像，而眾師奶亦各自找著自己的心頭好逐一拜會。場中有一個之前被領隊吹噓為充滿靈性，用作放生的仙池，也只不過是兩潭混濁的死水...於半山較遠的菩提樹坐佛，若不想步行可乘坐由僧侶駕駛的高爾夫球車，幾分鐘車程位位約港幣四十大元，收錢的僧侶是見不到眼的，只見牙。
在這裡被困到中午，終於等到享用齋菜的時間，眾人走落一平房的地牢，場中間是一條用膳的長枱，長枱盡頭是僅可容納幾個尼姑的"廚房"，與心目中筵開八席的場面真有天淵之別，只見眾善信手持齋券排隊領取由尼姑預先分發好的......飯盒？？心裡倒抽了一口涼氣，而這口涼氣亦因嘴饞著這冰冷的飯盒而得以延續...
呢個令善信們趨之若鶩的神奇齋菜飯盒包括兩條仙足卷及一撮雜菜，另加一碗仔味精羅宋湯...頓時令平日如酒肉行屍色聲犬馬終年大吃大喝的我們來了一記當頭捧喝，讓我們的心靈及罪身大徹大悟，上了寶貴的一課，善哉！

PS: 能勾起味覺七情六慾的味精，竟然被供奉於清心無慾的三寶寺廚房中，內裡必定隱藏著一個蕩氣迴腸的故事...

天地吞喰

在屋太華的大學區附近有一個超級廣闊舒適，環境如童話般愜意漂亮的公園。裡面流淌著一條靜靜的河流，大群海鳥在河上岸邊停靠嬉戲，優哉游哉。而公園裡偌大的草坪上亦少不了有大量松鼠活動覓食，當遊人拋下果仁餅碎餵飼時，附近的海鳥便會聞風而至，爭相啄食松鼠......趕不及吃的東西。相反，當你餵飼海鳥時，跌在地上的餅碎便會引來無數松鼠出擊！噬咬海鳥......遺留的美食。場面混亂非常，噓冚過盂蘭節派米！吾怪得公園入面無乜告示奉喻遊人不要餵飼，因為無乜人敢餵...

加拿大鑊遊﹣1

到加國其中一"重頭項目"便是參與由熱情的舅父預先為我們報名的本地 tour, 此舉不但破了我們三兄弟死不跟團的毒誓，還領悟到離鄉經年的華人移民內心裡的一份哀愁...
一大清早眼還未擘大便趕上了旅遊車，經一名口水多過千重浪的領隊介紹到，今日會去三撻地方：三寶山寺、小瑞士、滿地可唐人街。三處地方三個名字聽落都知瀨野...
從ipod封閉的耳窿裡，仍隱約可聽到嗓門很大,喇叭更大的領隊介紹到三寶山寺的宏偉建築與靈心慧性奇山異水得天獨厚澤被天下的超凡地理，乃窮十多個寒暑無盡心力人力物力財力佛力法力打造的佛門奇蹟！就算行車時經過一條晨霧還未消散的河流亦被渲染為一處超然脫俗的人間仙境樂土！秀山巒溪，靈氣縈繞，實乃練功修行打坐製丹冥想，吸納天地正氣，洗脫凡塵俗垢之聖地也...
旅遊巴沿著山路疾馳逾兩小時多，終於抵達這個險被領隊浪花淹浸之地，下車前各人也買了約40港元的齋券，預備品嘗由尼姑們親自主理，聞名遐邇，滿溢著三寶山靈氣之齋菜......

松鼠從來四圍竄

對於係香港見慣隨街貓貓狗狗既我地，去到加拿大換成一地都係既松鼠，實在有點莫明驚喜。直情好似D架妹擘大對眼鼓起個腮當街大叫Kawaii!!!!!!!!不過要影佢地真係辛苦兼勁要有耐性。由其是用手動叠影對焦，真係呢頭對完果頭走左老遠！唯有果仁餅乾麵包碎盡出，好讓阿鼠多停留一時三刻。如是者，無論大街公園小草地，每日都會追逐著牠們的踨影，對當地人奇怪的眼光只好報以傻笑......如果有日係街見到有鬼佬追住Ｄ香港特產﹣MK糞青影一餐的時候，大家不用大驚小怪，最多鬼佬被人打時幫手報警好了。