牛頭角順嫂個friend~~倒數！

今日身痕再探牛下，希望喺臨近清拆前作多點記錄。可惜的是這個快將消失的香港老記憶活化石，內裡已少了很多商舖，少了很多貓咪，少了很多村民；但卻多了很多攝影痴漢，不論男女長幼，人人手執一機你又影我又影係又影唔係又影...搞到我都唔係咁好意思攞部機出嚟影，既然有咁多師兄為牛下拍遺照，咁我就梗係响度逛下食下觀賞下，慢慢感受下瀰留中的歲月情懷罷啦！

大量攝影痴漢由四方八面湧入牛下，任何物事也會被人包圍狂掃一餐...






貓貓也被大量人群嚇怕，出場率非常之少...

爛泥

最新預算案圖謀攞我哋D血汗錢津貼比老闆們用四千蚊請個大學生做下實習，如果番大陸勞動就有三千蚊兼一千萬保險咁話...D記者梗係又煞有介事咁訪問下呢班尖子棟樑睇下有乜反應；點知個個耍手擰頭話直頭廉價勞工開飯都唔夠，更惶論行街睇戲打機索K去Neway...對政府呢舊良心如狗肺般看待，寧願長眠家中做其宅男腐女都唔出去見下世面，以免被政府呢個無肉價侮辱，認真有骨氣型到痺！
早前為咗加嗰幾百蚊生果金就喺度阿支阿咗，要D老人家又跪又拜都置若罔聞。家下攞舊錢比班食塞米送佢哋上青雲路反而比人奚落；走去扶一班企都唔願企嘅阿斗，掛個西樵大餅喺佢哋條頸都話懶得舔。 反而年老失業水深火熱日捱夜捱仲要比地產商打劫嘅就唔幫唔理不聞不問...資源錯配藥石亂投至此，呢班高官真係食屎食到低低哋智。

夠僵入手

十年前與友人喺戲院睇過一齷火拼吸血鬼的西片，戲𥚃的情節多年來都無時無刻間歇浮現喺腦門，但苦於忘了戲名兼且戲𥚃的演員並不為港人熟識，在網上及店舖尋尋覓覓都係白果一粒...卻機緣下於上年歐遊最後一站英國最後一日响HMV等人的最後一刻，埋首一列列恐怖片特賣架上尋寶時，竟然就比我搜刮到呢隻苦覓多年的"VAMPIRES"！！就好似吸血鬼遇上肥美的大動脈一樣興奮莫名，一睇個封面D記憶即時湧番晒出嚟！後來於國內網站查探下得知其中文譯名為："夠僵行動"或"V字特攻隊"...香港譯名都係前者為準啦...睇怕!
呢齷戲一開場就好有西部公路片feel, 一班用上各種custom武器的教廷僱傭兵，走去墨西哥圍剿匿藏喺荒廢大宅入面嘅大批吸血鬼！可惜晚上慶功時不防鬼王尋仇報復，最終梗係不敵幾近全軍盡墨...之後就實係主角與僅餘嘅成員同鬼王來個沒完沒了，兼且順便阻止阿鬼王得到可以令佢喺日間太陽底下行動自如嘅黑十字架咁囉...不過主角好唔好彩身邊兩位同伴又不幸分別被咬，隨時變埋吸血鬼，再加一個隱藏著教廷秘密嘅新紮神父參戰，真係搞到阿主角頭都痕埋...
呢齦有別一般吸血鬼片嘅VAMPIRES...咦！咪住，導演原來係John Carpenter...月光光心慌慌，唔怪得之啦！

認真的槍認真的搶

小命擔保100%會响我有生之年重拍嘅超經典科幻片：Forbidden Planet；當年除了捧紅咗片中機械人Robby the Robot外，戲中探索隊所使用的"死光槍"，同Robby the Robot一樣，其前瞻性對後世電影及玩具均有著所向披靡的影響力！
Robby the Robot產品由認真到唔認真的可謂多如恆河沙數，但呢支咁巴閉嘅死光槍嘅唔認真產品就有好多，最泛濫的要算是金色塑膠槍身紅色透明槍頭的火石槍，是兒時指定裝備，而認真的就睇怕只此一支號稱超高品質世界水準嘅一比一仿真槍...索價十幾萬日圓限推50支，要訂購都要同支槍一樣認真...Ｄ考慮下先好。

大隱隱於市

每次喺彌敦道恆豐對面等車，都會企咗喺賓館林立嘅北京酒樓下面，各式賓館招牌隱含一條幽幽小樓梯帶嚟無限暇思，每每令人有試菜的衝動...

幾十年的舊樓，裝修的裝修，改建的改建，維修的維修，唯獨不變的就是北京酒樓



主打是老京菜片皮鴨，水準不俗，但少了在閣下面前即片的視覺享受



手撕雞很惹味，吃套餐記住加錢升格



賽螃蟹做得非常爽滑，比坊間食肆出色何止一班



小籠包有點令人失望，棄蒸籠改用碟上已經要扣分，加上皮確實太厚...



銅鎉豆腐亦是必叫佳作，別處很難吃得到




內裡的裝璜實實在在就是荷里活電影裡的China town酒樓格局



大哥送的銀河旋風也來摻一口

城裡的月光

10-02-09 12:00am的月色

元宵佳節終於可以喺一堆零IQ爛gag題裡透透氣，聽番D真係有紋有路嘅燈謎，連家陣城裡的目光--天氣小姐黃婉曼都忍唔住要問大家乜嘢係"彎月伴三星"...(估一個字) 喎~

世上本無事 庸人自擾之

特衰政府呢班庸官食塞米，最鐘意攞舊石頭揼下自己隻腳。新正頭又懶咩咁走去求支籤，一邊摧毀否定傳統文化瞎搞建設，呢頭過年又扮與民同樂入鄉隨俗。搞到車公都睇唔過眼整支下籤大家嘆下！明明導人迷信出咗事就叫人唔好盡信。不過話時話阿車公呢劑真係非常靈驗，直情古人智慧今世盡發揮，嚇到班契弟屎忽窿都無肉！

君不須防人不肖---橫竪日日被人屌
眼前鬼卒皆為妖---請埋班友得啖笑
秦王徒把長城築---有事就把龜頭縮
禍去禍來因自招---又要比人掟香蕉

亞洲電視 旺仔台

每朝開台由真人版旺仔總經理同大家喊番聲"旺！旺！"，為每天煩惱作好開始
＊由旺總主理"至旺飯局"現正火速籌拍中


好一聲"鑊"氣十足 ! 旺總英明！



早晨節目由身材同小饅頭很匹配的美眉領跳"旺仔小饅頭"晨操，包你起來就是不一樣！



成日都輸唔同你玩嘅"旺旺黑白配"帶比你財經透視：股為君開



有本事令職業女性個口郁唔停，好多老闆見到都忍唔住要買多幾包看門口嘅
"旺仔牛奶糖"，為一樣停唔到口嘅維園阿伯送上：城市亂彈



OL力挺"旺旺泡芙"插播：午姦小罪



用心製作嘔心感受，"旺旺厚燒海苔"送上烹飪秘笈：今晚食乜餸大結局--今晚做得痛



一家噴火㷫烚烚嘅"旺旺燒米餅"劇場：烈火雄心之怕辣就食原味啦



無論睇定飲都包你O晒咀嘅"O泡果奶"帶嚟最新育嬰知訊：愛抱嗰對奶



專教你新食法嘅"旺旺咖啡凍"：年青人時間--今集教你如何奶伴侶



一定會令觀眾生氣嘅"旺旺泡泡果凍"熱播：勁𤓓推介MV--真的會生氣！



日日都蝕一甩嘅旺旺QQ糖冠名兒童節目：天線得得B國語版--襟望秘B



跑足七日先完成營養目標嘅"旺仔牛奶"特約：體育快訊--摩打馬拉松



唔好喺戲院食，留番喺屋企睇亞視先食嘅"旺旺小小酥"贊助大電影：盲劍客決鬥快劍俠



由呻吟到伸手入電視嘅頭㧜熟女主持，集恐怖與情色於一身。"旺旺雪餅"呈獻深宵成人場：Oh...WA!...MMM...YA!



收台壓軸，"旺旺仙貝"元祖級代言人--台長小彬彬：每日一詞

狗急楔牆

兩座祠堂分別保佑了兩個宗族，兩個宗族卻同時因兩座祠堂，而為先祖及自身添上罪孽；小狗於狹隘的牆罅中苦忍四天著實不容易，可人們狹隘的心胸要放進憐憫原來更難。為看不見的利而放棄行眼前的善，為怕擔不起的果而種下卸不掉的孽。祠堂小牆洞易開，難以推倒的只是心中一堵道德圍牆；圍村歷史久遠，卻不如村民思想迂腐陳舊。小狗今天縱然有幸救活，難免將來會成為寒冬下爐灶上瓦窩內木筷中胃袋裡的香肉呢。

送你一對翼

上年的賀年特備節目："希有淫照"伴隨著經濟假復甦全民皆股開開心心熱鬧非常...
今年序幕卻是以全民憤慨的酒後奪命駕駛挾著金融海嘯悲掩全城。

早上雞叫人，晚上人叫雞；世事就是如廝無常反覆。否極泰來，車到山前終會有路的。恭喜發財！

雞雞的平溪

由菁桐回程一個站仔到平溪，只需十分鐘左右。月台與菁桐的相比，卻是古早味欠奉。下車後照舊先走到老街一逛，但比起菁桐的看頭更少，唯一賣點就是那條高架於民居上的路軌。需然不用二十分鐘就走完老街一圈，但都要乾等一小時的回程車返台北，幸好月台附近有貓貓出沒，逗逗牠們玩玩，時間都易過啲！
平溪的小月台真的平平無奇




冒死走到架空路軌上的英姿！





這兒勝在貓多，令人樂透



時近黃昏，咁就玩咗日



整日沒什麼到肚，晚上回台北後就歎番餐任食網燒，每人都係HK140連酒水