圍城

明報標題話油尖旺密不透風 4區將窒息；專家稱3年後隨時熱2度 促盡快急救
.
.
.
港英政府千辛萬苦清拆了九龍城寨，特區政府卻在全港苦心經營了一個又一個寨城...從前是窮人三不管，現在是發展商無王管。以前是低下階層新移民，家下是高高在上有錢人。官商勾結大開綠燈，連隔音緩衝區都可以起樓住人。區區上升幾度氣溫，奈何不了只管搶錢的閹人，最多開大啲冷氣先瞓。

跟蹤

無事忙

本週二乃係無車日，運輸處煞有介事宣揚當日交通工具會全面加強服務，即係話路面上會更多排放廢氣加熱氣嘅大巴，更多橫衝直撞嘅小巴...但就幾乎肯定唔會少咗人揸車...大家唔係咁天真以為會全城熱烈和應呀!??响呢個自私自利嘅都市，唔罰番你一個幾亳都唔帶個袋出街買嘢，更可況叫啲既得利益者揸少陣呠呠車歎少陣冷氣？！到時得三幾個參與，你就派幾十部車救市，呢啲咪正宗好心做壞事！

正義女神真係用石彫

律師會最近嫌錢少拒接法援個案，令升斗市民空有冤卻無路訴，真係法律面前窮人含忍！
好彩嘅係無錢時，分分鐘仲要貼錢嘅無國界醫生無照樣帶頭起義搞屎棍；無錢打官司最多坐監等假釋，有病無人醫就真係臥床等彌留......
真心要向喺祖國受盡打壓都不辭勞苦，為弱勢站出來的維權律師致以崇高敬意！香港嗰班只懂宣揚有錢有公理嘅飲紅酒食屎西裝狗，祝你哋好似同為大律師嘅陳水扁一樣咁好下場！

何價

營營役役大半生的低下階層勞苦大眾，為家人為下一代為老來唔使太難奈，平平穩穩緊夠糊口也得來不易，要有點積蓄應付頭暈身㷫更談何容易，下半生要再掙一百萬睇怕要靠六合彩先可以！六位工友今天得到了人生最大筆假期加班補水，明天也不用再為生活為工作為家人為口奔馳，勞碌一生沒辜負家人。是冷酷是風涼還是世情如是，事已至此死者已已，換個角度看希望大家會好過啲...

七星仔

陪住我哋呢一代老鬼長大嘅七星俠終於老來得子，就算日後保衛地球不慎戰死沙場都有仔送終時兼有盞香燈繼後！不過佢個仔嘅賣相好明顯係同七星俠出生入死好拍檔膠囊怪獸"米古拉斯"一個餅印......不過人哋又唔係咩天王歌星影帝，啲八卦嘢你咪理啦...




同場加影對頭邪惡超人，阿仔，加油呀！咪白頭人送黑頭人呀！
http://wwws.warnerbros.co.jp/ultra-legend/index.html

七月十四之怪談

牛腩撈27蚊，牛腩麵21蚊；隔離枱阿叔竟然嗌牛腩麵唔要湯...咪即係21蚊就食到牛腩撈！咁我哋兩條茂利枱上嗰兩客撈麵無啦啦要比多幾個大洋為乜...老闆娘，換番支汽水得唔得呀！？？

我要睇番周秀娜...

一向對政府啲賤價招標廣告無乜其望，但係近排有幾個不約而同地令人有O咀後久久不能復原嘅本領！呢幾件雜作嘅風格睇得出有八九成係同一間弱智廣告公司，第一件係叫人掉垃圾都要起勢跳老舞嘅"全城動投入清潔運動"；見到你地班膠友，我直情想掉部雪柜落樓！第二件咪就係"戒煙我撐你"；想靜靜哋食支煙都會突然有成班街坊彈晒出嚟，勸閣下回頭是岸又嚟載歌載舞，真係臨戒煙前嗰最後一啖就留番嚟辣你班契弟！第三件係十足宗教宣傳片嘅"家~給你力量"；竟然比"左鄰右里唔使客氣"更驚為天人，真係响家裡睇完一定充滿㧜爆電視嘅力量！而最後一件就係近排播完晚間新聞就嚟一鑊嘅"辦法總比困難多"；又嚟一班騎呢蘇大合唱，比胃仙U與你一起奮鬥更慷概激昂...

真係垃圾總比傑作多

瀉藥止肚痾

煞有介事動用一億元嚟活化全港最活嘅旺角區，整色整水大興土木嚟吸引塞滿大街小巷多得不能再多的遊客...不如搞掂好隨街滴水嘅冷氣機，執靚啲後巷疏導下人流，掃走啲阻頭阻勢嘅易拉架，殺晒嗰班自以為好型嘅好戲量，閹晒圍埋一大堆影o靚模嘅狗公，趕走成班企响條路度諗緊食飯唱K定打機嘅MK，咁咪大家行得舒服之餘又唔使見到啲核核突突兼格格不入嘅乜嘢活力波鞋街，魚樂無窮路囉！

哀我打工仔3

睇舖睇到三點幾，又係時候嘆下午茶啦喂！


𥄫下神枱位，就算無拜神雞都希望有啲麵包碎跌咗落嚟...


原來拜神真係會唔見雞，淨係有篤貓屎剩低...



仲要整到一面都係認真撞鬼！

善良之槍

一名當差33年，除咗訓練時燒過吓槍，幾近碌碌無為的警長，臨近退休才撞正三名持械偷車賊，連轟三槍例牌虛發仲要拗埋柴，賊人事敗見狀梗係多謝夾盛惠火速鳥獸散。翌日各大新聞紙頭條都集中全情奚落呢位士沙臨食長糧先嚟出洋相，又話衰收尾又老貓燒鬚，又詳述警隊支新槍幾高性能，盲嘅都射得死人，圖文並茂慌笑你唔夠...務求要老人家顏面全無，退咗休都要佢一世愧疚抬唔起頭。
我卻道天祐好人；讓警長退休後無憾的是沒有殺過一個人，腰樑挺得畢直，昂首說道沒有沾血的雙手仍能阻止罪行，淡泊一生每晚安然大覺瞓。

幫得手喎~

記得公司曾經做過一次調查會議，內容都係隨意探討一下家陣市民的生活習慣，其中一個議題是大家生活得環唔環保之類，在場機乎所有同事都套上了光環，當然沒有期望大家是盧冠廷周兆祥，但也人人說得大體，又下一代又溫室效應，點都會盡一點綿力！若果戈爾在場，肯定會讚賞表揚頒個奬！我就冷笑一下隨便亂嗡將問題輕輕帶過，因為以我這個無聊人所觀察...
1.明明各部門都有廢紙回收筒，但廢紙依然恰如其份地躺在廢紙箱；
2.加班鬼殺咁嘈要book番幾粒鐘冷氣，其實想涼啲最好就係慳番啖氣；
3.人收工電腦依然長開工，年尾真係要比部電腦多啲花紅；
4.食飯開會見客枱燈收音機依然要為主人緊守崗位，不得半點鬆懈但係唔知點解；
5.廁所抺手紙每次狂扯三四張，抺埋身都得何況只係閣下隻手濕；
6.各大小會議室見燈就盡開，散會時大家就唔熄燈盡快離開；
7.買外賣膠刀叉匙袋盒同膠盒袋匙叉刀，多到唔知點數；
其實仲有仲有，不過再講落去我會好內疚。

如果我同大家平時嘅所作所為是略盡綿力的話，綿裡的那顆針確係拮得地球先生幾辛苦...

灰~嚡~~

鞋是穿在腳上而不是掛於咀邊，一天到黑HeHe嚡嚡的你，請將鞋放下穿好再往前走，感覺踏實一點，路自然好走一點，希望可以令閣下抱怨少一點

戲水

近排飲品公司一招自動凝冰化學糖水，引起街頭巷尾一陣熱話。個個手揸一樽無不嘖嘖稱奇，搞到曹宏威博士出鏡率大增，其科技救港言論又一次成為城中重要議題...今天適逢遇著化學糖水公司內部高層的爪牙，遂打聽一下這個比量子加速器更惹學生興趣的科學題目，經她洋洋數十字就講完成件事，換嚟一個"唓~"字！搞到咁大件事，原來都係好鬼死易...放諸現實，一個人由熱情變冷漠，都係好容易，唯一不同就是你永遠唔知究竟發生過乜事...

貓貓愛美麗

前望


後望


左又望


咁多人望，都係沖番個靚涼化番個靚𥺁, 先對得起各位街坊...

玩具日09

今年玩具日緊隨書展動漫展食品展電腦展，啲人使到無晒錢之後，入場人數唔使警方有心報細數都知係歴年新低，縱有過埠日藉女優撐吓場，都係唔見特別擁躍，加上宣傳勁少重要擺九展六樓，無咗班街客真係少好多人流...


幪面超人女優：栗原瞳小姐；簽名握手加合照盛惠一佰大元！我哋呢啲有背景人仕梗係免費招待！客串做幾分鐘宅男...

邊緣特訓

被太陽燒得火燙的不銹鋼滑梯，隨時失足跌個頭破血流的鋼架，可以跳鞦甚至會反鞦的鐵鍊韆鞦，高速運轉至星斗滿天的氹氹轉，會夾到腳的搖搖板，狗屎多過沙的沙池，要憑實力猜回來的石屎球枱...造就了我們這打甩門牙帶血吞的X世代！至於玩塑膠組合遊樂安全套裝成長的Y世代，難免都係膠膠哋，唔識腳踏實地...過度保護磨滅堅強意志，遇上逆境實會出事。

誰欠誰

任何地方搞文化舊物地區環境人文保育，從來都是當地政府責無旁貸的天職，只有與商賈勾結同心同體的香港政府，千萬個不願意保留地方色彩之餘，亦努力將週遭商場化屏風化冷漠化的同時，更不容民間插手干預本應就是市民的生活空間...假諮詢整色整水機製一大籮，空口白話最後都係豪宅一大座！真正行動落手落腳對抗的市民卻偏要惹禍...皇后碼頭保育衛士被追收"特價"廿七萬訴訟費，政府殺雞警猴無錯手。窮要與富鬥，兼要與官爭；香港地要做自己相信的事情，既要富有，又要同高官好老友！

你擺酒我請客

青少年吸毒，納稅人要比錢佢哋戒毒；
有人犯事，我哋要夾錢請佢哋食皇家飯；
按此推論，巴士公司用廢氣大巴毒害途人，我哋的確有責任出錢比財閥將設施更生，將生意做得更大；
想電力公司唔用煤毒煙熏港人，市民當然有義務出錢換取清潔發電源，加電費不用理會勞什子的機制。
香港政府能有一貫如此高思維，全因他們也深受這制度的恩惠~ 只懂做錯事的狗官們，市民依然要每個月奉上天價狗糧，填飽佢哋副胃腸。

回眸

做人不要向後望~好事留心中，壞事逝似風；
做貓不妨回頭望~拍照輕輕鬆，讓我早收工。