桂林山水夾硬嚟

今個星期有一日補假，唔好嘥！夾番個六同日，星期五收工即飛桂林玩足三日三夜！落點是桂林，但目標是陽朔及沿途的古鎮。桂林被開發得體無完膚，甚至有道著名的景點已被重重圍擋，焗住大家要附費觀賞。小學時教科書上的象鼻山駱駝峰七彩射燈七星岩真係少個崩都唔使旨意瞄一眼！被市政府包銷的漓江遊更加食水深，更不用說張大導的印象﹣劉三姐歌舞秀...
不過志不在此亦無謂介意，但求比我舒舒服服行行企企吃吃喝喝，看別人不看賞他人不賞，唔好比人咿咿哦哦就已經當中咗奬！

乾物類

家中防潮柜無啦啦失靈，濕度計長期劍指臨界點，為保柜內神器能繼續保持乾爽正常運作免受霉濕感染，十萬火急下出城重賞徵召新柜一個頂替，以免血本無歸。老遠托咗番嚟同舊嘅換位一睇......原來係鬆咗插制！都怪一時情急曾sir講乜都唔記得；凡係電器有親頭暈身㷫梗要檢查電源是否正常就為之基本維修第一步！老貓故然燒了鬚，仲要多咗一個防潮柜响屋企獻世，唯有趁早入定啲海味乾貨，橫掂有個好位存放恒溫保鮮又乾爽！就唔使臨過年先同人迫年貨買貴餸啦！

十月圍塘

鮎魚果然超強，令打工仔超強期待亦超強失望，除令李氏力場更聲名大噪（或是聲名狼藉）外，似乎比一般颱風仔更無睇頭...天文台依然都係淨識靠嚇，一時不能小覷一時又話會番轉頭，原來最後都係路過就走，唔通阿鮎魚san真係驚咗我哋獨有嘅屏風樓，會比佢圍困一團有入無走，迫住要買番間長期居留？？

休息為要走更遠路

今年公司提早進入搏殺期，漫漫長路晚晚長夜要與同事及客戶週旋。希望仍有機會間歇地計劃一些國內短線遊，叉足電又再上路，咪淨係响度日做夜做...

雷聲大

同事們call咗老麥嘅新產品推廣New York Taxi載你去食包服務，以為有幾霸氣，原來只係一架Corolla改裝車，莫講話真正美帝福特通用雪佛蘭，就連本地原裝的士大皇冠亦將它比下去！司機唔知訂要我哋呆等幾個字不特止，所謂優惠都只不過係四個人共享一張買汽水送一個包coupon咁大把...勞師動眾搞宣傳就好心咪㩒住個荷包，請人食嘢同請人做嘢都一樣出手咁寒酸，個包有幾好食都真係無去幫襯嘅打算...

如風

第一次學人托架單車去旅行，跟隨友人走一轉廈門及福建土樓。原先是計畫到鼓浪嶼一踩的，不過到達碼頭才知整個島嶼都不准踩車，所以先踩半個廈門島後再轉戰南靖田螺坑土樓群一遊，兼住在土樓一晚四圍遊歷。雖然坐臥舖大巴依然痛苦，踩車上斜非常吃力，於馬路左穿右插偶有驚險，幸得隊友體諒扶持，老骨頭才能緊隨其後，風馳電掣地過了一個有趣不一樣的週末。

信你一成...

可持續發展委員會最近建議計畫修例，皇恩浩蕩體恤民情，容許樓宇發水面積只能發一成(以前係兩成幾！)，亦即係你買層樓比地剷商呃狗你至少一百幾十萬係可以接受政府承認法例規定；天經地義死有如辜自己攞嚟！咁係咪比人插咗欏柚一吓就唔算雞姦，比人摸一吓個胸都唔係非禮先？？唔該晒！！

大澳

每次去大澳都有少少變，今次再去一遊，就是大大變！吉慶路上多了優皮民宿一間，屋主將平房全新粉飾帶點歐陸藝術風，下層是cafe, 讓旅客除了非正途宿位以外有更正統選擇，想住標準房450／豪華間650大洋一晚就自行定奪。而隨之改變的是本土小食由茶稞煨蝦乾豆腐花紫貝天葵外，即炸沙翁怪異薄餅煎薄罉也來參與這趟混水，加上海景咖啡廳等優閑配套，怎能說靜靜的漁村沒有靜靜的起革命。沒有政府地剷商干預的變遷也算是一個社區因時制宜，總不能因個人感情而阻人搵食，只能盼望這些改變是一個正面，幫助大澳保留舊有一面亦多一點新鮮，而不是無恥政棍的假大空摧城拔寨式的所謂加強旅遊業活化低B概念。



還沒有變的是貓依然痴纏和蓮香老闆娘的面...

樓上雅座

自北角祥利與中環蛇竇等較出名的舊式茶餐廳相繼結業後，佔有唐樓兩層的茶餐廳／冰室越是買少見少。這間屹立於砵蘭街的便更見珍貴...由其是樓上還養了貓呢...

安居？

鎮守屋苑附近多年的貓大哥，深得坊眾們歡迎，愛親近人的他逗得大人細路不亦樂乎，街坊們有的叫他黑仔，又或者是小黑，我們愛叫他小黑黑；但自從屋苑番新過兼轉以鐵腕管理業戶寵物後，小黑黑便隨即消失於街坊的視線中...已有好幾個月不知所蹤，樂觀點的想法是他到了另一個地盤生活好食好住不再留戀這個冷血城池，其它假設的景況不用亦不願再去猜測。正經事如冷氣機滴水困擾屋苑多年總是搞個沒完沒了一鑊泡，只懂向弱小趕盡殺絕立即見效快過打針，下個月還要調整管理費百物騰貴，花錢養埋呢班食塞米真係把鬼！

中日鬧不和

倭寇想玩火，點知玩大咗...
鬥正面，國力經濟軍備太空競技樣樣都唔夠支那嚟！
鬥負面，自由民主食物安全踐踏人權依然唔夠支那威......
放人啦日本仔！

香港一定得

比多少少錢加啲社工，家庭問題易解決咗，大學生又易搵工咗，城市都無咁悲情啲...
比多少少錢加啲醫療設備，長期病患排隊少咗，輪候快咗，社會負擔少咗啲...
比多少少錢加啲復康設施，精神病患可以24小時睇病，對投入日間工作都易啲，融入社會都快啲...
比多少少錢加啲幫手，有人引導邊青入正途，青少年犯罪率都低番啲，毒品都賣少啲...
比多少少錢加啲津貼，貧苦學生買本書都易啲，上學都可以有尊嚴一啲...
比多少少錢加啲生菓金，老人家生活壓力都細啲，佢啲仔女生活壓力又細番啲啲...
比多少少錢加啲人手，管理郊區好啲，唔使搞到無錢嘅偷樹有錢嘅偷偷起樓，脆弱嘅生態都可以好番啲...
比多少少錢加啲動力，推動環保工業，行業見得到前景，香港先有機會見到藍天多啲...
比多少少錢多加啲啲做好啲啲.......................

好多好多都唔使得你幾多，不過以上樣樣都係長貧難顧，又要請顧問又要資詢又要開會討論又要等通過，做咁多不如索性一鑊過！轟轟烈烈一㷛盡地，開行冷氣冚綿被！攞四百億嚟玩番轉面子工程，高官面上有金貼，懶理民望繼續跌！全民運動全城動，筋骨舒暢無肉痛！

左手捐贈右手損人

香港揸𨋢人地剷李壞事做盡但為善最樂大家都知，家陣又有新主意，就係搞咗個名為"香肛人 愛雞姦" 嘅慈善項目；呼籲全港被佢雞姦到痛不欲生嘅小市民一齊同佢老人家做好心，為佢積福積德咁話。睇得出佢確信好心真係仲有好報，你睇佢兩個孫個屎忽幾咁完整就知真有神靈！為免大慈善家騎鶴後直插地獄十八層，於今借助全港百性福心，如果大家份糧無比佢老人家旗下啲集團剝削晒仲有餐粥水食吓，咪捐得一蚊得一蚊，超渡吓呢個老好人...
阿婆話個檔口得到地剷商照顧不遺餘力，雖則身無長物，但日後一定捐咗個鎮舖大油鑊比阿李生响下面慢慢享用咁話喎！

興...亡

神戶動物園殺雞取卵，搞到熊貓興興精未盡人先亡！激到中方扎扎跳...咁又係嘅，都怪倭寇自把自為唔單番聲比支那聽，話晒我國有著幾千年經驗，要善待熊貓故然頂瓜瓜，要殘害熊類都係專家！你睇我哋啲抽熊膽液技術獨步天下，一隻抽足十幾年無花假。家吓搞到要中方專家越洋收屍，真係難為呢隻為國捐軀嘅和平大使...

啡人生活

咖啡飲到今時今日，相信同很多人一樣已不是提不提神的層面，而純綷是出於一種心癮；正是酒不醉人人自會醉，咖啡提神仍然大覺瞓之境界也。公司阿姐每朝都會沖一壼咖啡，除了頭啖飲一杯包底有剩又來一杯，下午自攜私家杯去星巴克又買細送大歎多杯。雖然與正宗咖啡愛好者的用量還有很大距離，但都自覺沒什益處，只是心癢癢止止痕而已。工作時喝的與放假閒著喝的心情又自是不一樣，工作喝的咖啡是一夥電池，放假的卻能令身心鬆弛，一面讓人精神集中，一面卻令人精神放鬆...放諸世事總有兩面，要怎看怎想怎應對都在於閣下一念。

煩音

香港地鐵係咪世上最繁忙嘅集體運輸系統我唔敢講，之不過如果話佢係世上最煩人嘅交通工具我就梗舉腳讚成！由進入大堂到出閘離開，形形式式大事小事鎖碎事溫馨提示吓吓如雷貫耳，吟噚過問米婆煩過包租婆難頂過董建華老婆。除了叫人小心車門同叫站外，十句有八句都毫無建樹只係樣樣提點扮關心親切殷勤，當正全港市民係幼稚園低B班再教育，表面好心卻只不過是免責聲明小心地滑閣下係要跣親就真係關人。站內密閉空間錄音有錄音廣播職員有職員插播助理有助理用大聲公將喉嚨嗌破！密閉空間內的密閉車廂中錄音有錄音廣播職員有職員插播助理有助理喺月台附和...加埋關門果幾吓尖叫嘟嘟聲真係食咗含笑半步釘都比佢嚇番醒；仲要兩文講足三語相對提示間隔更短更傖咄。社會進步就越覺好做唔做，人類文明咗就越見多枷鎖。究竟係乘客不懂自律定係管治只懂千篇一律？如果個個真係幾廿歲都仲係無規無矩，再苦口婆心落去都係當你同佢吹水。無謂比面不如亂世用重典，好過無時無刻都喺度鬼鍊！

掏殺

散落中環嘉咸街/結志街/卑利街等附近一帶的舊市集矮樓群，糅合中西文化及近百年的地道風味滋養，成為一個記錄漁港發展民眾真實生活的微縮景區。原是每個國家爭相保育的重要旅遊及人文產業寶貴資源...可惜沒入地剷商治港的政治陰暗面下，這種由前人開拓傳承後人努力經營的現實版清明上河圖只宜記存於每位市民的回憶中。收購計劃已全速開展，覆地番天勢所難免，除了原地矗立一貫假豪宅冷氣商場外，諷刺的是當摧毀了一個歐美日深度旅遊人熱愛的景點後，改為興建大型酒店好讓自由行入侵各名店團購IFC嘆hi-tea......街坊小店人情味不及銅臭撲鼻，搵錢要緊邊得閒同閣下講心，原來香港政府幕後黑手係阿珍!

熱血係要嚟灑嘅！！

有名有利有錢無憂米，比我35歲都想退休享清福，何況高齡65!
有啲嘢睇唔過眼就要付諸行動，戲裡戲外作風如一！由慳水慳力藍幕後期，到無無謂謂搶錢3D，無特技打甩脾嘅動作戲真係式晒微...不過龍哥話只要仲有一口氣，一於起來打底脂粉味！今次一呼百應，係雲頓同碌葛唔生性，全城動莫問劇情只要衝衝衝，拍埋你班三角褲港男合埋眼都知邊個係龍邊個係蟲！係男人就趕快去朝拜一下荷里活呢趟夕陽工業啦喂！

止禁誠

鉅記週圍有得賣，白之戀人有貨派，林珍香又賣通街，Mos burger食唔晒，度小月仲好易買，無印優衣庫要開都開晒，就連米老鼠都喺本地過街......
其實呢度會比錢買書扮嘢嘅人好少㗎咋，大路書籍有三聯商務天地，另類啲嘅有披廚溫輸不死，小道嘅咪留番比樓上書店搵啖食囉，連報紙雜誌都有便利店同報販爭；你响香港插旗，咪盞嚟得最多嘅都係啲霸住個位打幾粒鐘PSP嘅毒男腐女。HMV大變細，Tower Record執晒粒，呢度邊有文化㗎！可唔可以唔好嚟呀誠品書店...等我去寶島夜晚都仲有啲嘢做吓oY!!

樽樽樂道

樽既是空的，要裝進什麼，是閣下的決定；樽既是閣下的，要倒掉什麼，也不容旁人決定；樽不是別人的，要留下什麼，沒有別人可以決定......自己決定是什麼，自己帶走自己承受，別人幫不了手亦插不了口。