Skytree 晴空塔

既然係冇計劃行程，所以可即興前往剛於五月開幕嘅Skytree(天空樹/晴空塔)。其實於早前媒體報導嘅萬人空巷人山人海盛況，對於呢啲新屎坑多數都係避之則吉，之不過又真係可以成日都好得閒，咁就一於去挑吓機，起碼返到嚟可以响好多未去過嘅人面前吹噓一下嘛...據情報顯示，到淺草站會有一條新設嘅專線可以直達Skytree平台，但係就要比多百幾日幣轉車，而事實我哋都係咁樣去到，之不過原來連接Skytree底部的押上站更為方便，只需於涉谷站坐地下鐵半藏門線約半小時便到達，仲省卻於JR山手線往銀座線的轉車路程。Skytree大致可分三個部份遊覽，最重要當然係高634m傲親全球嘅主體思想塔，其次就係水族館同好多層嘅血拼魔。要攀上Skytree，最好早啲來到先去領取整理券，然後於整理券上指定時間內回來排隊買票入場。今次其實排得比預期時間短，大概個半小時就可以放低2000yen上樓，如果再要上高啲嘅天望迴廊就要再放低1000yen。其實去到咁上下高度望落嚟都唔知有咩分別，不過排咗咁耐隊又唔爭在企多20分鐘比埋嗰1000yen，當然如果知道係無乜料到就真係可以慳番！可以留番啲時間同人爭手信。响血拼魔大樓無錯係有好多食肆，之不過响無窮盡嘅遊人壓力下要搵個位食飯並唔係易事，醒目仔如我緊係離開晴空塔範圍到週邊街道搵食，飽餐後再返去同佢死過...

去完日本Skytree，搵日要造訪廣東小蠻腰一決高下

由淺草開過來的專列

暫時未見太多自由行同港團，所以排隊都好井然

每個方位現場都有註文介紹，不過影完番嚟就好似張張都差唔多咁...

比多1000yen嘅天望迴廊同下層最大分別係少啲人咁囉

俯瞰鐵路站

上到嚟有好多影相服務，呢位阿姐就係影番下一層嘅閣下

上到咁高其實飲品唔算貴，問題係搵唔搵到位

強化玻璃底面積好細，睇怕好難承受日後自由行响上面暴跳

遊人可到的最高點，其實有部份高度係靠最頂條天線搭夠

都電荒川線

於JR大塚站下車，可直接轉搭有百年歷史，東京市內僅存的都電荒川線路面電車。400yen的One day pass最適合要上上落落的觀光客，坐上電車一口氣到達早稻田尾站正式開始行程。我們第一個選擇下車的是鬼子母神社，這是一座細小但歷史久遠的廟宇，走一轉不用花很多時間，也挺舒服的。之後的庚申塚站附近有一條舊商店街，沒有時間的其實可以略過。飛鳥山公園經過時發現有吊車，下次再去考證一下...最期待的荒川車庫原來不是公開參觀的，只能在被驅趕前快快拍下照片。接下來的荒川遊園地是一個小小的遊樂場，是附近居民消閒的好去處，但係對遠道而來的遊客便不大吸引。最後來到總站三之輪橋，下車後可到商店街逛逛，或可到舊式咖啡廳坐坐懷舊一番。早一點來玩一轉荒川線，下午便可坐電車一直殺回大塚JR站轉車繼續血拼去，於同一個東京時空穿梭於平成與昭和年代，感覺有別於一般的遊日行程。

早稻田站隔離當然係早稻田大學

最新式與懷舊的電車同在路上行駛

鬼子母神社的小賣部已經營到第十七代，店主是愛貓之人

荒川車庫竄入去影相就要快手

荒川遊園地

運轉席

三之輪的咖啡廳陳設著有關的展品

日程

今次九天的日本之旅扣除兩天的行富士山加頭尾兩日，沒有計劃的日子共有五天，以為會無所事事卒之又係行色匆匆。先是探訪友人的友人再被安排鄉郊遊，繼而整天漫遊路面電車荒川線；然後又晨早排隊去參觀新屎坑Skytree，晚上又約了駐日的舊同事飲酒作樂，隨後又到日本總公司參觀；還有觀看了兩場花火大會及參與廟會，加上本來預算要去購物的地方...一下子將行程擠得滿滿的，不論時間或金錢也不大見洗。就連離開往機場也是連跑帶跳裙拉褲甩...反而最悠閑是上富士山的兩天，因為登山路線超乎想像的擁擠，行得最慢的就在這裡。

富士山下

籌備經年...其實係友人籌備，我只作參與的富士山登頂活動即將展開。以富士山的開發及受歡迎程度，如果不是下雨的話照理是應該比神山更好行，但不幸地於早前嚴重拗柴未癒，隨不能趕及十足狀態外更令熱身操山課欠奉，唯靠以前的經驗慢慢一步一步完成。而上山前還有幾天在東京血拼的日子，酷熱下於街頭踱步，就當成是個小小操練...可能分分鐘辛苦過行山。

謝停風

失驚無神嚟個超勁颱風，令外出開會嘅我唔使返公司直接可以仆返屋企。之但係咁又並唔會話交通暢順過人，因為比閣下更早收工的人依然多的是。而且一早出外只是更早面對風雨，因為親身估計下午兩三點嘅風力其實已達八號級數，之但係個市一日未收天文台係唔會咁輕率將更高風球高懸，情願吹死一兩件蟻民都唔好令商賈們食少隻鮑魚。到風力大得足可將人吹飛時才無奈宣布放行。一窩瘋的勞動人口為著少眾福址唯有默默忍受一下各大小公交的長長人龍，招牌路牌大樹垃圾筒令路上行人欲斷魂。回家前又要為晚飯張羅，搶購各類食材最好當然係百佳！歸心似箭失去平日精明眼的市民沒閑對清楚蠱惑機單收據，又或選購買兩件貴過買一件的特價貨，過期食品假鱈魚不在話下。一個風球將超市霸權假貨死貨過期貨一掃而空！急得如熱窩上的螞蟻為了一餐安樂茶飯也比平日大方，只求齊齊整整一家人平平安安...而已。

最膠機密

佢：喂！請問係咪塵生呀？ 我：邊位？ 佢：咁你係咪塵生呀？ 我：咁你又係邊位呀？ 佢：你係咪塵生呀？你要係塵生我先可以講咩事... 我：咁你唔講你係邊位我真係唔知你打嚟咩事喎！ 佢：因為私隱問題你要講你係咪塵生我先可以講咩事。 我：你知我電話打嚟又唔講邊個咁我而家都覺得你侵犯緊我私隱喎。 佢：咁你係咪塵生呀？ 我：咁你係咪共產黨？ 佢：咁你係咪塵生本人呀？ 我：你係咪共產黨想套料？ 佢：我哋要確定你係咪塵生？ 我：你打嚟一味問我係邊個你又唔講你係邊個咁我點答你我係邊個呀？ 佢：咁塵生係咪你呀？ 我：咁如果呢個電話係我執番嚟我家陣應你一聲我係塵生咁我係咪就係塵生先？ 佢：因為私隱問題我哋要確定你係咪塵生先可以講落去。 我：你覺得我係塵生咁我咪塵生囉... 佢：咁你係塵生啦嘛...! 我：咁你又係邊個你又想點？ 佢：哦！我哋係溝通銀行...你早排申請咗張信用咭想有啲資料同你跟番...

鼓掌難明

出席好似演唱會遊行呢啲公開場合，最驚個主持人或演出者於辭窮下無啦啦彈一句"比啲掌聲你哋自己先"...!即係咁，我嚟得嘅覺得你哋搞得有聲有色，掌聲我一定唔會吝嗇；你係九流流我柴台都嚟唔切！掌聲一係你比我，一係我比你。你咁感動覺得台下嘅我哋做得好你咪自己拍番掌比我哋囉，再唔係回番多少水腳又得！做乜無端端要我哋"比啲掌聲自己"？咁同動物園隻猩猩海洋公園隻海獅有咩分別？與情人節無仔溝無花收嘅OL要訂花比自己又有何差異？咁即係話："嘩~你咁撚低死，不如送個花圈比自己"！定係好似辛勤工作完一輪，又要搵個借口血拼，咁就不如："買番啲嘢獎勵吓自己！"...我真係唔知點解獎勵唔係上司唔係老闆比錢卻要自己科水？查實係無人認同你嘅工作又唔甘心得個桔要自我安慰一番？假點樣自己丟本人好明白，至於掌聲點樣可以比到自己真係完全係知識範圍以外啦...

Iron Sky

納粹德軍於二戰末期敗走月球，舉家移民Dark side of the moon重整旗鼓，休養生息後有望重臨地球再次挑起戰爭，一雪戰敗之恥...在Iron Sky這個異想世界裡，失敗的不是納粹，而是編與導！有這樣一個上好題材卻可以糟蹋到如斯地步，除卻機械設定尚有可取之處外，故事認真不認真搞笑不搞笑，基本上是一齷爛到絕頂的屎片！其實以有限資金，特效慘不忍睹已是意料，但係納粹反攻地球如此勁爆的題材，真係稍為用吓腦寫都會震撼無比！是旦搵個軍事迷二戰粉絲都會有很好的見地...奈何第一步都行錯咗，導演要以喜劇手法去處理這個陰沈的題材，但係睇完除咗苦笑之外真係唔知邊到笑得出！一個有齊湯包配料麻油的即食麵也可以煮得一塌糊塗，真係連希特拉都要鬧爆完cut唔到有線之後就係鬧爆導演及制作Timo Vuorensola同Samuli Torssonen!

我們不是李旺陽

不要抽旺陽的水，我們絕對不是李旺陽……中國有十份一人具有李烈士的意志，共狗早就倒台了！我們不但沒有旺陽兄的堅毅，更沒有人家的勇氣，我們的遊行只是持著人多勢眾，就算搏警察開槍鎮壓都未必射得中自己；而李烈士只有單打獨鬥，向暴政展示一身鐵錚錚的風骨！以其信念及鋼鐵意志苦撐廿多年身教世人民主不是賜予不是施捨的，而是要用血與汗以至生命打拼回來。我們冒著酷熱汗流夾背上街與李旺陽兄的義行相比只算得上個屁，相對烈士的苦難更不值一晒...但這個屁也不得不放一下，我們微不足道的熱力縱沒有旺陽般熱熾，就算燒不死極權也至少要灼痛它一下啊。

誰喜歡我？我這種無奶~~

繼Ricoh的GXR為開拓有錢潮人市場而推出M-mount拉架元件後，以特立獨行自成一格見稱的的Fujifilm亦為旗下X-Pro1加推M接環，好讓一眾買唔起拉架的人可以較為輕鬆上車。响一眾盲目消費潮吹主義下，彷彿逢機必奶逢鏡必拉才是皇道！比多兩本濕鳩雜誌洗吓腦就真係以為無咗佢就相都影唔到。有錢沒錢的都設法向拉架靠攏，一機在手就大師自然上身，快過標童易過打針。在此絕無意冒犯奶鏡相反係人都知佢質素高技術好，更未有資格在此奶門弄鏡一番...但羊群效應下亦相信大部份人不愛平實只愛浮誇。有空不妨獨立思考一吓，既然有心用Fuji倒不如好好欣賞Fujinon的優雅，手持GXR的就應體會Rikenon及GR lens的價值，就如用Konica的必定會為Hexanon而驕傲，最重要是自我感覺良好，懶理旁人是否感受得到。

Dead Heads

很多喪屍片的第一場口總愛描述昏迷了的主角醒來後，要面對喪屍圍城的無助與孤單感，從而延伸出往後故事的壓迫力。DEAD HEADS亦是依樣畫了個葫蘆，不過分別是主角醒來後，自己也是一條喪屍... Mike與Brent分別是兩個受病毒感染後成為喪屍但又受到實驗藥物影响，保留著人性思維的不死身行屍。兩人好不容易接受了事實後，Mike靠著殘留的記憶和Brent的鼓勵(其實係無聊無嘢做)，出發找尋失散了的女朋友去，道上雖然有追殺他們的人類和神秘組織，但亦有幫助他們渡過重重險境的退伍老兵與路上收養忠心不二的大塊頭喪屍(寵物？)。歷盡險阻終於與女友近在咫尺...不過礙於當下身世，又如何得回美人歸...?? 無夢想嘅咸魚同有夢想嘅喪屍，邊個(活)得有義意啲...

Nude nuns with big guns

早前上影嘅機槍教父(Machine gun preacher)，以暴易暴的真人真事雖則大快人心但卻又令人萬般無奈；不如暫且抽離殘酷嘅現實，觀摩一吓雷霆修女(Nude nuns with big guns)支槍有幾大支...嘢。開宗明義全B片格局嘅Nude nuns with big guns，梗係唔少得大家都愛嘅暴力與色情。今次仲要响天父面前玩埋"女同"呢個大不違，一於置宗教於道外，道得規條於千里。於墨西哥的九反之地，教會上下都是一宗宗的買賣，上至樞機、神父下至修女長，包娼庇賭制毒販毒一條龍，勾結黑勢力有錢齊齊搵有飯齊齊食，更對叛徒毫不留情...莎拉修女等人就係被逼於教會工場制毒(唔知點解開工時唔比著衫，可能驚有人會落格？)嘅一班最低下層修女，不過响一次交收時被發現穿櫃桶底而遭賣落妓寨打毒針，不過又好彩得有心人所救，瞓醒仲話受天父指引要制裁罪惡，於是莎拉就手執兩支大口徑密林兼多款精良武器，身穿潔淨純白的修女袍，反轉教庭與惡勢力，為清洗世人身上的罪孽而沾滿一手血腥。

長尾

99年踏進我們家裡的小貓，因為身形細小所以尾部相對顯得特別修長，所以老父便為牠起了"長尾"這個稱號。不過十多年來隨著歲月流逝與好食懶飛，暴脹的身軀才是牠被談論的焦點。膽少怕事欺善怕惡見風駛舵貪威識食臭脾氣...將人類的優點集大成。卻帶給一家十多年來的歡樂，今天您在這裡的任務完結，靜靜的離開我們接受了新柯打...回到父親身邊為老人家帶點樂子，相互照顧一下。

陳長尾 1999-2012-04-18

別問我是誰

即將上映嘅復仇者聯盟The Avengers，當然係本年度熱切期待的大片之一。不過自從戲內"要角"Hawkeye鷹眼俠造形曝光後(早於雷神奇俠裡)，我的嚕囌自此發過不停...Hawkeye是一個自細較喜歡的美國英雄，當然我並唔係睇開美國漫畫嘅人，只不過以前落街打機唔理三七廿一都會揀佢用，都係貪佢攻守兼備長短皆宜。漸漸用出個感情來...可惜令人期待嘅處女登場(已經無得擔正)嘅造形又係步向要有型而放棄原作特色的荷里活死症！一身黑色戰衣於實際環境下確然係好合理，亦比起其他著住馬騮衣嘅伙伴們落街買包煙方便。但係大家都明白呢啲係娛樂吓大家嘅娛樂大片，其實都唔介意响裝扮上花少少心思，起碼唔係家陣一個箭術運動員咁款。呢個通病其實响之前嘅社團式集體英雄總動員大片都犯上，好似我細路嗰時日日追嘅G.I.JOE咁，以前鐘意睇就係因為每個角式都有唔同嘅裝份同性格，就算有一百幾十個隊員都位位鮮明，無話混淆不清，出玩具都想買多幾個...不過真人版一出除咗個別有啲唔同色水外，不論忠奸又係搞到個個黑媽媽，開拖起嚟完全唔知邊個打邊個！之前嘅電影版X-MEN都係中晒呢樣嘢，如果兩班大俠有幸打起上嚟就真係好似香港警察大戰保安員咁嘅樣，分別係我哋啲制服比較醜樣。

小洲村

由廣州東站出發，打三十多元人仔的士又或者坐45路公車便可到達有嶺南最後水鄉之稱謂的小洲村。建於元末明初的小洲村可以由多個路口進入，只要問問路人便可順利抵達。最後的水鄉並不代表可以得到妥善的保存與維護，在這裡四通八達的河道已然是一條糞渠，水位低的時候著實臭得可以，但這並沒有阻止人們對它的使用及無止的污染，當水脹時村民依舊用河水洗濯燒煮，而小洲村成了旅遊景點後排污仍然是沒有改善，日復日的向中國特色古村邁步。除了明渠泛舟這類活動外，小洲村的寧靜亦得到各路藝術家的菁萊；特色小舖與咖啡館進駐了村裡每個角落，悠悠閒逛坐坐發呆也是不錯，可以慢慢地消耗半天光蔭。不過最好是避開夏天到訪，因為這裡的蚊患確實不能小覷。

武訓傳

這部號稱開國第一禁的武訓傳，以正常智商去觀賞判斷，著實是一部打動人心的劇情片，當年更被推舉為50年代的十大電影。可惜生不逢時的她，只風光了年多，便被無無謂謂地批判莫須有水蛇春長的罪名，一禁三十多年，到85年才得以平反，而到了2012年終於將武訓傳還原，卻曖昧地加上"供研究使用"...推出DVD重見天日。 武訓原名武七，生於清光緒年間的山東人；那時封建社會的私塾只為有錢人服務，窮家孩子因不能上學念書難有出頭天，只能一代一代的窮下去，被上層無止盡的欺壓剝削...武訓當然是劇中被壓榨的表表者，深明唯有知識改變命運，遂四處行乞討飯賣藝打散工，堅忍刻苦三十多年最終興辦起三所義學予窮苦孩子讀書，由最初受盡白眼冷嘲熱諷到後來被捧為山東聖人的武訓，自己仍是孓然一身至死方休。 共分上下集的武訓傳，開始時只以"粤語殘片"的心態去欣賞，不過隨後發覺編/導孫瑜的功力不是蓋的。以五十年代的標準而言，其拍攝手法剪接過鏡直把當年港式真正粤語長片比下去。老老實實三個多小時帶點說教呼天搶地式的黑白電影，絕無一刻令剛剛北上南下回來於深宵煲戲的我有半絲釣魚的衝動，看罷後竟還有點點動容。是時代令一部好片塵封，也是時代令一齣電影得以傳頌。