富士山登頂5：由山折返

逗留咗個多小時就離開痾篤尿要300yen嘅富士山頂，落山係要走另一條路以避免與登山人士衝突。而山路主要係一大段火山灰之字路，對鞋好易勁入沙，建議都係用番個腳套好啲。沿路下來風景都係見慣見熟，只係想响膝蓋被毀前快啲落到山。下山呢一邊只有好少量小屋旅店，唔似上山咁行一陣就有位停吓，就因為咁所以呢度有一個好罕有嘅公廁，每位200yen比唔比都係心意無人理你，不過排長龍就少不免。四小時左右就返到五合目嘅巴士站集散地，由於之前訂咗2pm嘅車票，所以即刻去改為11am，好彩時間尚早改票無難度，返去全無塞車兩個多小時就返到新宿，即刻返旅館沖個靚涼仲有半日去血拼。

落山條路其實有夠枯橾

沿路仲有啲未化嘅雪

中途有個避難所，不過有事應該走唔切

富士山登頂4：高瞻軟足

呢個時候仲講富士山，好大機會引嚟一班屁民打砸搶燒，敝Blog防禦力有限，既無霸王餐比人食，又無日貨比人搶，更無蒼井空上場...如果咁好彩比人河蟹咗，咁就安安樂樂唔使再令呢個blog殘喘久延，放手等佢騎鶴西去...之不過一日未到呢個時候都仲要寫埋呢個咁唔愛國嘅遊記先。話說响不斷塞人嘅龜速情況下終於响法定時間凌晨四點順利登頂，不過去到頂上嘅久須志神社都仲未係最高點，仲要撥開人群向火山口前進，但係响呢度已經凍到牙關打震，急需直闖休息站暖番個身，當然唔少得買罐熱飲補充一下，之後戰力稍為回升就即刻起行。其實4am都未算見到個太陽，尚要等到佢由雲層中彈出，都要差唔多5am，當刺眼嘅陽光插入眼簾嘅時候，山頂上嘅人都齊齊大嗌"餓蝦喲"！！當然仲有此起彼落嘅快門聲。隨住陽光遍地曬，寒氣早已盡消，亦都有慢慢落山嘅人潮開始形成，呢個時候竟然見番走散咗嘅隊友；嚟到呢度都係要做埋最後一件事，就係排隊辣埋last一個登頂印。

買罐嘢暖吓身係好重要...對於我呢啲著唔夠衫嘅人嚟講

我諗係日本人先會抬部自販機上山頂比人過手癮

前方就係火山口

火山口內仲有積雪尚未溶化

火山口對面都係好多人

望番落啲都係塞滿人

各地明明一日就可以行完嘅山，硬係要大家分兩日去完成；美其名係觀賞日出，實情都係商業運作

係囉~支旗插番响自己地方咪幾好...

富士山登頂3：越黑峰高

只不過行咗兩個鐘左右就到咗七合目嘅富士一館，呢度係一早預約咗留宿嘅地方。7300yen一晚包無肉咖哩飯晚餐同一袋乾糧早餐。六點鐘就要開飯，買罐啤酒要600yen，買包尤魚絲200yen較為合理仲幾好食；一早食完飯攤晒响度除咗吹水確實無乜嘢好做，旅館瞓覺嘅地方係如同集中營咁上下格一排排睡袋肩並肩。睡房內基本上講明唔準傾計，但係好多人會用自以為好似好細嘅聲調咁講嘢...不過就算無人講嘢但係响好多人不斷出出入入嘅情況下其實都係無覺好瞓。一早撻响度又瞓唔到就唯有十一點左右早早出發，正常官方時間係凌晨兩點上山就四點日出前到達，好彩真係提早起行沿路不斷塞人真係企响度等到瞓得著。老老實實難度其實唔算高，加上勁多人超擠塞停多過行所以絕對講唔上係辛苦。反而要注意嘅係保暖，因為行濕咗件衫又企响度吹風，真係好易中招，忽冷忽熱外套著著除除都幾鬼麻煩。當然唔少得睇吓每間小店嘅燒印吸唔吸引，而燒印價格亦隨山勢不住上升，由一個200yen變成300yen兩個。

七合目的富士一館；其實建議大家第一日有幾高上幾高，咁夜晚攻頂就快靚正

响度無論主觀環境同客觀因素都好難瞓得到

山上資源所限只提供無肉咖喱飯，散叫要1200yen

早餐一袋，飯後都清咗一半

富士山登頂2：印仗深刻

响五合目食個飯再買支金剛仗，都差唔多三點，影完合照就要上路。開段一路走來都係一啲斜路仔，而且仲可以騎吓馬咁，但係價錢同強國比較唔知爭幾遠，不過就可以肯定嘅係馬主責任心一定比強國好。行咗無耐就到咗六合目，呢度係一個幾開揚嘅影相位，之後就係一大段之字路同石級，不過因為中途都有唔少旅店可作停靠，所以都唔算得好辛苦。之前買落嘅金剛仗就係响呢個時候發揮作用，我講嘅唔係行山可以倚靠佢，相反我自己就覺得一啲都唔好揸，所以只係買咗支短版。而其實支金剛仗係要嚟比大家儲各旅館小店嘅燒印，每個盛惠200yen，如果要儲晒就真係多多錢都唔夠派，都係睇定邊啲造形獨特又有紀念價值先至比錢辣一嘢...

吉田口算是一個較易的登山口，所以人亦較多

到六合目前算是熱身，上七合目才是開始起步

沿途有很多依山而建的小屋，可以停一停欣賞吓風景

當然亦可以方便一吓，不過要放低幾両先要放低二百大洋

每間小舖都有各自開發嘅燒印，仲會每年更新，有用炭燒有用電熱

這是上年的兔年燒印，有人為咗儲印而年年登山

富士山登頂1 : 飛蝗頻達

响京城遊蕩咗幾日，終於嚟到上山嘅日子。晨早於約定嘅新宿京王百貨附近集結，各方不日赴日嘅登山隊友向長途巴士站進發。友人早前預訂咗吉田口五合目嘅巴士，來回票價5600日圓。約八時半發車，原本兩個多小時嘅車程因為交通擠塞而令時間多了一倍，下次再有機會可以考慮以JR前往。窒吓窒吓咁於二時許終到達五合目，呢度有好多店舖售賣同富士山有關嘅記念品同埋國內自由行最愛嘅手信，因為有太多落車即影相即瘋搶嘅強國遊人源源不絕運抵，所以呢度啲舖頭同郵局淨做佢哋生意都嚟唔切。由其你話想响郵局寄張明信片就真係要好似公開大學咁話齋要裝備好自己...能夠全身而退咁上山一定無難度！可能因為強國人太有錢又豪邁，所以店舖都會率先响應野田首相嘅10%消費稅國策，以人民幣救國昭示中日關係見膠正常化。所以响度買嘢要好似响百佳惠康咁要睇清楚張收據，唔係話要攞返嗰一個幾毫咁簡單，而係要佢哋分清楚閣下同強國人，浪費咗人哋嘅白眼就唔好。

巴士準時開出但係誤時抵達

富士五合目；全程分十合目，由這個集散地起步已是2300多米

從這裡望上富士山只餘千多米，好像就在眼前

Skytree 晴空塔

既然係冇計劃行程，所以可即興前往剛於五月開幕嘅Skytree(天空樹/晴空塔)。其實於早前媒體報導嘅萬人空巷人山人海盛況，對於呢啲新屎坑多數都係避之則吉，之不過又真係可以成日都好得閒，咁就一於去挑吓機，起碼返到嚟可以响好多未去過嘅人面前吹噓一下嘛...據情報顯示，到淺草站會有一條新設嘅專線可以直達Skytree平台，但係就要比多百幾日幣轉車，而事實我哋都係咁樣去到，之不過原來連接Skytree底部的押上站更為方便，只需於涉谷站坐地下鐵半藏門線約半小時便到達，仲省卻於JR山手線往銀座線的轉車路程。Skytree大致可分三個部份遊覽，最重要當然係高634m傲親全球嘅主體思想塔，其次就係水族館同好多層嘅血拼魔。要攀上Skytree，最好早啲來到先去領取整理券，然後於整理券上指定時間內回來排隊買票入場。今次其實排得比預期時間短，大概個半小時就可以放低2000yen上樓，如果再要上高啲嘅天望迴廊就要再放低1000yen。其實去到咁上下高度望落嚟都唔知有咩分別，不過排咗咁耐隊又唔爭在企多20分鐘比埋嗰1000yen，當然如果知道係無乜料到就真係可以慳番！可以留番啲時間同人爭手信。响血拼魔大樓無錯係有好多食肆，之不過响無窮盡嘅遊人壓力下要搵個位食飯並唔係易事，醒目仔如我緊係離開晴空塔範圍到週邊街道搵食，飽餐後再返去同佢死過...

去完日本Skytree，搵日要造訪廣東小蠻腰一決高下

由淺草開過來的專列

暫時未見太多自由行同港團，所以排隊都好井然

每個方位現場都有註文介紹，不過影完番嚟就好似張張都差唔多咁...

比多1000yen嘅天望迴廊同下層最大分別係少啲人咁囉

俯瞰鐵路站

上到嚟有好多影相服務，呢位阿姐就係影番下一層嘅閣下

上到咁高其實飲品唔算貴，問題係搵唔搵到位

強化玻璃底面積好細，睇怕好難承受日後自由行响上面暴跳

遊人可到的最高點，其實有部份高度係靠最頂條天線搭夠

都電荒川線

於JR大塚站下車，可直接轉搭有百年歷史，東京市內僅存的都電荒川線路面電車。400yen的One day pass最適合要上上落落的觀光客，坐上電車一口氣到達早稻田尾站正式開始行程。我們第一個選擇下車的是鬼子母神社，這是一座細小但歷史久遠的廟宇，走一轉不用花很多時間，也挺舒服的。之後的庚申塚站附近有一條舊商店街，沒有時間的其實可以略過。飛鳥山公園經過時發現有吊車，下次再去考證一下...最期待的荒川車庫原來不是公開參觀的，只能在被驅趕前快快拍下照片。接下來的荒川遊園地是一個小小的遊樂場，是附近居民消閒的好去處，但係對遠道而來的遊客便不大吸引。最後來到總站三之輪橋，下車後可到商店街逛逛，或可到舊式咖啡廳坐坐懷舊一番。早一點來玩一轉荒川線，下午便可坐電車一直殺回大塚JR站轉車繼續血拼去，於同一個東京時空穿梭於平成與昭和年代，感覺有別於一般的遊日行程。

早稻田站隔離當然係早稻田大學

最新式與懷舊的電車同在路上行駛

鬼子母神社的小賣部已經營到第十七代，店主是愛貓之人

荒川車庫竄入去影相就要快手

荒川遊園地

運轉席

三之輪的咖啡廳陳設著有關的展品