外遊，休市一星期

無人睇住都吾好偷食...

生日快樂！

27號是內子的生日，和上年一樣去試下同事J介紹的法國菜，甫坐下便迫你飲支貴水，預左既，豪比佢！頭盤當然揀煎鵝肝，味道很好，但配菜是桃，味太搶，伴著吃時蓋過了鵝肝留在口中的香味，扣分！湯是雜菌或大蝦蕃茄湯，我們都選了後者，邊有咁笨飲埋D茶餐廳例湯......哈！果然無揀錯，原隻大蝦稍經烹調，很惹味，湯亦鮮味可口。主菜內子選了羊排，我點了日本黑豚排，亦都達到水準。甜品是芒果拿破崙及蘋果巻.......E...咪住！點解去食法國菜我會叫左日本野架？哎吔！早知去食板前算啦......

晒黑

因接待遊人過多而被聯合國黃牌警告的布達拉宮，建築外觀有多宏偉幾氣勢，內裡藏品有多別緻幾珍貴；已有太多媒體不同途徑介紹千萬次，在此亦懶得贅述。今次帶大家探下布達拉宮金頂的小黑貓。布達拉宮金頂(即係天台)門票是不包遊的，要上去看，那年頭額外收多十蚊人仔。上到去都係睇下純金造的塔頂同府瞰一下附近景色。正想離開時便看見躺於一堆哈達上晒太陽的牠，看牠懶洋洋得連小憎侶也底不住捉實他拍照，可惜高原正午日照猛烈，黑色的貓與白色的哈達反差奇大，效果不是太好呢！

送飯

漿導演：好多謝大家收睇"一扎紙巾"！大家比D掌聲歡迎30位"黐根小姐"...
黐根小姐：漿導演你好！
漿導演：黐根小姐妳地好！
漿導演：我地今日既參賽者係史先生，比D鼓厲佢（拍！拍！拍！拍！工作人員提示現場觀眾拍掌）
漿導演：阿史生，做盛行呀？
史生：哦！做..........................
漿導演：好嘞！而家係你面前有三十位黐根小姐，佢地每人手上都有一個紙巾盒，盒入面有由一格至最多三十格廁紙...阿史生，今晚打算拎幾多格廁紙呀？
史生：呢排腸胃吾係咁好，起碼要番廿格啦...咁梗係越多越好啦!哈哈...
漿導演：嘩嚡！你都好等紙駛咁喎！咁你又知吾知係邊位負責將呢D紙巾放入盒呢？
史生：吾知呀！哈哈哈！(關我义事!)
漿導演：係痾水會計師廁務所（拍！拍！拍！拍！工作人員提示現場觀眾拍掌）
史生：........
旁白：今日既奬金奬品好豐富，包括：排毒美顔佬送出排毒美顔嫂......
.........................................
.........................................
.........................................
漿導演：史生, 開左幾個都係細格數，見你胸有成竹，不如睇下Banker 出幾多好嗎？
DooooDooooooDoooooo
漿導演：(作晒狀) 喂！哦！係係係.........
漿導演：嗱！Banker一口詐....9格！瀬吾瀨？
史生：.....仲少過平時用開既格數喎！
漿導演：使吾使同你D廁狼豚商量下呀？
史生：.........好呀!
.................................
.............................................
(成晚最悶呢度)............................................
............................................
............................................
廁狼豚： .............................掂架啦！我地支持你, 玩下啫，你話事啦！(超！你急啫嘛)................
史生：得啦！決定左啦。(傾咁耐都係食自己，混吉！)
漿導演：(揭起廁板）阿史生，如果瀨就坐落去，吾瀨就冚翻埋！
扮到好無奈咁望住D現場觀眾既史生：瀨吾瀨好呀？.......(又話決定左？）
正方現場觀眾：瀨！瀨！瀨！瀨！ (觀眾：關我地义事咩！）
反方現場觀眾：吾瀨！吾瀨！吾瀨！吾瀨！ (觀眾：關我地义事咩！）
史生：都係................吾瀨！（將廁板蓋下)
(拍！拍！拍！拍！工作人員提示現場觀眾拍掌）
漿導演：好！咁你再揀多三個紙巾盒！
史生：6號呀，吾該！
漿導演：6號！(諗左陣)......Tempo! 吾該開開盒！
黐根小姐Tempo用已採排好的表情(嘟起個嘴)開盒...
漿導演：30格！30格呀！最大果個盒開左喇！史生，跟住點呢？
史生：....................好悶呀，轉台睇黃麗梅得吾得？

狗皇

西藏獨有名犬：藏獒，是世上最稀有昂貴的犬種之一；其忠心勇猛為犬界之冠！有謂："九犬成一獒，一獒抵三狼"；傳說牠們可辟邪降妖，更有聖犬，天狗、活佛的坐騎之稱，可見藏獒在藏民心中特有的崇高地位！
在西藏，當然少不免碰上牠們，除了那些紓尊降貴在旅遊區收錢供人拍照的純種藏獒外，在大小城鎮亦遊走著很多似是而非的雜種貨,(就算真係正貨都會凝住佢係流流地...）不過見佢地有善又可愛, 都禁不住同佢地玩下，或者撞正一隻係堅野，可以保佑下我旅途平安呀！

久違

就算是流淚，也只流幸福的眼淚。
你有多久沒有被感動過？
新買的電視成為全街坊的盛事；
第一台雪櫃要探頭進去涼快一下；
聖誕願望只是一支墨水筆；
因為未試過，蛋糕變壞也要一嚐；
昭和33年，從戰後復甦中的日本，日夕町三街的平凡瑣碎事：滿懷希望來東京打工的女學生；營營役役為頭家的汽車師傅；多次落選的霉倒小說家；從良的居酒屋老闆娘；被遺棄的私生子...相互交織一幕幕笑與淚的故事，以實境及CG嚴格打造的50年代東京大街小巷，重現那純真歲月的淡淡情懷...

受夠了那些導盲尋回犬呼天搶地說愛妳的催淚式煽情...
誠意推荐電影 “ALWAYS 三町目の夕日“ 給自己兩個小時的心靈洗滌。


http://www.always3.jp/05/
PS.續集於11月日本上影

又要再等幾年

昨晚欣賞完夏韶聲的演唱會，他的功架與幾達國際水準的音樂班底已不需要一再贅述；而今次亦是記憶中唱得最多中文歌的一次，而在介紹樂隊時更用上25年前麗的電視劇"家姐細佬飛髮舖"首主題曲！仲玩到拍爛手掌，真係問你怕未？
PS:點解吾唱"想起妳"呀......仲有恭碩良去左邊？
PPS:大會安排坐位奇差！梯級位點可以有兩行平排，後面果行點睇呀？

無常

高原氣候變幻莫測，海拔高低落差有異，幾天內賞盡四季景色是平常事。

緣始

到西藏是可以不需計劃行程的，最緊要時間充裕。各旅館的報告版貼上尋找同行驢友，睇中就可以即時聯絡對方成行！因租用越野車是五人一架，齊人比較划算，但係遇到D乜野人就各安天命...第一次租車共有四位香港人一名上海人，上海同胞真係無乜點出聲。第二次租車輪到得我一個香港人，四個國內同胞！幾日來聽著他們在狹小的車廂內載歌載舞，彷彿有用不完的精力，而我就靜靜的看看窗外的風景，時而沉思時而睡覺...百年修得同船渡，同車幾日好快到。在旅程上有幸同途相互照應，大家要珍惜這種緣份啊！

左面那張告示係一班日本人找人由邊境樟木一起去尼泊爾的，可惜需時太長不能與他們同行......有幾個架妹幾靚啊！

蒂固

在拉薩最常hea的地方便是北京路的民間音樂吧，老闆走遍大江南北找尋人生真蹄與音樂關係，最後在西藏落地生根。晚上到此可以欣賞到老闆的歌喉，與他閒談時好像什麼都不自在的樣子，彷彿一位入世高僧一樣。但參觀過吧裡他到處遊歷的照片後會覺得他是個比較感性的傢伙，只是難以在言語上表達罷！最後那天原本答應好要到吧裡買他的CD的，但中午過後還未開門，而又要趕乘飛機，所以無奈作罷。沒有漂泊的借口，只因根早已深種。

咫尺

離開北京，獨個兒亳無準備下踏上往西藏之路，那年頭沒有火車，也沒太多湊熱鬧的旅行團，更沒有人山人海的布達拉宮。一直在人們心中故作神秘的西域邊陲，原來比過關去羅湖商業城更方便！兼且吾覺吾覺，從拉薩坐幾天越野車，就到了世上建於最高海拔的寺廟：絨布寺，更與珠穆朗瑪峰遙遙相對。在這麼近的距離再見這位朋友，真有點莫明的亢奮！
動身吧！目的地放在心中是這一世也觸摸不到的。
左：絨布寺 右：珠穆朗瑪峰

搖擺童年

北京大柵欄的入錢搖搖下玩意...以前各大酒家例必有兩部或以上供小朋友玩樂！我必定會選乘超人造形的; 電光科學人，電腦奇俠同銀面飛俠等都曾經臣服於我的小小屁股之下，之後發展成可以坐雙人的各類形態...如汽車及一個半圓形的物體，大家每人一邊對著坐的；配以各種嘔心兒歌，以英雄造形可說是買少見少了！那年頭是五亳子玩一次的，有時晚飯後時間尚早的話，公公便會帶我們到樓下的醉瓊樓玩一次，坐在超人背上擺著有型姿勢，那短短數分鐘的搖曳，便是無憂童年的一種"細藝"...

估距唔倒

早前bid回來的Canon QL17, 一直還未有機會試影，剛好早排星期天要去拍野，橫掂都係得個企字，不如拎部機來扮下野...係無乜期望之下，效果比我想像中好得很！由其是測光非常準確，1.9的大光圈全開時影像亦令人滿意，於較暗的環境下手持拍攝很方便。QL17可選擇快門先決或全手動，令曝光時可更靈活增減調節，如果不是疊影對焦屏已老化，對焦對得比較吃力，有時索性估距算數的話，QL17會是我其中一部使用率非常之高的機器！

事後孔明

上星期攀石會搞比賽，一早到場等幾粒鐘，出賽全程不消幾分鐘...先天不足加上疏於練習，失敗是必然的。（第三張是失手的一刻...見笑了！）

記住含

北京動物園，除了熊貓外，其它動物真係有D把鬼！除設施陳舊外，更有一些是得不到善待的。而熊貓館明顯較大及闊落，更分有室內及戶外供遊客參觀，而室內設有育嬰間，可以看到更可愛的小熊貓！但拍照時不能用閃燈，若遇到違規的同胞們，房內的工作人員便會用大射燈回敬你，讓你也一嚐被強光騷擾的感受！(當然隔離的遊人亦多得你吾少)
看完熊貓仔便走到戶外探望大熊貓，雖然那些動作在電視上已見慣見熟，但親身上陣又是另一回事，何況熊貓咁得意，真係百看不厭啦！不過入場買票時要額外聲明看熊貓，那麼你手上的票便會多了"含熊貓"三個字，而想含熊貓...是要加錢的。

不羡仙

北京孔乙己，是整個旅程中吃得最精彩滿意的一餐。以魯迅先生筆下人物孔乙己為店名；各樣小菜都在水準以上，最出名的東坡肉冒著爆血管之險也要大啖大啖放入口！記住來幾斤陳年紹興酒佐膳，真係人生幾何！