福相

水鄉同里內著明園林"退思園"
半魚人：大家都係魚，你地就擘大口等人餵，我就要比兩蚊買包郵票咁大嘅魚糧餵你地，好明顯係施比受更似阿福...

貓樣上海

又嚟放DC機仔相，貓貓大暴走！





旅舍的一家三口，黑白小貓因後腿不良於行，所以很愛撒嬌，深得旅客歡迎！


田子坊藝術區的貓零舍有氣質。


紹興路的黑貓原來坐住袋芒果。


復興路的貓不動如山。


坐爆磅！


水鄉同里的貓好明顯未瞓醒。


水鄉係咪多魚食，D貓肥到無頸...


多倫路的貓好生猛，跳來跳去好難影

阿拉的上海假期

甘比仔玩轉田子坊藝術區


半魚人水鄉閑情


白膠熊的美食之旅


剛完成一星期的上海之旅，涼未沖野未執都要放左班細路D數碼機仔相上來先，今次除左部機仔D彩色相外，全程都係影黑白菲林，真係吾知晒到何年月日，DC仔都粗粗地頂住先...

玩具日

剛過去的星期六日，又係一年一度的玩具日，上年明明賣到乾塘，今年又掘左幾個紅白藍去，屋企D玩具真係賣極都吾完，心諗如果呢四年都無出過貨，我諗真係擠到屋企門口都入吾到...
講番今年個場，搞手引入日本廠家CMS到來展銷，叫做吸引到吾少人慕名而來，但係千篇一律嘅活動模式，真係令屆屆來捧你場D觀眾生厭，動下腦筋諗下點樣留住D人耐少少，對大家都有好處，多D親子活動真係好重要，講真D玩具真係吾係好多都適合小朋友玩，D細路入到來嗌悶話走，做家長自己睇得幾開心都有壓力，同埋都要顧下人地身邊嘅另一半，淨係做D電車男生意好難搞得大，我同大佬年年扮拉打都頂吾得好耐呀！

堪輿

一個飛禽走獸﹣﹣馬／鷹／狗
一個自我矛盾﹣﹣謝／長廷
寶島的明天何去何從。
ps: Konica C35...百多元貨仔，幾得喎...

玄機

以下呢篇係我自己好偏頗嘅思維，笑下就算，亳無參考價值，亦吾好同我爭論...
近來很多朋友興致勃勃要趕上數碼單反潮，理得我影到一劈屎都要問下意見的大有人在，我緊係諗都吾諗(其實係經過深思熟累)嗌大家買C記...原因一：對相機認知有限；二：廣告真係會催眠市民；三：閣下身邊勁多人用；四：最重要呢點......買完你吾會怪我怨我煩我。
就第四點而言，如果你吾買C記, 閣下的親戚朋友一定會問"點解吾買C記呀?" 又或"做乜買呢隻咩咩牌子呀?" 真係解釋都解死你，如果你用緊N記都好D, 起碼認受性較強。就算用著一部好合你心意嘅咩咩牌相機，如果閣下吾夠堅定，比人問多兩問又大下你兩句，就會越睇自己部機吾順眼，人生苦短卻難耐夜長夢多，諗都吾好諗轉會係時候；加上當閣下用緊咩咩牌有咩咩問題嘅時候，你一定怪死佢同我，埋怨自己當初吾跟大隊上車，懶有個性贈自己慶；相反C/N牌有乜頭暈腳痕嘅時候，你只會怪自己技不如人，個個用無事，係得我有事......點都吾關品牌事。
其實有事無事都係閣下個心有事，做一個吾使自己游隨住波逐流嘅人易，要超然物外找到自己方向堅定不移又有幾個可以？
搞咁耐，吾通係我心目中，C記真係不值一晒？實情當然吾係，相反，C記的技術與對相機開發之熱心的確是令人敬佩的，對專業用家而言，他的確是一部不可多得的利器，留意各大小運動項目如世界盃奧運格蘭披治的白鏡陣，就如阿N都望塵莫及，更遑論P/S/O等小輩...之不過,若閣下只係一位愛好攝影嘅小市民，我諗，應該仲會有好多選擇...
長篇大論，係時候以我微不足道的認知，加上自以為是的偏執一意，總結下各單位在我心中非常不中肯的看法：
C...專業層次毋庸置疑，5D, 1D的 Full Frame境界令人難以抗拒，對焦過片快速到可以獵豹(不過你架jeep都要揸得快)，但入門及中階機就不敢恭維，造工不算扎實加上小改款太多太快太濫，叫人有點不是味兒。而只提供鏡身防震，令入門者只有選購其IS鏡才具防震功能；但相反能令舊機型都可以有防震效果的好處卻不能忽視...。隨機kit鏡掉左都吾覺可惜，C記的靚鏡可以好正，但狗鏡真係狗到嚇死你，要果無錢買紅圈小白，整支雜廠好過。
N...一樣具備真正頂級型號可與C爭朝夕的品牌，新近推出的nano塗層鏡頭好評如潮，N鏡的銳利度是眾多日系品牌中最高的(整體感覺而言)，但亦有人不大喜歡其過份細緻的表現而轉投C...機身選擇比C還多。
S...很積極的"後起之秀"，挾著 M的本錢與自家的新科技不斷力追以求超N趕C！最有機會坐上full frame第三把交椅，可用G鏡及Zeiss鏡成為一眾痴漢趨之若鶩的新勢力！
P...full frame及真正頂級機的出現還未聞樓梯響，有心追full frame者短期內咪諗，入門及中階機絕對交足貨的良心品質！轉款較慢但相對耐玩(不計ist的搵笨年代)，鏡頭色水是我最喜歡的，隨機kit鏡亦屬同級之最！但因香港代理為人垢病的態度，令P記一直受多數港人所唾棄。
O...鐘情3/4系統的小數廠家，鏡頭選擇相對較小(不過對小市民絕對夠用)，隱打隱扎是O記的一貫作風，機身交足功課操控很易上手。 ZUIKO鏡頭風評亦很高，是一個user friendly的品牌。

講咁耐你吾嫌煩我都手軟，以上偏見絕非事實之全部，絕對有錯兼純粹吹水...咪當真。

鐵心

獨立品牌inspire貴膠系列早前推出的限定50隻銀面飛俠等身版本要索價$450一隻！真係啋佢都嫌錢腥。而新出的另一款"金霸龍"又無乜興趣，以為可以慳番多少之際，聞足成年樓梯響嘅Iron King 卻突然彈出！唯有食少兩餐乖乖比訂等貨到...其實都戒緊買玩具，不過呢D經典少有嘅角色，真係吾捨得甩。
Iron King


順便重溫一下之前推出過的部份角色！
電子分光人／鐵金剛／金霸龍

銀面飛俠：天藍等身版／銀色巨人版及兩個灰色等身版

三款(其實有四款)電光科學人：TV前期／原設定／透明鏡間

漫畫家内山まもる版超人

遺情

今晚改到九龍灣band房練習，見有時間梗係走去牛頭角下村食好野，一條友去"文記傳統車仔麵"都係一個吾錯既選擇。進食途中已覺門口有點擾攘，原來是一位婆婆坐在麵檔很久，忘記了家在那裡，要勞動警察叔叔幫手，正當阿Sir "R"晒頭之際，有位好心食客認得阿婆，還說出阿婆大概的居住位置，待食客哥哥攪掂碗麵就會幫幫手，而婆婆除了謝過食客外還覺得阻住麵檔做生意而頻向老闆娘陪過不是。怎料老闆娘吾介意不特止仲叮囑婆婆下次搵吾到屋企記得返來這裡，等我哋再幫你返去......
阿Sir, 諗諗下我哋都有野遺忘左呀：咪就係街坊街里相互守望嗰Ｄ人情味，比一座座冷冰冰既商場搶走晒，有無邊位可以幫香港人搵番呀？

貓之恩返

連環的虐殺貓狗暴行，反影出當下糞青真係食左屎忽上松棵體、警方選擇性扮努力及只預以打手板式懲罰的法律確能保障"年少無知"的施暴者得到改過自身承認錯誤長大當上美國總統的機會外，還鼓吹市民將向特衰政府施政的不滿轉嫁發洩在標籤著影響市容環境衛生的流浪貓狗身上。此舉亦大大減輕了食環漁農消防衛生處的出勤率，因報警都嘥氣而減少對警力的無謂浪費，從而省回納稅人大量血汗錢得以上繳地產商，簡接令本地樓市持續升溫，造就一片歌舞昇平的投資泡沫，令庫房滾存千億盈餘回饋各界，小市民有閒錢飽暖思行善積德遺愛，冒寒餵飼流浪貓狗普渡眾生...生生不息天理循環，本小利大，犧牲幾條賤命供人類享樂造福千萬生靈免遭塗炭，實乃幾生修到之福份，小小痛，忍下囉！

Go to DMC

警世漫畫"爆粗Band友"裡的死亡金屬樂隊DMC的御用愛豚；平日是便利店的慈腸收銀大叔，晚間化身被虐狂渲泄抑壓於內心的不安。一副軀殼兩重人格，可塑性高的漫畫人物借題發揮潛力無限令人樂不可支。現實裡週遭人物事黑白陰暗面比漫畫精彩百倍，人格豈止雙重簡直怪盗七十二面相，見不得光生不下來的鬼胎只好各自懷在肚裡......唉！講講下又咁灰，都係睇下公仔書嘻嘻哈哈算啦。

p.s.多謝brother手信，一抽即中特別版

述數

對於一個頻死的病人來說，看似生命流逝如風飛，現實可能卻是時間多得一刻難耐；
呱呱墮地的嬰孩，彷彿有用不完的時間在面前等著他去揮霍，說穿了，只是生命正式開始點滴倒數；
三十歲前任由青春燃燒，步入壯年卻燃燒著僅餘的壯志；
行內通病早上九吾搭八無無謂謂等著時間流走，晚上加班埋首伏案卻埋怨時間不等人；
假期賦閒在家是享受時間定虛耗光陰，往街上瞎跑血拼是浪費時間金錢又或是買來心靈滿足誰去定論；
時間總和我們過不去定是我們迷失在時間面前過不了去，過去的又不大了了，未來的沒甚大不了，活在當下的又不甚了了。
時間從來沒多沒少，用作量度時間的單位不是"多少"，而是"生命"。生命卻又是以"長短"去衡量的，生命長者時間相對多，短命的就要接受時不我與，而量度生命的單位叫"意義"，時間在白活一世的人身上亳無意義，活得有意義但卻又短命，那未做人又真的更無意義，那麼，各位有命有時間的，不妨開始活得更有意義，因為量度意義的不是"時間" 又抑或"長短".......正是："多少"。