化煩為簡

痛苦是複雜的，但快樂卻往往很單純。
複雜的事兒很難處理，簡單的事基本上吾使點理。
即係話...根本吾使要做D乜，凡事處之泰然，快樂就手到拿來。
但人生出來就有一具屎忽，有屎忽就有痕嘅時候，屎忽痕就會搵野來搞，D野多數越搞越煩，越煩就越複雜，複雜自然令人痛苦。
煩惱自尋，快樂自生...咪搞咁多嘢啦。

講你又吾知，話你又吾鍾意

香港大學尖子係網上發起四川抗震救災義工團，呢班少爺兵與其上去攪攪震幫倒忙，不如留係本埠上網打機唱下K。
講人多，大陸每人一篤痰都浸死你；
講大學生，上面個個都高質過你；
講義工隊，是但一個市組織都快過你；
講國語，求其一個小學生溝通都好過你；
講吃得苦捱得餓吾怕污穢忍得吾沖涼成個禮拜吾洗頭訓覺無泠氣如廁踎茅坑一日食兩餐...你班好食懶飛嘅未來棟樑咪駛旨意有樣跟得上；
講專業技能講重建講防疫講搶險講抗災講心理講體能講意志講乜你哋都係得個吉......
而家災區D物資咁吃緊，不如要來用係有需要嘅人身上，吾好上去同人爭水飲爭床訓。家下仲有好多災民要照顧，咪上到去要人照顧番你地轉頭，嗰度樣樣都爭分奪秒，你估去郊野公園執垃圾咩！

後生仔，一味滿腔熱血無用嘅，第日出到社會做嘢你就知嘞！

好狗樣

我們一家都愛貓，堂妹一家最愛狗，更獨愛史塔沙。早前一家三狗浩浩蕩蕩到brother的studio影硬照；菲菲，朦豬與Toby呢三條友仔在影樓團團轉，手舞足蹈梗要狗餅引導，sit sit hand hand更難佢地吾到。兩小時的功夫逗得眾人樂不可支，只怕brother影到體力透支...
可惜特立獨行的貓兒們絕對沒有此等耐性，如果佢地肯乖乖坐定定影相，就吾使成日係街追追逐逐咁辛苦。

裡外不是人

坊間小商舖貨品比吸血超市價平根本就係一個不足為道的事實，但早前蕭痿會煞有介事地大鑼大鼓為民請命，教導蟻民要擘大對眼認清賊寇貨比三家煲湯隔渣格靚個價，千奇咪誤信超市至底出位慳得多皇牌著數價云云。欲以一副亂世英雄救黎民於水火反財閥為己任之態等待市民如雷掌聲之際，一眾突然腳趾尾"慘"刺的財閥，頓時沖冠大怒兼鳴冤撃鼓賊喊捉賊，火速登報澄清上電視聲明，兼觸動埋政府高層神經，蕭痿會呢劑真係下面吾領情上面要用刑...言猶在耳話音未落今日即刻就搵番D舖仔祭旗，似是靈光一閃恍然大悟，向百姓們揭露呢班不知民間疾苦嘅小商戶斗膽有部份貨品賣得貴過超市，簡直禍遺蒼生罪該萬死...意下就係要眾愚民乘著財閥們新一輪撥亂反正廣告大肆催眠之際，趁機重投全為了你錫晒你屋企的財閥懷抱...
蕭痿會開頭諗住伸張下正義做D善事，等吾使成日比人話浪費公帑，到吾覺意開罪左班官紳要補鑊賠不是，無啦啦拎舊石頭㧜自己隻腳，呢舖真係搞到自己好似朱八戒照鏡咁真係怪得邊個？

交到貨

早前買落的Fuji DL MiniZoom 終於影完一筒，效果比預期中好，Fujinon Super EBC 果然沒有叫人失望。除了閃燈沒有預設，要每次開機都要先關閃燈外，一切都很就手好用，幾百蚊又執到部好野！


試機喎！點少得D貓呀。

呢頭係樓下飲完茶行出來就係我地面前炒車，好彩人就無乜大碍。


呢D係咪叫富士綠...

音質野

彈來彈去開始覺得有D單調，有呢種感覺嘅話就係時候買個效果器；太複雜的玩死自己，過份簡單的遲D又要比錢update, 想要多D效果又要價錢合理...最近看上了ZOOM的B2.1u Bass Pedal, 少見的紅色機身都幾有型，96Khz頻率採樣，24bit模擬，32bit處理器令聲音真實還原，47種音樣模式對我呢D菜鳥真係用吾晒，最緊要內置鼓機同tuner對練習很有幫助，USB接駁埠連接電腦錄音雖然吾關我事，但係有多樣野玩又吾係好拘！撞正Yahoo有人放，傾掂價錢就咪走寶啦！

天問

國家政府作孽太多，報應卻要在無辜的人民身上......
美國如是，緬甸如是，中國...亦不能倖免。
誰能證天有眼；縱有眼卻無珠，害苦了只能望天打救的百姓。

殺個日月無光

http://www.youtube.com/watch?v=qIoG6gweVB4&feature=related#

近排youtube成日死片，如果睇吾到可以試埋下面條link:
http://www.youtube.com/watch?v=Lyw2ZnbJsJQ&feature=related

上星期看了Ironman, 作為Marvel 自家成立Studio的第一砲果然沒有令人失望！眼見賣版權益人搵到盤滿砵滿，無左Spiderman, Fantastic 4, X-men同DareDevil等親生仔後，終於痛定思痛自己一手包辦，Fans們終極心願Avengers (Marvel的復仇者即係DC嘅Justice League眾義堂) 亦不遠矣！片尾的15秒預告，Avengers召集人Nick Fury已經叫定Tony Stark報名，看來即將上映的新變形俠醫同計劃開拍的雷神Thor及美國隊長最有機會組成第一代Avengers, 正邪大混戰，最快應該會係五年內出現！而家睇住CG頂下癮先！

Nick Fury

一街紅衛兵 有理說不清

以最少的聲音去申訴最大的願望；
用最大的力量去壓制最小的聲音。