連椅

香港出名茶餐廳，茶餐廳出名不是菠蘿油奶茶炸雞脾紅荳冰豉油餐...而係卡位。每次待應推介的不是當店熱賣，而係只要一聲“有卡位“，人便似有磁石般被吸進店內，所以話一張好坐嘅卡位係幾咁重要...不過成功誘騙閣下內進後，你都會因為"繁忙時間，請坐一邊"，由面對變並肩，而徹底失去坐卡位的義意...
某舊式茶餐廳僅存的幾張心相印卡座，全實木入筍超紮實手功貨，後面位人兄點屹都影响唔到閣下，好想要！

宣泄

文具變刑具...好想要啊~~~~

不爭朝夕

週日同一時段，兩間無料電視台都爭住請家庭觀眾食好嘢；霸道台銀強馬壯週遊列國帶大家食盡鮑參翅肚飲遍靚酒佳釀，弱雞台揸頸就命帶大家遠赴國內上山下鄉挖蚯蚓捉龍虱照田雞摘山草藥嚐盡騎呢怪湯水。一邊廂靚女們顧不得儀容爭嚐人間美味，那邊廂女藝員無耐強裝笑容淺嚐地道益膳。常言道要吃得苦中苦，但當處於一個逐名利愛獻媚的環境下社會中人事上，做人做同事做朋友做人世最怕但又最愛相互比較...只看今朝好彩數懶理明天一團糟。在急激快速功利主義裡，那還容得下韓信啞忍跨下之辱，轉身就要即時嚟個大報復。猛火快炒滾油炸，當然香口惹味卻熱氣無比；山珍海錯香氣撲鼻，膽固醇卻高得離奇。廉價藥膳慢煮慢炖味寡薄倖，不過先至係最滋陰補腎，打好個底先可方為人上人。

ironman2

今日終於有時間睇ironman2, 好明顯呢集係專為睇開Marvel嘅fans而設，亦順理成章擺明車馬帶出Avengers呢個萬眾期待嘅不日上映重頭戲。略知皮毛的我都未至於R晒頭...今集擺到明出場嘅S.H.I.E.L.D.組織大佬Nick Fury作用舉足輕重，而黑寡婦Black Widow直情搶晒桂莉芙栢德露啲戲！不過最驚喜莫過於隱藏出場的美國隊長同埋變形俠醫，當然少不了字幕後的雷神！不過老實說整部電影要帶出咁多人物事，打鬥場面便得犧牲一下，臨尾仲有啲草草了事嘅感覺，仲有...ironman suit好似人人都識整識用咁，係咪兒嬉咗啲？

薪火

小小刁民女教師，越級挑機尊貴政務司，只為普選兩個字。佢咁有型嘅背後一係唔想撈，一係想唔撈！層層打壓式算脹好快去到校長頭上，你有咁清高，佢郁你都無得say NO! 好彩本埠仲未有煽動癲覆滋擾尋亂找碴等罪項，唔係一個普通小市民頓變國內知名維權人！鋃鐺入獄要同葉繼歡瞓。不過我哋唔會被暴政嚇親，因為我哋都有一顆愛自由民主的心，一雞死一雞再鳴一代人傳一代人。

洪流

零三年到過沒有直通車的西域，其開發程度經已令人難以置信，下個月中再走一趟，相信已可媲美羅湖...年月受漢人欺壓的藏民面上，還剩多少撲實純真？一個個無污聖潔的土壤上，還有多少空間不受打擾可靜靜拍個照？漸漸被淘空的豐厚資源，有多少能回饋到原住民手中？答案縱在心中現實卻難面對，就由此行見證一下這無奈復無助的功利主義可以扭曲到甚麼地步。

不相為謀

曾特狗扭扭擰擰到最後關頭，終於開腔話唔(敢)投票...嘩！好彩啫，幾驚同你一般見識呀呢趟！

不屈服！516！！

到過茶果嶺的人，都對那兒的貓咪讚不絕口，牠們不會走避之餘更喜愛親近陌生人，令拍攝額外得心應手！但慨嘆的是小動物對人類失去警戒心時，便是變態狂徒犯案的最佳時機...所以茶果嶺村口的報告板上恆常貼有有關動物虐待的單張。
欺善怕惡，對手無寸鐵的生命施以毒手；無恥變態，對豪無反抗能力的弱小加以欺壓；高拜低踩，對偷生苟且的順民予以剝削；看風駛舵，對無權在手的人民不屑一顧；把握機會，向權貴還以顏色，改變勢弱不做弱勢，516齊齊公投反底！

若定

傳說...多數都係無中生有，仲會有啲誇張失實！好多時你信咗佢就會無啦啦被過咗一棟都唔知...所以時刻要保持清醒，冷靜分析。傳說嚟啫，嚇我唔倒嘅！

同道

好想睇不過唔會有人同我睇嘅 The Crazies，竟然係香港撞正Iron man 同Yi man檔期靜俏俏上映，譯作 "瘋殺禁區"的少眾口味，亦不難成為觀眾的選擇禁區了...
慘嚐Diary of the Dead的頹氣，還是對喪屍之父George A. Romero再執導演筒帶幾分疑慮，不過今次番拍 73's的The Crazies，大師轉為退居幕後製作，由撒哈拉導演Breck Eisner執導刀仔剧大樹，據說口碑不錯；但這類以病毒感染為主線的戲種，卻總不及Romero拿手的喪屍飽食秀過癮，幸好近日電視可以欣賞到上海世博搶票圍睹公安的國民，其猶有過之的癲喪失控失心瘋，足以彌補這少少的遺撼！

茶果嶺

佢尊翁綽號包頂頸，屋企住係茶果嶺...
偏安油塘一隅的茶果嶺村，是天空人瘋狂清掃下僅存的寮屋區之一。村內的歷史遺蹟與生活記憶不亞於任何已遷拆的舊式屋村，而其特有的背山面海地理優勢，必將成為日後癲價豪宅的典範。珍惜這裡的人情味盡早到這兒走走逛逛，莫待他日成為一幅幅冰冷的石牆時才悲悲嘆嘆...









敗瓦內，還見清末太婆獨守空房...