折翼鳳凰1：I believe I can 快

平安夜懶老定無做好準備就實出事！一早上咗廣州食完嘢去打的先知瀨嘢，人龍見尾不見首，的士卻得幾部喺站頭，等得車嚟都可以直接坐番落香港，唯有於車站外頭以本傷人比多幾十必有勇夫。不過上咗車唔代表順風順水，講嚟講去又係平安夜，就算國內無假放，但係人民經濟上力有錢就要搵訂使，梗係唔理三七廿一擁到街上向各娛樂場所報個平安。咁就搞到大街小路立交外環內環高速塞上塞，時間在流動車龍絲毫未動，由心急如焚到心如止水，唯一寄望係最後殺著：飛機晚點...之不過次次你早到佢遲飛，你遲到佢就雞咁腳飛，咁三條送機尾嘅茂利究竟一齊响度典地好定係問候工作人員兼拍打佢隻手好呢！？

折翼鳳凰：序

今舖真係衰多口，呢劑真係中咗咒！原本諗住他他條條hea幾日，點知惡夢就由miss咗班機開始！點解入境處無人幫到手？唔通有錢去留學真係矜貴啲？？

鳳凰旅

24號趁聖誕假飛去湖南張家界，其實係志在樓下嘅鳳凰古鎮多啲。因為張家界被圈劃出不同地形景區設施，行得入去就逐樣同你計，真係少個崩都唔使旨意全身而退。倒不如坐幾粒鐘車南下吉首直插鳳凰古鎮hea兩日，伴著沱江舒舒服服嘆杯茶，閒閒適適食得招積。兼且咁啱又遇著寒流，希望都可以過番個白色聖誕，不過如果遇著大風雪起唔到機，唔知我哋扭吓計揼吓地，政府會唔會派番架包機飛過嚟接我哋...呢？

食玩

我唔知呢啲係咩嚟，亦唔記得細個食咗乜嘢會送啲咁嘢...總之就係收埋十幾廿年又比我掘番出嚟。以前有機會買零食，一定以有嘢送為首選，因為好辛苦先有一個幾毫洗吓，一定要物盡其用，一次過實現幾個願望。唔似得而家嗌聲"軒哥"就有人塞錢落你袋！所以以前嘅零食好流行送埋啲無聊得嚟你又會被佢吸引到嘅嘢，由其是來自寶島嘅"乖乖"就深明此道！所送贈嘅小玩意簡直就係瘋魔一眾小學生，因為佢捉摸到細路們總愛認叻鬥一番嘅變態心理，所以响設計玩具上都係一啲可以响小息時候讓各路英雄比試一吓嘅玩意，而為咗得到呢啲神器，無錢嘅就死慳死抵，有錢嘅就買多幾包請無錢嘅幫手食，望能盡收天下神兵為己用...當然大家又要為那快來快去嘅新款式奔波，窮苦學生只能玩玩上手啲過期玩意，有個銅臭嘅就即時留意最新電視廣告睇準時機入定貨返學校威番吓！那年縱使沒有軒哥慷概嘅一百幾十i-phone科，但係就有大家發自內心嘅笑呵呵。錢，唔一定要鬥多。

公仔紙

那年的公仔紙與豹虎(金絲貓)，就是今日的爆旋陀螺與四驅車。四者都在兩個不同的年代裡擔當著為小孩渲泄暴力的角式。其實在那年代反而未真正玩過公仔紙，用什麼什麼技巧去拍番對手也只是道聽途說，反而留意的是公仔紙上的超人怪獸圖案，但風頭總不及印刷精美每張五角的七彩螢光膠貼吸引，難得扭計有嘢買就一定不會先考慮粗糙的公仔紙。這張已分解開的公仔紙是於卡片遊戲機及超合金當道的80年代遺物，被士多老闆用作墊層架用...見我咁有誠意問價就唔使錢比咗我玩，可惜保存不當而帶點破爛，大力拍幾吓也怕支離破碎，只能閑時拿來緬懷一番也。

預訂

番開柜桶底，搵到一啲陳年舊物，原來驚見我呢條孽畜都觀摩過唔少見證怖道會...曾經。當年神推神擁跟啲朋友去襯吓熱鬧，救贖與否同有無得著大家睇吓我個款就知，難得嘅係仲有儲埋睇完嘅飛尾，唔通諗住第時升咗天都可以當入場券，唔使上到去先話打個白鴿轉...

貓拍點滴

每逢行經街舖遇見貓，都會膽粗粗進店厚著面皮硬著頭皮舉機影貓兼逗牠玩玩。遇著愛貓店主更會主動吩咐貓員工擺好pose任影，當然要於不碍做生意之大前題底下才能如此大模斯樣...若遇上黑口黑面店主便要快手快腳兼要賠個笑影幾張趕快離開，最怕自身所作所為不幸遷怒於無辜貓兒身上，要連累貓貓被迫收監就真係講句唔好意思！如果個個老闆都好似深水埗這間石油氣火水舖一樣就皆大歡喜；為其愛貓拍照無任歡迎，還張貼電郵地址於當眼處著閣下send番張玉照比佢...係囉，養貓係一件開心事，養嗰個開心，影嘅又開心，連隻貓自己都開心，咁世界咪少啲紛爭！

貓狗𢭃一番

貓仔圓圓與唐狗阿旺是每朝乘車經過的報紙檔之忠實員工。圓圓每朝幫老闆娘壓陣，是一個正宗的貓形紙陣，壓在報紙上睡覺就唔怕紙隨風飛；而阿旺便是聯繫左鄰右里的親善大使，呆頭呆腦的牠雖然個頭頗大但卻非常善良，深得附近商戶歡心。一貓一狗就能譜出一街和諧氣氛，人人行過也會停下寒喧一陣，商場豪宅領匯邊會有此可能。

閃零

影相最憎用閃燈，有時情願唔影都免得左閃右閃。我認我無啲龍友大師毒男咁好功力可以飛到啲燈出神入化，既然懶得研究就無謂強出頭。
不過隨身愛用的Fujiflim爪拍機仔就永遠只會set死開機即閃，一個唔記得就比佢跣一嘢，輕則嚇親人，重則嚇親貓...由Tiara, Silvi, Natura到Klasse都承傳著這個斃病(對我嚟講係)，要到Klasse S/W先叫有改善...其實只要好似GR咁有個手動制就好易話為，不過Fujifilm係要懶係全自動巴巴閉智能操作就要犧牲一點人性設定，雖然到後期識得浪子回頭，但係就遇上數碼洪流，搭載Super EBC的菲林銘機希望唔會就咁走到盡頭。

meow....咁閃法點瞓呀大哥！！

不過到咗數碼新機F300EXR又嚟一招開機彈閃燈...真係失驚無神嚇親人

牛糞上

這三支不同時期但都係响日本揹番來的Bass, 它們不幸地落在一個不太懂彈奏但偏愛耍酷的茂利手上，下場就係...右邊的已廢掉，中間的廢了七成...左邊的每日把玩中，看來離死期不遠矣。

看朝

究竟係：唔比錢？打劫！定係：打劫！比錢！
武裝挑釁主權爭議擦槍走火以至睇閣下唔順眼搵機會開拖時有所聞，之但係爛仔國話你救助物資比得少比得慢係其中一個向鄰居打炮顏射原因就真係離奇過星爺啲戲...雖然佢哋班友唔講道理就如汔車維修員隨身帶備士巴拿咁合情合理，亦即係比條燈柱啲狗都真係好難忍到唔射番篤尿；之不過如果我行行吓街比人揼嘅話，我真係情願你話我靚仔得滯都唔好話我因為啱啱扶咗嗰阿婆過馬路呀......吓嘛！

天凶之城 Skyline

生存題：打不死的外星人入侵，你會冒住被吸走的危險出外逃亡，還是留响室內等人拯救？
啊！原來出外與否都會被人吸走，留响邊度都唔會有人打救...
勁屈機無限復活外星人遇上竭斯底理地球人，少不了的緊張戰鬥場面真的很少，口水不用多的對話場景又真的很多...角色無特質無個性如途人甲乙丙！成班人無無謂謂走上走落慳皮製作又拍不出壓迫無助絕望感。設定左抄右抄天煞強戰世界殺人網絡末世凶煞大匯演，虛張阿凡達特技還不如十年前的ID4...還好值得慶幸的是沒有3D特技，慳番幾十皮可以買包爆谷睇戲！

色影

Pentax Kx帶起的機身色彩革命順利完成，現在漸漸交捧給更誇張的Kr。但Kx臨行前餘威猶在，與日本女子美術大學玩設計比賽，優異作品仲會係銀座展出添！





好多貓呀！yeah!!

冚嘉剷地齊劈樹

菜園村被政府茅招陰乾；南生圍快將淪陷；鳳園地盤越逼越近；馬屎埔村屋塌得就塌...美國QE2剛剛實行，趁泡沫經濟還未爆破，發水樓仲係合法不過，快快剷平新界港九，起多幾十百幢矜罕靚樓！

人形蜈蚣 The Human Centipede

終於有時間睇咗網上鬧得沸沸揚揚的人形蜈蚣 (The Human Centipede)。其內容與評論於網上搜尋得多的是，在此無謂重複又重複咁大呼小叫什麼變態嘔心搵戲嚟做，皆因睇得呢啲戲唔夠變態嘔心就真係搵戲嚟做(已經比想像中輕手)。係度不如補完一下製作人形蜈蚣嘅幾點要注意嘅地方，好讓海特醫生來世唔洗比自己隻竉物玩死...
人形蜈蚣是將三個成人串聯起來，要切除膝頭韌帶使其不能直立只宜爬行，之後便是用手術將適格者們以口接肛門的方式連合起來，但製作前最好先留意以下幾點：
帶頭的最好是沒有正常心智的，如像片中的宅男為著那勞什子的幾両尊嚴而自尋短見便真的搞到蛇無頭不行。而且有正常思維的必起反抗心，看海特醫生最後被弄個雞手鴨腳可知一二；
又是帶頭的，一定要多吃牛黃解毒片，防止大便結秘兼無咁熱氣，對中間(即係佢後面嗰位)進食時都週到啲，一來保證有得供應，二來供應物未至於太結實太難下嚥；
中間及包尾的一定要確保呼吸順暢不能有鼻塞，咁人哋個口真係唔方便嘛...；
中間，由其是包尾的一定要多打營養液，啲好嘢都比前面隔晒渣，都係無謂等放飯；
由於包尾的確實無啖好食，為保存其體力，建議裝上滾輪輔助行走；
若前頭是雄性便可將尿管引導到後者口中，起碼後面有啖水濕吓口；
如果前面是雌性的便要留意經期，如果唔係真個一面血比佢搞到...解決辦法是折開跟尾者的口較一次過接合肛門及陰部，一來可減少前者月事時對其造成之不便，二來跟尾的隔中有紫河車補身，命都長啲；
仲有......講唔到嘢嘅女人依然會好煩，我諗醫生下次一定會割咗佢哋條聲帶...。

勞師動眾整條咁嘢搵自己笨，不如睇下呢套跟風玩嘢之作：性愛蜈蚣 (The Human Sexipede)，其69式連接更令人嘆為觀止啊！！(呢度唔上三級圖啦，自己search吓啦)

狗瞓

去旅行多數影貓，但今次桂林貓多是閃的閃避的避，相反懶洋洋享受著日光的多是大唐狗，就拍下牠們給愛狗的同事吧。(前兩張內子拍得不錯呀)

刪罪請安

買毒奶粉險死了一次，為受害者出頭又要死一次...個個話大陸啲人無厘德行自私過人，正正就係响國內萬萬不能當個正常人！你要維權佢要維穏，你要爭論佢要和諧，你想大鳴大放佢就毒箭暗藏。地滅天誅的從不是殺人放火，屍骸不保還有誰去修橋築路。老虎天生就曉用口咬人，蛇要自保難免要將毒噴，生於非常時地自要有一技傍身，正如一出世阿媽係教你衝入車廂爭位執輸行頭慘過敗家嘅意識形態下，長大後就從來無諗過禮讓他人更遑論會見義勇為。鬥理性不如鬥拳頭，鬥拳頭不如鬥富有，就如今日教區都要向魔鬼致歉底頭，免得捐款無啦啦响手指罅漏走...香港文明如斯都如此反智，難怪國人都愛禮義廉淨係無恥。

MACHETE

罪惡城導演羅拔洛迪格斯幾年前同昆頓塔侖天奴玩轉經典B片的"玩命 飛車 殺人狂" & "索女 喪屍 機關槍"，點會咁易夠喉，直情要將其執導的"索女"播放前的假預告片“MACHETE“ 弄假成真(其實都預咗)！不過就無預佢竟然搵埋荷里活一線巨星幹這敝渾水，實行巨星齊喪B；羅拔迪尼路，謝茜嘉艾巴玩得不亦樂乎，仲有爛片之王史提芬史葛就真係拍爛手掌！演過阿凡達女兵的米雪露芝姬絲更是好身手之餘又性感可人。
“MACHETE“ 彎刀／殺千刀；這齣電影由始至終都是一場效忠與背叛的遊戲，男主角兩次被出賣到走上復仇之路，而片子裡描述的墨西哥黑工的被利用與捨棄，既得利益者的虛偽與自利，上至政客下至黑工都無不為己損人...但由此亦反射了一個為墨西哥人偷渡的地下組織無畏精神，直情是黃雀行動的實體。透過一路的忠誠卻被陷害，由懷疑卻生憐愛，被靠害到復仇單挑到群毆，全片的分鏡剪接到所謂特效，就是為B而B...所以痛快倡狂暴力血腥一定唔會令大家失望，更何況唔多唔少洒番啲鹽花，令大家肉緊之餘又適時輕鬆一下...



淨係謝茜嘉艾巴係片中嗰僅僅幾秒噴血演出，作為男人點可以錯過！！

桂林 陽朔

極速一轉桂林陽朔，坐了膠管摩打竹伐遊漓江，遊走了興坪與大墟兩個古鎮，踩單車經過遇龍河月亮山，到了以紅葉著名但一片紅葉也沒有的古東，穿梭於倒模步行街，吃了兩次名大於實的米線...沒有探索七彩射燈岩洞，沒錢看印象-劉三姐，更不願附錢看被監生圍起來的景點，平常心走平常路，沒遺憾未有到過那裡那裡，只因到過的景點貨辦其實都不對...

寧得罪篤屎 莫得罪超人

去完一小轉旅行，原來我們港人敬愛膜拜錢能通神比神更神的李超人响哈囉喂期間，比區區一個教區神棍揭露咗佢真正身份，即時龍顏大怒且怒不可遏，打算用半條鼻毛告盡人哋副身家，誓表清白得雪沈冤以昭日月！平時敝網誌對李氏一干渣滓愛護有嘉，都睇怕係時候比人整治一下...如果見一排敝站無update就多數已經比人封查，又或者我要保外就醫返一返鄉下...

桂林山水夾硬嚟

今個星期有一日補假，唔好嘥！夾番個六同日，星期五收工即飛桂林玩足三日三夜！落點是桂林，但目標是陽朔及沿途的古鎮。桂林被開發得體無完膚，甚至有道著名的景點已被重重圍擋，焗住大家要附費觀賞。小學時教科書上的象鼻山駱駝峰七彩射燈七星岩真係少個崩都唔使旨意瞄一眼！被市政府包銷的漓江遊更加食水深，更不用說張大導的印象﹣劉三姐歌舞秀...
不過志不在此亦無謂介意，但求比我舒舒服服行行企企吃吃喝喝，看別人不看賞他人不賞，唔好比人咿咿哦哦就已經當中咗奬！

乾物類

家中防潮柜無啦啦失靈，濕度計長期劍指臨界點，為保柜內神器能繼續保持乾爽正常運作免受霉濕感染，十萬火急下出城重賞徵召新柜一個頂替，以免血本無歸。老遠托咗番嚟同舊嘅換位一睇......原來係鬆咗插制！都怪一時情急曾sir講乜都唔記得；凡係電器有親頭暈身㷫梗要檢查電源是否正常就為之基本維修第一步！老貓故然燒了鬚，仲要多咗一個防潮柜响屋企獻世，唯有趁早入定啲海味乾貨，橫掂有個好位存放恒溫保鮮又乾爽！就唔使臨過年先同人迫年貨買貴餸啦！

十月圍塘

鮎魚果然超強，令打工仔超強期待亦超強失望，除令李氏力場更聲名大噪（或是聲名狼藉）外，似乎比一般颱風仔更無睇頭...天文台依然都係淨識靠嚇，一時不能小覷一時又話會番轉頭，原來最後都係路過就走，唔通阿鮎魚san真係驚咗我哋獨有嘅屏風樓，會比佢圍困一團有入無走，迫住要買番間長期居留？？

休息為要走更遠路

今年公司提早進入搏殺期，漫漫長路晚晚長夜要與同事及客戶週旋。希望仍有機會間歇地計劃一些國內短線遊，叉足電又再上路，咪淨係响度日做夜做...

雷聲大

同事們call咗老麥嘅新產品推廣New York Taxi載你去食包服務，以為有幾霸氣，原來只係一架Corolla改裝車，莫講話真正美帝福特通用雪佛蘭，就連本地原裝的士大皇冠亦將它比下去！司機唔知訂要我哋呆等幾個字不特止，所謂優惠都只不過係四個人共享一張買汽水送一個包coupon咁大把...勞師動眾搞宣傳就好心咪㩒住個荷包，請人食嘢同請人做嘢都一樣出手咁寒酸，個包有幾好食都真係無去幫襯嘅打算...