食玩

我唔知呢啲係咩嚟，亦唔記得細個食咗乜嘢會送啲咁嘢...總之就係收埋十幾廿年又比我掘番出嚟。以前有機會買零食，一定以有嘢送為首選，因為好辛苦先有一個幾毫洗吓，一定要物盡其用，一次過實現幾個願望。唔似得而家嗌聲"軒哥"就有人塞錢落你袋！所以以前嘅零食好流行送埋啲無聊得嚟你又會被佢吸引到嘅嘢，由其是來自寶島嘅"乖乖"就深明此道！所送贈嘅小玩意簡直就係瘋魔一眾小學生，因為佢捉摸到細路們總愛認叻鬥一番嘅變態心理，所以响設計玩具上都係一啲可以响小息時候讓各路英雄比試一吓嘅玩意，而為咗得到呢啲神器，無錢嘅就死慳死抵，有錢嘅就買多幾包請無錢嘅幫手食，望能盡收天下神兵為己用...當然大家又要為那快來快去嘅新款式奔波，窮苦學生只能玩玩上手啲過期玩意，有個銅臭嘅就即時留意最新電視廣告睇準時機入定貨返學校威番吓！那年縱使沒有軒哥慷概嘅一百幾十i-phone科，但係就有大家發自內心嘅笑呵呵。錢，唔一定要鬥多。