黃泉路 咱們一塊走！

阿扁離開萬人之上的總統府啷噹扣押入看守所時茶飯不思面如死灰
團團圓圓離開舒適的居住地飄洋過海到了彼岸後不思茶飯瘦咗個圈
.
.
.
特偵隊除了要加緊調查李登輝外，兩隻大熊貓亦都好大可疑，只係等阿扁幾時篤佢哋出嚟啫...

母語教學勝利的科學認證

平衡宇宙論係假設人類可以乘坐時光機改變過去與將來，但係改變嘅只會係另一個平衡宇宙嘅未來(即係同時多咗一個時空同步運行)，而回到現在的時空仍是絲毫沒有改變的。但本地有一句詞彙卻能無限伸延，同時間可能跨越三個時空，另平衡宇宙秩序大亂，霍金都解釋唔到...

過去式：以前曾經介紹過，不過驚你唔記得。又或者舊時介紹漏咗，所以而家同你"介紹番"！
現左式：今日有緣撞見閣下，又同你咁投契，等小弟家下"介紹番"啲好嘢過你！
將來式：從來都無同你提起過，亦都無介紹過，咁就要"介紹番"比你啦，不過你今日唔得閒，咁等第日再"介紹番"啦！


仲唔明？咁我下次再"介紹番"囉...

九九九...誰是凶手？

迷思一：近在咫尺的醫院正門，原來比天國大門還遠...
迷思二：按章工作其實無錯，但心臟病發時重要的是盡快找人按心臟。
迷思三：車道比行人路遠，病發時記住第一時間棄車步行。
迷思四：大家對醫院文員期望著實過高，正如我老細請我番嚟都無預我識整車。
迷思五：999不宜濫用，要留番條線比到咗醫院不得其門而入嘅市民...
迷思六：急症室器材太大件不宜急用，高官人工太大份不知怎用...
迷思七：沒有心的官員們當然不會知道救治心臟病患者要爭分奪秒。
迷思八：警署前被老笠，消火局前有人自焚，飛虎隊面前被劫持......等陣，請先撥999!
迷思九：大家唔好再鬧周一嶽，呢鋪真係唔關佢事...其實人類嘅事關一條廢柴咩事？

國殤

當年隨克林頓一起入主白宮的總統貓Socks, 現因年事已高病重垂危，大家可以到以下網址為牠打打氣喔！
http://www.usnews.com/blogs/washington-whispers/2008/12/12/clintons-socks-the-cat-near-death.html

蛋 ‧ 道

80年代的兒時玩物變形蛋蛋，家下又再改良復刻，變得更kawaii~ 。市場轉移向消費能力較高的女生們，更推出類似"啤抜"的一式多樣，將那年頭的陽剛味徹底剷除。猶記得當年玩的都是老翻蛋，主力角色多以男性向的恐龍猛獸或機械人等，包裝只是用半張收縮膠包裹著唔散開就算，但係因為老番質數差，玩玩下都係會散滿一地...但係喺那時全民皆變的變形金剛效應下，買唔起老變玩具，都要擁有番對蛋蛋，先至係男士像徵嘛！

至暈飯局

呢間喺上環太平山道同四方街交界嘅廣記食店，表面上係一間涼茶舖，實則係一間車仔麵店；你以為佢賣麵咩，佢又似一間中藥店；當你認定佢係一間中藥店時，佢又似一個唐樓單位；你以為自己喺人哋屋企嗰時，原來你坐咗响地舖...奇哉！奇哉！

有志者 鄧竟成

呢個Project係比神舟太空船更早企劃的，家下摷番出嚟勉勵下各位失意嘅香港人，只不過係想話比大家聽：只要夢想，凡事皆可能咁啫...
鐵甲萬能俠嘅鐵甲飛拳喺動畫入面擊倒過唔少機械獸，咁威猛嘅戰績，梗要抬出嚟蘇吓哥利，順勢宣示一下大日本帝國嘅雄厚軍事力量！



試射當日特邀主題曲原唱者水木一郎即席獻唱吶喊助威！



當水木氏激昂地唱到“發射吧！鐵拳！Rocket Punch"嘅時候，亦都係飛拳痛擊敵人嘅時候！




鐵甲飛拳射九里...咁遠嘅精彩演出，連曾志偉都問有無得重播...咁捧場，整多個大特寫過你哋睇吓又點話！

有嘢扑

有新嘢梗要第一時間品嚐！
RoxRobotRabbit :
http://roxanama.blogspot.com/

......扑啦喂！！

擺堆

Carrie Chau 於聖誕期間喺似是而非嘅公共空間：時代廣場，搞咗好大堆頭嘅展覽，但係都無阻自由行嘅購物熱情，行得攰，咪坐係D雕塑度攤下囉，大聲D講下電話，戙埋隻腳上去搣番個橙，吹水煲煙吐下痰咁都唔拘啦，嗰度大家都有份㗎嘛！

創新戰隊

連科大校長朱經武都癲埋一份嘅港台節目--創新戰隊：以介紹各種港產高科技及打倒退步獸為己任！制作都尚算認真，戰隊姿態動作流暢做足功課，巧妙地將沉悶題目娛樂化，是近期最睇得過嘅港台節目之一。

TVB Wed 7:00pm

包機唔係亂咁飛

香港龍頭航空公司預期出年業續都係會麻麻，正愁著苦無出路於進退維谷之際，商機忽從天降；泰國的政治動蕩令淨係識得去旅行貪威識食嘅香港人無限期滯留，於各國爭相徹橋之際，特區政府卻以官商勾結為先的治港理念下，縱容財閥每日有限度有條件慢慢接載有本事的港客率先逃難，圖將一票難求的機位限量發賣，有傳開賣$4,000蚊淡季單程走難價，食水深到來回日本連酒店卓卓有餘。有理由相信隨時間流逝政局急劇轉變各國橋胞走得七七八八後，可憐港客仍大批滯留險境，急如薩拉熱鍋上的螞蟻。由開頭企硬抗衡大商家，靜待港府伸出援手之風骨，隨著危險迫在眉睫，而港府伸出的卻只是一條舌頭之際，無奈下亦要低首奉上頸項被斬一頸血，只為盡快遠離險境回港一聚久違的天倫。可就在此時，港府為商界展關懷而設的加快減慢機製即時啟動，走佬機票此際已彪升上天價，財閥的血口殺傷力比拋進人堆的手榴彈猶有過之。不過鬧時鬧，港府始終是倦顧著香港市民以民為本的，此際遂以救世主之態，特別推出先上機後付費回港慢慢同你計計畫；讓納稅人先為閣下繳付費用預財團，後坐收優厚利息入庫房補貼庸官高薪厚祿，懶理去一次旅行就債台高築嘅小市民，咪當突然多一班還唔到'關窿'嘅大學生。此為一舉四得之通贏大計：一贏航空公司逆市業績創新高；二贏落難港人合家團圓；三贏港府英雄出招救蒼生；四贏頻臨崩塌的銀行信貨業務得以重生..............


全盤計畫天衣無縫，正當按步就班順利進行，卻走漏一個歸心似箭而白白送命的小市民，搞到李少光都不禁回應你一句：~咪玩啦，香港人！

太空黨

神七太空人又被特衰政府滾搞，嚟香港搞肉麻騷；為表誠意，特派出7/80年代我哋眼中嘅太空英雄......四洲太空免同四洲太空鼠去接機。好過你嗰班晨早起身眼屎都未抺乾淨嘅小學生九流流喺度Fing旗呀，佢兩隻嘢對手同個頭都一樣Fing得下，唔失禮㗎！

Day16:追趕跑跳碰 星期一又要返工

16-10-08 英國倫敦--17-10-08(3:30pm)香港
作晚乘廉價航空於今晨12:00am到達英國Gatewiak機場，由於眾人都非常疲憊，不想慢慢轉火車出倫敦，於是便一擲千金顧用的士直達，爽係好爽，不過非常昂貴，有生之年都未必再試...約2:00am到達已預訂好的酒店，這裡的酒店是行程中最貴但又最殘舊的；無法啦，離開價廉物美嘅東歐之後，真係少個仙都做唔到人。左搞右搞到4:00am終於撻得落床瞓覺，8:00am還要起來吃早餐呢。
早餐後乘地鐵到泰晤士河沿河遊覽，下午以最短的時間乘地鐵四圍逛，行到散晒，臨上機前買咗個唔食唔算嚟過英國嘅炸魚薯條充饑(其實又乾又鞋都唔知有乜好食)，裙拉褲甩下飛撲往希斯路機場，推著行李奔跑間整包炸魚薯條跌到一地都係，邊執邊check-in得嚟時間非常緊迫下又上到機(9:15pm)，正好為我們這次趕頭趕命的東歐之旅畫上句號。






沿岸大興土木，希望唔係咩豪宅項目



對於頻臨破產的我們，坐一次都太奢移...


很有型的路燈，連白鴿也愛上



佈防森嚴的泰晤士河上空的AH-64阿帕奇



經歷韓戰後退役下來的"貝爾法斯特"號，現於河上供人參觀，當然又要比錢...




亳無飲食文化的炸魚薯條

Day15：食得好時走得早

15-10-08 捷克布拉格--英國倫敦
晨早起來去歎番個預謀已久的豪華早餐，目標是享譽全球百多年的捷克Cafe Louvre, 最高級的用料配以最上等的招待；沒有半島陸羽拒人於門外的感覺，也沾不上半點阿一飽魚暴發自由行財大氣粗的喧鬧，彼此就是尊重週遭雅緻的氣氛，而這種難得舒適的氛圍亦是靠大家相互尊重而得以建立。悠閑地享用過既優雅又尊貴的早餐後，馬上便要回復打甩脾港客血拼真面目，皆因剩下不到半日的時間裡，要全力出擊撲殺，把握東歐最後一站掃個天番地覆...趕乘7:00pm往倫敦的航機。
Cafe Louvre門面其實好普通，行過咗都唔覺嗰隻



冧裝咗唔知幾多年嘅捷克最佳餐廳



格局唔使要豪華，唔使要浮誇，最緊要係唔好變






搞咁多嘢，其實只不過係食個捷克或其鄰國的傳統早餐；享受這份堅持了百多年的傳承...即係話，我飲茶想食雞球大飽多過素翅花支果凍蝦餃皇囉



古城廣場的天文鐘，每小時報時前都會吸引大批遊客聚集欣賞十二門徒輪流出場，但卻換來每小時的一陣炒蝦拆蟹聲...(咪就係流得滯囉)