裡外不是人

坊間小商舖貨品比吸血超市價平根本就係一個不足為道的事實，但早前蕭痿會煞有介事地大鑼大鼓為民請命，教導蟻民要擘大對眼認清賊寇貨比三家煲湯隔渣格靚個價，千奇咪誤信超市至底出位慳得多皇牌著數價云云。欲以一副亂世英雄救黎民於水火反財閥為己任之態等待市民如雷掌聲之際，一眾突然腳趾尾"慘"刺的財閥，頓時沖冠大怒兼鳴冤撃鼓賊喊捉賊，火速登報澄清上電視聲明，兼觸動埋政府高層神經，蕭痿會呢劑真係下面吾領情上面要用刑...言猶在耳話音未落今日即刻就搵番D舖仔祭旗，似是靈光一閃恍然大悟，向百姓們揭露呢班不知民間疾苦嘅小商戶斗膽有部份貨品賣得貴過超市，簡直禍遺蒼生罪該萬死...意下就係要眾愚民乘著財閥們新一輪撥亂反正廣告大肆催眠之際，趁機重投全為了你錫晒你屋企的財閥懷抱...
蕭痿會開頭諗住伸張下正義做D善事，等吾使成日比人話浪費公帑，到吾覺意開罪左班官紳要補鑊賠不是，無啦啦拎舊石頭㧜自己隻腳，呢舖真係搞到自己好似朱八戒照鏡咁真係怪得邊個？