眼高...手低

今天看了兩部cult片，一部是被昆頓塔倫天奴奉為神枱作品：74年的"They call her one eye", 另一部是新晉導演井口升矢志要成為未來cult icon：08年的'The machine girl 機關槍少女"。
兩部相隔三十多年兩個年代的怪片，故事都係犯駁無聊搵戲嚟做；同樣是講述單純少女受凌辱後對仇敵所作出的毀滅性反擊；一個在過程中失去左眼，一個則是被仇家砍去左手。一個痛定思痛苦學飛車格鬪射擊將敵人殺過片甲不留，一個不屈不撓裝上各種武器義肢打到仇人落花流水。不同的是"They call her one eye"瑞典藉導演Bo Arne Vibenius當初只是以自己的風格去處理一部低成本色情暴力虐殺片，但卻估吾到幾十年後被奉若神明，而當中幾個場口及慢動作轟殺敵人的拍攝手法亦被視為經典。而相反，"The machine girl" 導演井口升就是為暴力而暴力，怪雞而怪雞，要幾殘忍有幾殘忍，要幾血腥有幾血腥，極盡變態之能事...雖然部份設定亦頗具創意，但未來要與經典一詞掛勾，只怕有心而無力...加上三十多年前"One eye"女主角手持custom雙管槍的造形竟比"Machine girl"的橡皮機關槍有型，你都咪話吾弊！

無心插柳，幾時都好過早有預謀。

孖精

樂隊正要番玩Radiohead嘅時候，講過死不出精選嘅佢地，剛離開舊公司嘅EMI，就即刻幫佢地記念下兼攞番個彩；雙CD及DVD "The Best of"，就咁出咗世，我諗Radiohead行得轉會呢一步都預咗比人出賣擺上枱，不過就正好合晒無買開佢地D碟但又聽過下佢地D歌嘅我，加埋早前買到勁恨佢哋出精選嘅Sex Machineguns，呢個月做人又有番D寄托...

醫神

泰國某村落嘅一隻牛媽媽，吾覺意生咗個畸胎，面目模糊但四肢健全四腣踏雪，仲具有人類嘅體形姿態，兼有個可愛嘅肚腩仔；戴番頂禮帽就十足One piece入面嘅船醫馴鹿索柏，可惜不幸胎死腹中，如果吾係第日長大學埋醫術救助眾生，D村民就真係要當佢生神仙咁拜啦！

再培訓...

1. 良好晉升機會：成績優異者可接受改造手術加強戰力。
2. 醫療及保險完善：與拉打戰鬥受傷可獲專門治療；若不幸殉職，遺屬亦會得到合理賠償。
3. 充實的研修體制：有機會到Shocker於世界各國的秘密基地作海外交流， 增廣見聞。



......大家努力D做好呢份工，到有機會被進一步改造嘅時候，記住要係腦手術之前逃走，咁就可以成為新一任幪面超人嘞！！

Update!儍仔機！

一直都想更換幾年前買落的DC仔Fuji Z1, 但一直未有心頭好，就係臨計劃去沖繩前 (我強調仲係計劃中)，Fuji就出咗F系頂級機：F100fd!!
買機仔只得幾個牌子可以選擇，Fuji一定係首選，其super CCD配搭Fujinon鏡頭，相片質素係機仔領域可以話係無敵手，奈何焦距一路下來也沒有28mm，令我只得牙癢癢，當對手們已搭配25mm以至24mm時，Fuji第一部28-140mm 5部光學變焦終於橫空降世！super CCD用上最新的第八代，更配備只在高端機種(S5 Pro)出現的高達400%超寬動態範圍，使高反差位的層次出番晒嚟！而其他必然大路功能都有齊咁滯，再加上專為F100fd推出的潛水殼，吾攞佢去沖繩試水，嗰度D咁靚嘅珊瑚同魚仔都吾會放過我！

地球先生無病，有病嘅應該係大家...

返工時免費報紙有幾多攞幾多，外賣飯盒膠刀叉匙有殺錯無放過；
公司會議室用完離開時永無熄燈；係行最後嗰個無手尾定係個個都闊佬懶理；
枱燈收音機低耗電量產品更加無人過問，下下開著就行人；
日頭hea, 晚上無止境開夜；又或開兩粒鐘OT要Book夠四個鐘冷氣，係咪對公司有報復心理，不過地球先生並無得罪你；
但係最凍嘅冷氣，卻換來最大嘅傷風同感冒；
用紙無節制，Briefing 一大叠無無謂；吾係叫你一定要雙面印製，不過一張紙吾係淨係print一個logo仔；
未返到公司部電腦就自動開著等你，但係收工又吾會自動熄機，擺埋D係人都吾信嘅空城計，係咪D同事心虛有鬼；
無人要求閣下完全環保，就算盧冠廷都做吾到，只求一人行半步...呢個世界已經好好。


有一千個借口但求就手，偏偏找不到行動的半點理由。

貓語

這隻在我家對面熟食檔盤據的黑貓，是附近一帶的大哥，不怕人的性格令大人細路行過都爭住摸下佢，逗佢玩玩，有時直情坐係路中心休息，毫無仿備心...幸好至今牠都是遇上友善的街坊，而因牠受歡迎的關係令到很多人主動餵飼牠，更令附近的貓貓受惠。
動物不但祇對人沒有加害之心，更很樂意打開心扉與人為朋，可恨的是人類特有欺善怕惡基因，令應該似人的不是人。

原來真係有人將天山雪蓮插係牛糞上...

期盼越大，失望必然越大，相隔9年，唐朝樂隊20年內第三張大碟"浪漫騎士"已於國內上市，在網上流傳的超核突低智小學生作品般的CD封面，如惡夢成真的出現於大家眼前！！！個個粉絲真係O晒嘴....售價屬鑑聽級的100元人仔(國內CD一般都係30-50蚊內)，效果出來竟有雜音！上一隻"演義"CD壓盤功藝奇差，連樂隊亦開聲表達不滿。今次唱片公司玩隆重其事精雕細琢力瑧完美，但終極馬虎效果終招來各方聲討，連精裝版附送的贈品亦被彈到一文不值，粗製濫造.....
在音樂構成，編曲製作，錄音監控等樂隊可控制的前期工序，我絕對相信唐朝是一絲不苟，對得住樂迷，交足功課有餘的，耐何急功近利，目光淺窄的發行商一次又一次糟蹋國內百年難得一遇曠世組合。我哋呢D餓咗咁耐嘅死忠，邊鬧邊痛心之餘又不能不乖乖奉上血汗錢認購，望就望滾石可以買咗個港台發行權，重新執執隻碟先出街，吾使焗買大陸版啦......
封面太無厘頭，係度出番張合照算啦...

呵他踢

母親大人從北海道遊玩歸來，原機空運兩大箱新鮮帶子肉，隻隻拳頭咁大，肉質異常鮮味，入口甘甜仲隱約有陣北海道海水味。晚晚飯後都劏番幾隻做甜品，搞到出街食壽司都睇吾起人家嗰D帶子仔...
我地呢D見識少，咪就係咁易滿足囉！

肺腑

以下是節錄自大陸某網民的帖子：
1. 遇到乞丐，討錢的給他飯，討飯吃的給他錢。
2. 車上遇到老弱傷殘孕婦，讓座的時候別動聲色，不要大鑼大鼓。站起來用身體擋著其他人好讓有需要的人可坐下，然後假裝下車走遠一點。人多走不到時人家向你表示謝意只要報以微笑便可。
3. 下雨，天冷的傍晚，遇到賣菜或水果又剩下不多不能回家的，能幫忙全買掉的就買下，不能全買的也買一份，每人小小舉手之勞，讓人家早點回家休息。
4. 遇到迷路的小孩或老人家，能送回家的送回家，不方便送也送上車或代找找警察，至少幫他們打個電話也行，反正月費是用不完的。
5. 撿到錢包試找找失主，如果真的等錢用，起碼也要還人家證件，失主這時候一般也不在乎那少許金錢，記下人家電話地址，他朝發財時記著道個歉還人。
6. 遇到叫賣的小兄弟，他們賣什麼就幫他們買一些，如果不是家有困難，出來打工也需要勇氣，鼓勵一下他們。
7. 遇到半夜擺地攤的，能買多一些就買多一些，東西不太貴別還價，家境好誰個會大冷天夜里擺地攤。
8. 若果銀根鬆動，別包二奶，領養幾個山區小孩，心里舒服點好過終日提心吊膽。
.
.
.
.
.
.
9. 這是我自己加上去的：知易行難，遇到上述情況，當機立斷，行出第一步再算，稍有猶疑便會一事無成，人幫不了，心裡亦不好受......試得多。

世情

落井下石，袖手旁觀，煽風點火，雪中送冷，
加鹽加醋，挑撥是非，無中生有，見利忘義...
一方有難，八方不一定支援，
撇除國難，回歸現實的真正中國人，
當閣下一方屋漏時，可以是八方風雨的...