達人貧道

响攝影論壇上面啲大師為咗吸引坊眾欣賞其伯母原來係雌性論述，對揸住部機影張相嘅消閒活動煞有介事咁作咗好多新名辭；什麼攝影禪，攝影之瞳，感覺系，自我先決...似是而非故弄玄虛一番。爭啲㩒吓失打都要查三世搵埋蔡伯勵...原來整色整水長篇大論之後都係離唔開嗰幾樣："觀察"，"隨心"同"多練習"。個個自我介紹都扮謙虛，但係吹起水上嚟就唔會抹咀；其作品大多係一句慨括之謂"曝光正確"而已。無深度無難度之餘都能贏得各路粉絲回應，大家都唔會吝嗇讚美之詞，令作者自我感覺良好飄飄然，下次又作多一堆古怪前衛新類型諗法惑眾......先可以將光圈快門呢啲咁簡單嘅事响網絡世界長久奔馳。