革他媽的命

因超反建制(國內即被演譯成反共革命宣傳煽動罪)被中國追緝兼扣押財產繼而流亡台灣的中國樂隊：盤古，徹頭徹尾體現Punk Rock是如何運作！香港果D無的放矢，無病呻吟自稱及標籤為"龐克"的MK band，真要好好自我教育反省一下。
盤古到了台灣除了繼續反共外，更索性搞埋台獨！他們的歌跟大多Punk Music一樣，都是簡單的旋律和粗糙的技術，配上辛辣的歌詞，向權貴建制作出鞭撻控訴；仲有...
盤古樂隊英文名譯音就係叫：Punk God啊！

部份歌詞節錄：
《有槍誰都能幹掉》
你不就欺負我們沒有槍嗎？
就是因為我們沒有槍才讓你壓在我們的頭上。
我們一定要有槍，
有槍誰都能幹掉......

《最近應該死幾個人》
最近應該死幾個人，才能解我心頭恨。
死幾個好呢？死誰好呢？
你們真能活，你們真能活........

《我第一次到人間》
我第一次到台灣，
我第一次到了人間，
我第一次離開中國，
我第一次離開地獄，
我第一次離開絕望，
我第一次見到了自由......

帶住呢隻CD番大陸被人搜到吾知洗吾洗坐番十碌八碌？

我的青春小鳥一去不回來

平安夜，食好野。吾想同D MK仔女迫，唯有係屋企食，吾使點花功夫既Sabu Sabu就至好，食吾起和牛，平D既加拿大牛都係幾好選擇，來多盒紐西蘭羊肉，湯底要日式華雞湯，加兩條日本大䓤同燒豆腐...雙璜生抽，日式麻醬，酒水...全部係Citysuper搞掂晒，返到樓下買丸類菇菜 。沖乾淨涼擺好個陣慢慢歎！記得扭開電視睇住班MK食住風起勢迫吾知為乜，咁餐飯就更滋味。

ROCK ON!!! The Dragon

日本各不同風格單位集結，"The Dragon's Walk On"...將李小龍每齣電影內的音樂以多樣性曲風重現，不過可能龍爭虎鬥首音樂太深入民心，淨係佢都有幾個版本。不過連久違了的LUNA SEA 結他手SUGIZO都參與埋一份確係令成隻碟錦上添花！隨碟更附送死亡遊戲的長袖黑邊大碼黃色Tee, 最正係有埋渣巴個大腳印...
講咁耐,咁即係幾錢呀？
見本盤，多謝HK48蚊！

開棺大典

上星期在信和的見本盤店中左巨奬(對我而言)！竟然發現UNIVERSAL MONSTER 系列日本棺材DVD套裝，內有："黑湖妖"，"科學怪人與新娘"，"透明人魔"及"吸血彊屍德古拉斯"4套5/60's年代的經典科幻電影。這套裝應是有兩set共八隻的，各地亦是以棺材形式發售，不過日本版副棺就係做得靚D! 約15,000日圓只收HK$68仲吾速磅真係對吾住自己！最大驚喜的是2區日本碟竟有埋中文字幕！680都會即買何況68!!而內裡的"黑湖妖"更是我的至愛，想當年是荷里活第一部黑白立體電影，十分震撼！那年頭電視播放時要用土砲立體眼鏡(紅藍玻璃紙製那種)觀看，一家人關掉燈光輪流用眼鏡欣賞，若眼鏡未輪到自己而錯過一些攻擊鏡頭亦只有在旁咬牙切齒！
早兩年在Amzon.com訂購了"黑湖妖"的Collection套裝，包括續集的"黑湖妖復仇記"連郵費要HK$200多，現在居然以超低價入手四齣巨片，真係開心到震，希望可以有機會搜購埋另一set啦！
兩款DVD對比

借屍橫行

終於忙完兩星期死忙週加接近五小時的annual presentation, 做到成條行屍咁，咁啱係網上睇到湘西趕屍大踢爆，道出中式彊屍成因及出處，有趣之餘徒添幾分淒酸...同大家分享下。

爸嘞八把霸...

好日吾去老麥，今朝心血來潮想食個扭扭粉早餐拎走，原來好超值好多野送！
贈品一：扭扭粉膠碗+透明蓋；
贈品二：扭扭粉上湯是分開上的，所以又有一個大發泡膠杯+膠蓋，真體貼；
贈品三：套餐咖啡杯+膠蓋
贈品四：盛載咖啡及湯杯的袋；
贈品五：原來袋入面已放好兩包糖同攪拌捧；
贈品六：薯餅袋吾少得；
贈品七：餐具你吾係吾比呀？
贈品八：咁多野，梗要醒個大膠袋我裝住啦！
贈品九：原來大膠袋入面仲有兩包糖同奶喎！
贈品十：幾張紙巾濕濕碎啦；
贈品十一：順手擸番份頭條日報先！

真係好，我食飽時地球先生仲有排食，I'm loving it!!!

覆舟

來自念青唐古拉山5100m冰川﹣﹣"西藏5100礦泉水"。
中國人強行侵佔藏族神聖領域，覬覦的就是深不可見底，多得不能枚舉的種種天然資源。早年因交通運輸的不便及高昂的成本問題，西藏還可偏安一隅，一息尚存。但隨著青藏鐵路的開通，所有珍貴資源必以災難式掠奪掏空。無慾無求的藏民堅忍苦守這片地球僅餘的樂土，與週遭共榮共生數千年，但卻隨著貪得無厭的漢人到來，相信不足一百年便可令藏區物種資源消亡；就如濫挖冬蟲夏草對生態的奪命連鎖已不可挽回。作為中國境內大多數河流發源地的青藏高原，正面臨無可避免的蹂躪。黃河，長江等主要河流的下中上游已被污染殆盡時，西域源頭面對人類頻繁的活動，加上短視的西水東調政策，亦已不能獨善其身，更遑論迫在眉睫的溫室效應了...

收...聲

http://www.jpl.nasa.gov/multimedia/sounds2/index-nasa.html

來自太空的聲音；NASA在網上發放各探測器在宇宙的錄音，在真空環境下如何傳聲是否有必要考究吾關我事，當中土星南極同閃電比較有趣，而土衛泰坦的音頻就如雲海大師所說的類似電子音樂聲亦很有型。木星月亮如雜音般的訊號，就像隨意在公園或街邊收錄似的...此刻聆聽天外梵音的同時，有否聽得到我們身處地球的呼喚，久延的殘喘以及微薄虛弱的心跳聲？

嚇死人咩！

天津黑死金屬樂團大召集，全隊徽海報入面，我諗最勁果個名係..."祭月姦屍"

進步

#超市#
嘟...
嘟...
嘟...
........
.......
嘟吾到，抺抺抺，捽捽捽...都係嘟吾到...
輸入...3...4....2...5...7...9...0...0...3...4...
嘟...
嘟...
我：...呢隻好似十蚊三件...
收銀員：係咩？等陣...
釘！釘！(㩒鐘)
收銀員：阿陳仔，幫我睇下呢樣係咪十蚊三件！
.......
......
阿陳仔：係呀，芬姐！
芬姐：吾好意思，未入電腦...
嘟...
嘟...
嘟...
嘟...
芬姐：多謝六十四個二呀！
芬姐：先生要吾要試下呢隻薯片，新返個喎！
先生：吾試。
芬姐：先生加五蚊可以換呢隻洗頭水試用裝喎。
先生：吾要。
芬姐：簽咭有95折，先生簽咭定比現金呀？
先生：現金。
芬姐：係咪用八達通呀？
先生：...都可以。
芬姐：有無"草"積分呀？
先生：吾使。
芬姐：有無"草"開大頭狗印花？
先生：無。
芬姐：先生爭幾蚊就可以多一個印花，要吾要買多少少？
先生：吾使。
芬姐：有無本超市積分咭或附屬咭？
先生：都無。
芬姐：先生今日係無膠袋日，如果要膠袋介吾介意捐兩亳？
先生：吾使袋。
芬姐：多謝支持環保！
先生：啊！
芬姐：先生找番錢, 多謝！


#街市#
六十四個二！
嗱！
多謝！

Gibson Robot Guitar

話係話Robot Guitar, 不過吾係變形金剛，而係一支內置Tuner既結他，學老死Stone話齌，都吾算係咩野高科技，只不過有無人諗到又要將佢實行je...再加上一條懶有型好似好Hi-tech既宣傳片，人稱結他教父既霆鋒吾買，自稱科技男既伊健都整番支看門口啦！







........其實我都想要，幾時出bass呀？

如果睇吾到條咁勁既片,可直接到以下連結：
http://www.youtube.com/watch?v=WetVXbYRfWk

帕妃到著

New Album:HoneyCreeper
吾......鍾意還鍾意，都係等三分一價錢既"見本盤"先買啦...

死忠！

唐朝鐵定要於年尾發片了(信住先)！由第一張"夢迴唐朝"到第二張"演義"足足相隔十年，而一直只聞樓梯响的第三張新碟至今已等了七年...Bassist張炬的逝去故然是一大打擊，Guitarist劉義君的中途單飛亦一時窒礙了團隊，幸得新Bassist顧忠的相助及始創人Guitarist郭怡廣抜刀，"演義"才得以橫空出世，但隨著郭怡廣再組樂隊"春秋"，又令團隊陷入膠著，此時劉義君的回歸，令唐朝得以重回到正軌，而另一Guitarist陳磊的加盟，與雷打不動的Vocal丁武，Drummer趙年。塑做地球其中之一隊最具霸氣樂隊：全新唐朝......咪再放我飛機嘞!

動身...?

向前難伸，移後被困；
靠左抽筋，郁右見暈；
擰側拗親，屈身撞棍；
高攀不穏，紓尊難堪；
食飽無份，餓我吾親；
走馬看燈，富貴浮雲；
進退失據，孑然一身。

不勝寒

係無神論主義既共產越南居然矗立著一個與巴西稱兄道弟既耶穌像，除左揾遊客錢之外，我諗實際意義不大。點解吾係共產最愛既一座崇拜偉大領袖思想胡志明像？據我詮釋應該係怕D遊客捐上去頂樓(頭部)時，發現胡生個腦係空既，草都無條掛...
阿耶穌都求神拜佛望越南繼續改革開放，响一個極權國家被朝拜，一個吾覺意難免會成為下一個巴米揚...

肥差一著

狗仔隊拍得咩奴Dee當眾晒腩，好明顯人氣急跌要谷肥自己以博得各路纖體公司修身合約乙份；不過吾覺意影到佢食緊煙仲登埋出lai，有損形象教壞細路就吾好啦，趕客咩...

份內事

香港越來越少正統糖水舖，多數已被Ｄ左溝右溝撈乜撈物睇見都覺得會肚痛既新派甜品舖侵食。唯有係D舊區先可以品嘗到久違了的傳統味覺，除了出晒名既西營盤源記，係廟街既又記都係一間碩果僅存的老舖。吾係度度都食到既馬碲沙呢度有得食之餘仲整得好好味，馬碲磨得很幼細碗水又吾會杰撻撻，價錢亦比較合理，食完又夠正氣。同依家幾十蚊食到一肚冰再屙花灑果D垃圾比，我不如整杯崩大碗啦！

啪獲甘

吾知點解，十個女人九個都鍾意㩒要來包野既"泡泡紙"。無聊時成卷新既都可以同你啪晒佢，可況係平時用完吾要果D。情形就如貓愛捐紙皮箱一樣，係吾使解釋既。所以乜都搞一餐既日本人就推出左“無限復活泡泡紙“！仲要係匙扣，等你去到邊都可以啪一餐，過足手癮！而隨機仲會有車聲同女人聲出現。女人聲？？.....我想㩒呀！！！

PS.成800幾日幣...貴左D喎。

企定呀喂！

Konica AF2 第一代對焦系統係物體稍為郁動下都好難中焦，令廟街麵飽舖隻貓好似內子咁好難觸摸...

變天

駕著車在加州公路黃昏看日落，泛紅的天空映照著晚霞，透過天窗迎面微風吹送......
浪漫嗎？對，未世來臨總帶點點憂怨淒滄，感性點，總能令心裡不致太難受。
南加州災難式山火，身處現場不算太接近災區的好友Clara，日光日白的無添加照片，烘烘烈焰卻教人心寒。


相片盗自http://claracheang.blogspot.com/

加拿大鑊遊-4

來到大鑊遊最後一站：滿地可唐人街。其實一個發育健全既唐人，去到第二個國家係無乜理由要去參觀D唔湯唔水既華人集散地，幸好今趟舅父醒水，帶我地行左去滿地可舊碼頭區，這個將以前碼頭一帶貨倉沿岸用地加以保留活化發展出來的休閒文娛區，正正就是我們特衰政府要學習的楷模。唔好下下用個考立名目既殼去包裝地產項目先得架！你唔係我選出來，吹你班契弟唔賬我都要鬧爆呀！

加拿大鑊遊-3

經三寶山一役，對行程沒有太大期望的我們，更不敢對下一站"小瑞士"抱有任何奢望。車程個多小時除了領隊沿途叫囂外，今次仲慌死我地未收成正果，竟在車上播放"寧波車"VCD給大家欣賞...登時全車充滿著煩人的梵音，頭頂就像套上緊箍咒一樣，只有跳車才能得到解脫。
好不容易涯到目的地，這個所謂的"小瑞士"正正就是我們特區政府最愛的把戲......一個毫無本地文化硬生生借屍還魂搬字過紙的主題公園。騙遊客的舖頭，千編一律的名店，無聊的親子活動，貴到離奇的食肆，讓一車車絡繹不絕的遊客一頭頭栽進這個搶錢陷阱。而我們唯有找個地方坐下，喝杯咖啡食件餅，草草消磨在這個加拿大"凌霄閣"的兩粒鐘。