最好當然係百佳

一塊薄薄的膠紙沒有令細路們有感不適，但卻足以令小商戶們透不過氣。膠紙再薄不夠衙門刻薄，小店感情深厚不及大集團實力雄厚，要你三更死休想待到五更天。財團乜都賣得小店吓吓比人屈，今日一張膠紙聽日要交出一疊銀紙，日日驚有損失不如索性執笠...咁搞落去除咗官迫民反仲可以做得啲乜？

Tucker & Dale VS Evil

生得樣衰唔係罪，之不過遇上一班自以為是嘅大學生就會無辜受罪... 兩個不修篇幅但心地善良嘅中年漢Tucker & Dale帶整架生，去到偏遠荒郊一心為新置的湖邊小屋來個大翻身，路上卻撞正三男三女大學生驅車露營去。大學生們已先入為主認定兩人面目猙獰絕非善類嚇得無鞋挽屐走。偏偏兩條茂利晚上釣魚時陰差陽錯救起溺水大學生美媚後被人以為玩拐帶，同伙們便實行起冒失的拯救行動卻導致傷亡慘重。一邊廂以為撞著變態殺手會來個深山大屠殺，另一邊Tucker & Dale又以為遇上自殺集團衝著他們而來一鑊熟...誤會越鬧越大人越死越多，究竟最後點收科?

約定難成

又到咗無端端被人約定嘅6-11區選日，以前合埋眼唔使諗就會投咗比白鴿黨，但係自從白鴿投共後已是一隻北行鳥；之後見社民連咁有型就梗係要撐吓佢哋，但係內部爭鬥又成了扶不起的痾豆；禮儀廉啲蛇宴荔枝團派雞送米全部都無我份呢一票就可以慳番！只維護商界自由嘅豉油黨因為敝區窮人多所以好少响本區搞事，叫佢選都費事。至於新加入戰圍嘅人民力量抗爭味濃草根十足又幾合本人河車...之但係泛民越拆越細越選越散最後都係益晒禮儀廉班老鼠。以前落票站滿腔熱血一往直前如今就舉棋不定扭扭擰擰...白票一張係咪就最合乎理想？真係唔忍心見到選舉就係咁樣！