狂燥麻甩show

以獨門畫功加獨特思維而獨步畫壇的奇葩楊學德，於灣仔秀華坊舉辦了一個昭示其一生胡作非為的狂草"草稿"展，佢嘅草稿同完成品其實都只係展示媒界的分別，看似隨意隨心卻又不失其一貫市井麻甩抵死核突卻又言之又物，實乃香江藝術界的一塊瑰寶，明知自己風格騎呢擺明玩嘢都堅持如一誓不妥協，終守得雲開換來出頭天。

英明

天文台台長林超英因為上一劑鸚鵡襲港將清晨變凌晨後死不認錯，仲煞有介事咁研究埋《中文大辭典》、《辭源》、《漢語大詞典》、《重編國語辭典修訂本》後，聲大夾惡話自己引證咗清晨就係等於凌晨！直情就係入夜後油尖旺我話事咁款！而且好體貼咁驚你哋班契弟仲未識分，到時又再誤會佢老人家多一次就隨時烏紗不保，索性將清晨剔出天文台工作詞彙之外......此後午夜到天光前都一律叫凌晨！！
啊......咁即係大家避免日後生活上嘅不便，可自行制訂：鯁骨以後吾食魚，無厠紙吾使再抿屎，搭吾到車索性吾返工，吾識做嘢嘅狗官直頭吾使做...等利己利人措施，以免出現無謂兼不必要嘅爭拗，成個社會咪和諧晒囉。


呀哥仔你咁反智，仲要我哋同你癲，吾怪得打親風都咁多人寧願信D來歴不明嘅地下消息啦。

瘋不息

比人插得勁，政府即刻仔細檢驗在古樹名冊裡的四棵刺梧桐樹，發現其中一棵已基本壞死，樹葉淍零無得救，要即鋸！其餘三棵則有蜂患，要即時用藥控制病情...
入得古樹名冊都闊佬懶理，無人過問生與死；其他蝦兵蟹將，命運更是不能想像..睇怕要將有關庸員遷移至危樹下辦公，先會令佢哋醒覺除咗平日飯來要張口之餘，原來返工係要做嘢嘅。

樹欲靜

古樹又再倒下，今次要找上人類陪葬，用兩條生命控訴著特衰政府長久以來的愚昧反智護樹政策。大樹閒著沒事時，美其名是政府為綠化環境的強大標讖，到發展商要勾地起樓，可憐的樹木們便要讓路予比她們更高更好"遮蔭"的摩天樓，往昔街坊樹下乘涼閒話家常轉戰呆坐一幢幢倒模冷氣商場。大樹平時最受政府照顧的是灌石屎封樹根，令行人路看起來更寬闊平整；公園的大樹則慣常以圓形石屎躉圍堵，如一盤盤巨形盤栽，公公整整易於打理，但卻是阻礙吸收養份而令根部壞死的元凶。加上為求方便的一刀切截肢式狂徒修樹法，令參天巨蔭慘成牙籤一根...
物必先腐而後蟲生，特衰政府這棵生蟲大樹，敗壞的程度已足以塌倒。

相逢恨晚

京奧最後一日最強戲碼夢8對西班牙遇上京奧最強評述員除嘉樂搭上京奧最爆主持袁彩雲，半場休息......

除：呀...你點睇呢？
袁：好好呀，打得好好呀，因為兩隊都打得好好呀...
除：.......................

無懼叻哥克勤力申婉儀思崎同成班過氣港姐；
只怕德昭曉峰麗珊紀筠中間呢條袁彩雲大茄！

下屆你吾做我會好失望。

暴風漢子

颱風逼近，照例預早一日又有班貨櫃碼頭機場人員政府高層天文台家屬第一時間撲出嚟吾覺意漏出內部絕密消息！詳細分析表列說明言之鑿鑿聽日好大鑊！早已習慣狼來了邊有咁大隻蛤乸隨街跳，加上天文台例牌潑下市民冷水，明知打到應一應都叫大家咪咁老定...點知呢劑吾知係三人成虎定上得山多終遇虎！擒晚仲話未有耐要掛，你班契弟咪使旨意放假；點知今朝八點就整個八號你歎吓！可憐一眾勤勤勉勉早出晚歸營營役役打工仔，天未光未上粧瓣起半邊眼皮出門舟車勞頓慘過大西北開荒，之但係行到半路見D街坊個個望住你陰陰咀笑就直覺有D吾妥，晨運阿伯見你行過就借D"椅"開大個收音機， 見你睡眼惺忪就知你未update。風暴消息傳到耳邊先知呢鑊比天文台跣，樣衰衰頭dup dup 即時掉頭，返到樓下看更仲耍手擰頭，好明顯想話你自己戇居與人無尤...吹佢吾脹唯有番屋企早D唞。



天文台愛呃鬼，奈何天意不可違，下次都係要信吓呢班忽然預警權威。
pAndAmAniA記者今晨風暴現場直擊報道

愛迪達廣告

堅持到最後一刻，我們的劉翔倒下了！用四年去預備，用一秒來放棄。痛苦的表情遇著戲劇性的偷步只為向同胞們好好交待，撐開全國人民的眼睛，捂著十三億人的唇舌，彷彿用淚水與血汗訴說著：我總算盡過力了，大家就高抬貴手吧！
猶幸的是大家沒有去怪責他，反而是要以行動來顯露出人民團結的亮度，向世界高呼中國田徑不可侮！一個劉翔倒下來，尚有千千萬萬個中國人倍他一起走！
...一瞬間，鳥巢體育館泰半直覺無癮兼吶悶的觀眾一哄而散，令會場冷清得猶如校運會，同胞的假熱情真熱血，使我們看得到中國發展田徑運動的曙光！

溫馨提示：往後的田徑項目門票將大量拋售，近乎唾手可得，之前一票難求，家陣半價就有，快D出張機票睇下蘿白絲獨步天下啦！

我與痛的邊緣

快樂是短暫，痛苦卻是漫長的；要過渡痛苦，只有學會習慣及適應。習慣了痛苦並不代表它不存在，只是嘗試將它遺忘；就如夜半的冷氣機滴水聲，吹樓上班仆街吾脹就唯有催眠自己，當作是簷逢雨滴，改不了天要下雨就自然要與它好好相處。話須如此但世事就如生痱滋，當你以為習慣與它共存時，往往就會喺最無防備時向它大力一咬，痛苦不但再次被勾起，仲會比以前難頂十倍生不如死。要痱滋趕快痊癒，就要忍下口咪食得咁熱氣；要痛苦完結，就要吞聲忍氣，平靜的心境讓你看清形勢看清每一步自能走出困境，遠離苦痛...但生痱滋就正正是人們最火燥的時候，人越燥亂便越易迷失，迷失在痛苦中，痛苦便加倍漫長...要拯救自己，就要咪咁熱氣。



唉......粒痱滋真係好痛！

沖繩的幾個新朋友

週街都係嘅苦瓜B



被苦瓜B搶盡風頭而抦埋一閣的菠蘿B



呢條吾知咩B, 被人吊高嚟賣



國際通派紙巾的機械人，因紙巾成日jam住而要多派人員處理，都係綽頭嘢多過幫到手



肩負鎮守沖繩重任的驅邪獅子


擒高擒底好腰力，一隻青BB大蜥蜴

中國加油！！機油吾該！！

有福娃鎖核金剛鎮住個場，乜東突彊獨回遊哈馬斯塔利班毛派...都吾使驚！(啊！吾好意思，毛派原來係自己人，歡迎歡迎！)
http://www.netlaputa.ne.jp/~m-akao/GALLERY/gal1/gal11/OLYMPIC/olimpic.html

牛頭落地

牛頭角下村藥房貓，近月徒添幾分烯虛與哀愁。鐵定於年底搬遷清拆的牛下，令港人又再增一份回憶，少一份真蹟；多一排屏風，少一片天空。政府與發展商的滅絕窮人計劃，又再成功踏出一大步！

萬般帶不走，只恨近黃昏

愛~火花

離開那霸到第二住宿點：恩納村羽之里。如果那霸係梅窩，恩納村就好似貝澳長沙；一條馬路一邊係海灘一邊係村落小屋。入夜後都係無街行無野做，最多都係行下便利店，而便利店亦好醒水知你班茂利無聊，梗係會將煙花套裝放係門口當眼位...人哋咁有心，呢劑真係盛情難卻，於是係恩納的兩晚都上演了小型花火會。

和仔搭吾切船返屋企

我諗喺全世界咁多個島嶼，城市之中，香港人係最鐘意打風嘅一群，當其他人民對颱風的到來惶惶不能度日，求神拜佛颱風大人有咁遠死咁遠嘅時候，香港人就望天打掛求阿颱風伯伯得閒就嚟坐下啦，過埋夜第日都吾使咁早走㗎，仲要記住下次一定要嚟吹水飲茶...
香港的亞熱帶氣候，常有颱風路過是等閒事，不論由上路台灣吹來的或是由下路菲律賓迫近的。所以發一號風球已是一件令人麻木的事情，就好似去街市買餸，檔主為求賺你果一個幾毫而嗌聲閣下靚仔靚女一樣，你吾係當真呀？！
到一號風掛得咁上下都未落兼轉為三號時，悲觀感超強，絕望慣的港人，個個口都會話"吾會嘅", "就算係都今晚掛聽朝落啦"之類嘅晦氣話； 但個心就不知幾想打到嚟，加上呢個時候就梗有D同事D親戚朋友喺天文台度做云云...消息滿天飛，最好今晚book定唱K...
等到八號掛得成，夜掛又驚早落，早掛又驚起身無著落，早落晏返又驚孭鑊，掛左成日第二朝又要返工又好失落...怪佢吾掛到上十號宵夜直落。
其實港人望打風心態，就好似喺場激烈嘅球賽將雙方拼搶時理該吹罰的狂野動作轉化為合法衝撞一樣，令賽事變得合理流暢又緊張。打得成風吾覺意有日老奉假期，亦都係平日緊迫工作中無形的合法收獲。

吃魚的水魚

國際通，平和通同牧志市場係那霸市旅遊三寶，前者係手信步行街，而平和通就係當地市民購物的市集，最後的牧志市場就係街市連熟食中心。三處基本上是相連的，其實賣的貨品也不相伯仲，不消半天便可逛完，正好是午飯時間兼身處有最新鮮貨品供應嘅街市，梗係吾好錯過响度擦番餐啦喂！


牧志市場三樓是熟食中心，精通多國語言的食店令人有隨時會被宰的感覺...




眾食客已就坐，隱覺頸部滲出血水...






係地下街市揀啱，就可以上去開餐，當然少不了要討價還價，別忘了要外加烹調費啊




即買即劏即食，當然吾止咁少，淨係睇下主菜算啦...

雞泡魚的出路

冰鮮保著全屍，待老饕蒞臨選購


被人攞去煲湯前慘要剝皮示眾



慘被掏空肉身，泵漲吊高充當吉祥物


比較好彩的是在水族館渡過餘生，卻失去了自由