Day2:人哋真係食鹽多過你食米

2-10-08 波蘭克拉科夫
終於抵達克拉科夫市內，第一件事當然要找旅館放下一身大包細包的行裝，按著最新版自助遊天書所介紹的地方查詢，價錢全是翻了一翻的數目，與心中的水位有一大段距離，為免同行女士左騰右騰，便派出僅餘的兩位尖兵輕騎偵察大街小巷，終找到一處只需156波幣四人的hostel, 兩人房加一床位，公共衛浴，四樓無電梯，免費睇人上網，非常滿意，二話不說租住下來，整頓好後便到附近市場閒逛吃飯，下午去找前往鹽礦的小巴，3:00pm到達這個有過千年歷史的世界遺產：威利士加鹽礦。
Wieliczka Salt Mine威利士加鹽礦；進入如超級迷宮的鹽礦，必要購票由導遊帶領(洞內拍照要額外附費)，一開始便要步落五十多層的地底，才能連接四通八達的地道，參觀千多年來礦工們的生活情況，工作環境和精緻的雕刻以至宏偉的地下宮殿教堂。49波幣足兩小時行到腳仔軟，對兩日兩夜無覺好瞓的我們，都算係一個考驗。
市集內酸到爆嘅提子，吾怪得請我食



彷似無止盡的樓梯，是通往鹽礦的入口




礦工們的作品，少說也有幾百年















回到舊城區，已經入夜

(番外編): 捷克拖拉機

到捷克的其中一個主因，就是尋找她的鐵皮玩具，很多人只認識中國或日本的鐵皮，但捷克的鐵皮早已是享譽玩具界，有很多已達收藏級數，若概括而論中國鐵皮是廉價及多樣化見稱，日本則以創意與造工馳名，而捷克便是以精巧及機械結構稱著了。而今次目標是以實物縮放的上鍊拖拉機頭及其一系列農務用的拖架功具
Kovap廠出產的1:25拖拉機，真車型號是FENDT F20，盒內還附有真車圖片及文字解說



3速波箱加上後波均可運作，"車太"盤當然可調校前輪方向，"車太"盤左方是開關制


車頭鬼面罩也很細緻，輪胎是用橡膠製造






可自行選購多達十數款的作業用拖架






少部份陳列於櫥窗的其他型號

Day1: 輪流轉，幾多重轉

1-10-08 HK-英國希斯路-英國盧頓機場-波蘭Katowice機場-Krakow克拉科夫
由於沒有直航，被迫以較轉折的路徑從英國希斯路轉巴士前赴英國盧頓機場轉乘廉價的WiZZ budget airline到波蘭Katowice機場，抵達時已是夜深，到市區的巴士班次非常稀少，大伙便決定在機場過一晚，既可省回旅館錢，又免卻舟車勞動...但如意算盤卻沒有打響，因為Katowice機場只是一個鎮仔場，可供休息的地方非常有限，基本上是坐到天光，間中半躺下來很快又會給冰冷的鐵櫈凍醒，比舟車勞動還辛勞！迷迷糊糊到4/5點便陸續梳洗及找換一些波蘭幣喝杯咖啡，6:30am便乘巴士出市區再前往克拉科夫。
於盧頓機場瑪莎購買的一份三文治及飲料，已是全人類的晚餐 (英國物價太貴，真係吾捨得使)



淡如水的咖啡，又貴又醒不了神...找換一些波幣於路上使用



7:15am出到市區了



但係仲要轉個小巴到Krakow克拉科夫找旅館

燃燒僅餘的青春

十多年前應該做的事：浪遊東歐，卻於吾係好壯嘅壯年成行，瞓機場追火車，跨境臥鋪，晚歸早起，差不多每日的大遷徙，半夜找廉價住宿，一餐當兩餐......老骨頭連戰十七天，幸得各方好友傾力相助終於完成！感激萬分，遊記充完電後送上！

東型遊

悲壯的克拉科夫集中營、流淌於布達佩斯的多瑙河、古典音樂之都維也納、滿溢著波希米亞文化之風的布拉格......喺10月1-17，都會相繼被5條港燦踐踏糅掄，肆意催殘，發揮人見人怕目中無人的中港台韓遊客精神，請有關單位嚴肅處理，高度戒備！


東歐~我來也！

白話

係佐敦獨沽一味厚身蛋治就令到街坊排隊排到地暗天昏嘅澳洲牛奶公司......隔離書局隻白貓，成日抱怨話比排隊等得無聊嘅市民滾攪，真係多得你哋班友吾少無覺好"目訓"，如果吾係書局D書劑到密質質無訂企，我使大熱天時係門口招呼你？！

Welcome back!!

無見大家咁耐，原來你哋一直都無離棄過我哋，以為京奧盛世會嚇得大家去如黃鶴，
原來你哋都會鳥倦知還...返嚟之後仲長大咗，成熟吾少㖭！
有毒食品比以前更歹毒；
礦井意外比往年更凶險；
貪官污吏比當日更狼死；
無牌場所意外比過去更悲壯；
真相實話比昨天更慎密；
天更濛，心更痛，窮更窮，
新中國依然沒變強，只有不斷褪色。

爽！Wide Wide

要將旅程中的浩瀚景緻盡收底片及回憶中，點少得一支優質的廣角鏡頭；雖然已擁有25mm, 但係用得RF機就吾怕再去盡D! 最後時刻入手voigtlander Super wide 15mm f4.5，家下就算幾大間嘅教堂，幾壯觀嘅日落，幾多人嘅市集，幾宏偉嘅建築...都走吾甩啦！
裝配voigtlander Super wide 15mm f4.5及專用viewfinder的愛機Hexar RF



三兄弟：voigtlande15&25mm, Konica 50 f2




voigtlander Super wide 15mm f4.5 靚仔樣

衝呀衝，快搶攻！

球場上的翼鋒，或叫左右翼，用處是吹響打突擊的號角，多以插前拉開中路兩側出波，或直達底線放波到龍門口製造機會，特點均是以快稱著。經典球星如奧華馬斯，普波斯基，皮利斯同簡察斯基等，都係視對方守將如無物，出靚波如探囊中物之輩。
在香港要一睹世界級翼鋒，只有在電視機前或少數來港獻技的球隊中可看到。但要欣賞地下級左右翼，則只需在煩忙時間的港鐵站便可與他們同場較量...從來不在黃線內排好隊的左右翼，當列車除除駛進站內時，他們總會於多個不可思義的角度鑽出，前插到人龍的左右大前方直達底綫，簡直視長長的蛇餅如虛無，車未停定閘門未開已搶上最佳位置。而其它原本循規蹈矩排好晒隊的中後衛亦按奈不住紛擁上前，令原先實食無黏牙的前鋒球員壓力大增，唯有瓣起雙鉗以超技術低禦兩側突如其來的攻擊。原先正常排隊的1字形陣勢轉變成利於攻門的銳箭形；由好整以暇等待車門開啟的乘客搞到人人扎行晒馬束勢待發。奈何事出突然有心裝無心，大前方僅餘的空隙(即係前排乘客與月台閘門的位置)已被翼鋒們填滿，先機盡失，當車門打開時只能眼巴巴睇住兩側凌厲進攻，以狂風掃落葉之勢，水銀瀉滿地之態進佔每個車廂內密麻麻的空間，令原先可鬆容不迫的中前場幾度落空，上車無期...只能眼睜睜看著列車絕塵而去後，再築起血肉長城重整旗鼓，循環不息的上演著一幕幕地下聯賽，紙板球證月台助理們繼續機械式的呼籲：請大家排隊上車！

瀨低嘢

怎樣做人才算是無憾？週遊過最想去的地方，吃過最上乘的佳餚，泡過最漂亮的妞兒，抑或做過何等驚天地的快事？不如意不得意不愜意不稱心之事不是憾，對比平淡一生，雖不致精彩，但亦不能算是憾。憾是負數，什麼也沒做只是零，那來憾；是庸碌還是平淡是福？憾，憾事者，做錯事做壞事做了不應該做的事才成憾，做不到的事不算憾，只是恨，不屬於閣下的無謂恨，不義之財不要恨，不著邊際的夢恨都恨吾嚟，恨就恨自己爛鐵不成鋼。

死後遺憾又如何，就如生時夢遺一樣，有多就別勉強留下來。

消脂豬油

酷熱天氣警告下的中午，到了深水埗的鐵皮檔長發麵家搵食，平時食開都係馳名魚旦牛腩，今次就試一下更出名的古法秘制豉油皇撈麵，17個大洋一執仔麵相對19蚊有餸麵已算很貴，但係好味又真係無乜計，濃香豉油皇配上必殺豬油，不消一分鐘已將其灌進胃中...真係咁好味？喂！你無睇清楚咩？係豬油喎，家陣追捧著健康廋身低脂排毒高纖少油清淡練精養生滋陰補腎嘅年代，除咗食神韜哥都無乜邊個敢大大聲話擺明要落豬油。而有豬油嘅撈麵，又點會吾香口先？而香口咗嘅豬油加上甜甜嘅豉油皇，又點會吾好食先？而喺個焗爐入面食到汗流浹背底褲都濕晒嘅我哋，區區嗰兩羹豬油，又肥得去邊先？

有奶不是良

一切為了孩子，為了一切孩子，為了孩子一切的祖國，繼大頭奶粉食到蘇蝦混混"惡惡"無乜知覺後，又整劑結石奶粉搞到阿仔嘰嘰咕咕排尿無符。上次就話冒牌劣質無良兼割價平讓，今次正牌大廠優質管理實力雄厚都食到你嘔。果D啱啱嚟到人世嘅蘇蝦仲未領會點樣富貴由天，就已經體驗到生死有命呢一刧。成日話再窮不能窮教育，再苦不能苦孩子；喺未搞得掂食物安危底下，一係再生不能生細路，一係再餵不能餵奶粉...咁囉。

蛇有蛇路

那怕空口講白話，睜開眼講大話，出咗事就講廢話，被人篤爆就講反話，有訴求就應你乜話？擦鞋就講盡好話，普選就叫吾係呀話？就係從來吾講真話，打死都吾講人話嘅民賤聯，全靠共產黨最善長嘅動員人民力量，以一份份薄禮，一羹羹蛇宴，一個個荔枝團...載住一車車阿婆阿公換嚟一張張鐵票。無厘建樹兼專搞破壞都隱袋過幾十萬票源，教曉了下一代凡事不用勞心勞力，專走精面的個性，有錢自然有人幫閣下推磨。可憐老人家新移民慘被擺上枱出賣做馬騮戲。如果讀過下書用過下腦憑過下良心嘅閣下話都會投民賤聯一票，我諗要重新認識一吓大家...

需然政客無個好人，都吾好揀D咁過份...
#長毛手持的食蛇人頭像送比民賤聯，真係應棍！

狂燥麻甩show

以獨門畫功加獨特思維而獨步畫壇的奇葩楊學德，於灣仔秀華坊舉辦了一個昭示其一生胡作非為的狂草"草稿"展，佢嘅草稿同完成品其實都只係展示媒界的分別，看似隨意隨心卻又不失其一貫市井麻甩抵死核突卻又言之又物，實乃香江藝術界的一塊瑰寶，明知自己風格騎呢擺明玩嘢都堅持如一誓不妥協，終守得雲開換來出頭天。

英明

天文台台長林超英因為上一劑鸚鵡襲港將清晨變凌晨後死不認錯，仲煞有介事咁研究埋《中文大辭典》、《辭源》、《漢語大詞典》、《重編國語辭典修訂本》後，聲大夾惡話自己引證咗清晨就係等於凌晨！直情就係入夜後油尖旺我話事咁款！而且好體貼咁驚你哋班契弟仲未識分，到時又再誤會佢老人家多一次就隨時烏紗不保，索性將清晨剔出天文台工作詞彙之外......此後午夜到天光前都一律叫凌晨！！
啊......咁即係大家避免日後生活上嘅不便，可自行制訂：鯁骨以後吾食魚，無厠紙吾使再抿屎，搭吾到車索性吾返工，吾識做嘢嘅狗官直頭吾使做...等利己利人措施，以免出現無謂兼不必要嘅爭拗，成個社會咪和諧晒囉。


呀哥仔你咁反智，仲要我哋同你癲，吾怪得打親風都咁多人寧願信D來歴不明嘅地下消息啦。

瘋不息

比人插得勁，政府即刻仔細檢驗在古樹名冊裡的四棵刺梧桐樹，發現其中一棵已基本壞死，樹葉淍零無得救，要即鋸！其餘三棵則有蜂患，要即時用藥控制病情...
入得古樹名冊都闊佬懶理，無人過問生與死；其他蝦兵蟹將，命運更是不能想像..睇怕要將有關庸員遷移至危樹下辦公，先會令佢哋醒覺除咗平日飯來要張口之餘，原來返工係要做嘢嘅。

樹欲靜

古樹又再倒下，今次要找上人類陪葬，用兩條生命控訴著特衰政府長久以來的愚昧反智護樹政策。大樹閒著沒事時，美其名是政府為綠化環境的強大標讖，到發展商要勾地起樓，可憐的樹木們便要讓路予比她們更高更好"遮蔭"的摩天樓，往昔街坊樹下乘涼閒話家常轉戰呆坐一幢幢倒模冷氣商場。大樹平時最受政府照顧的是灌石屎封樹根，令行人路看起來更寬闊平整；公園的大樹則慣常以圓形石屎躉圍堵，如一盤盤巨形盤栽，公公整整易於打理，但卻是阻礙吸收養份而令根部壞死的元凶。加上為求方便的一刀切截肢式狂徒修樹法，令參天巨蔭慘成牙籤一根...
物必先腐而後蟲生，特衰政府這棵生蟲大樹，敗壞的程度已足以塌倒。

相逢恨晚

京奧最後一日最強戲碼夢8對西班牙遇上京奧最強評述員除嘉樂搭上京奧最爆主持袁彩雲，半場休息......

除：呀...你點睇呢？
袁：好好呀，打得好好呀，因為兩隊都打得好好呀...
除：.......................

無懼叻哥克勤力申婉儀思崎同成班過氣港姐；
只怕德昭曉峰麗珊紀筠中間呢條袁彩雲大茄！

下屆你吾做我會好失望。

暴風漢子

颱風逼近，照例預早一日又有班貨櫃碼頭機場人員政府高層天文台家屬第一時間撲出嚟吾覺意漏出內部絕密消息！詳細分析表列說明言之鑿鑿聽日好大鑊！早已習慣狼來了邊有咁大隻蛤乸隨街跳，加上天文台例牌潑下市民冷水，明知打到應一應都叫大家咪咁老定...點知呢劑吾知係三人成虎定上得山多終遇虎！擒晚仲話未有耐要掛，你班契弟咪使旨意放假；點知今朝八點就整個八號你歎吓！可憐一眾勤勤勉勉早出晚歸營營役役打工仔，天未光未上粧瓣起半邊眼皮出門舟車勞頓慘過大西北開荒，之但係行到半路見D街坊個個望住你陰陰咀笑就直覺有D吾妥，晨運阿伯見你行過就借D"椅"開大個收音機， 見你睡眼惺忪就知你未update。風暴消息傳到耳邊先知呢鑊比天文台跣，樣衰衰頭dup dup 即時掉頭，返到樓下看更仲耍手擰頭，好明顯想話你自己戇居與人無尤...吹佢吾脹唯有番屋企早D唞。



天文台愛呃鬼，奈何天意不可違，下次都係要信吓呢班忽然預警權威。
pAndAmAniA記者今晨風暴現場直擊報道

愛迪達廣告

堅持到最後一刻，我們的劉翔倒下了！用四年去預備，用一秒來放棄。痛苦的表情遇著戲劇性的偷步只為向同胞們好好交待，撐開全國人民的眼睛，捂著十三億人的唇舌，彷彿用淚水與血汗訴說著：我總算盡過力了，大家就高抬貴手吧！
猶幸的是大家沒有去怪責他，反而是要以行動來顯露出人民團結的亮度，向世界高呼中國田徑不可侮！一個劉翔倒下來，尚有千千萬萬個中國人倍他一起走！
...一瞬間，鳥巢體育館泰半直覺無癮兼吶悶的觀眾一哄而散，令會場冷清得猶如校運會，同胞的假熱情真熱血，使我們看得到中國發展田徑運動的曙光！

溫馨提示：往後的田徑項目門票將大量拋售，近乎唾手可得，之前一票難求，家陣半價就有，快D出張機票睇下蘿白絲獨步天下啦！