願

很快又過一年(農曆)，每一年尾的大圍祝願都循例沒有實現...
年年行貨世界和平世界依然未和平：兩韓繼續擦槍搏走火；沒有釣魚的地方仍然有人爭釣魚；有一個大國堀起，有另一個大國比佢嚇死。
民主願望都係令人失望：和平抗爭得到和平奬項卻被暴力否定；和平上訪全力維權卻鬥不過虛弱政權；民主第一人走先第一步如今卻先走一步。
地球先生始終無好番只有被繼續摧殘...山火漏油洪水乾旱地震核擴散，人有人禍患天有天災難。
樓會高企既得利益者繼續殘民自肥，有錢嘅要發財唔使閣下恭喜，貧賤嘅恭喜都係當你放屁。
現實如此莫怨天意人人都係不外如是，每年願望只求四個字: "身體健康"至係人生一大意義。

Deadgirl

兩條高校生逃學到荒廢了的精神病院胡混，隊吓草飲吓酒四圍騰，突然又會被狗追，荒不擇路下又唔知點解去到一個地下密室，又硬係覺得密室後會有出路，所以就拗開咗度鐵門，呢個時候竟然發現凌亂不堪嘅密室內有張手術床，床上要仲鎖住個赤條條嘅美女，當兩條懵炳以為係死屍一條時，條女原來仲有呼吸...
講番呢兩條九十後，一個係色膽包天滿咀歪理嘅混世死飛仔，一個就係生性怕事但都仲有啲良知嘅宅男。佢哋唔係第一時間報警而係番屋企瞓一晚諗諗先。不過死飛仔當晚就心思思返轉頭試好嘢，仲發現佢係一條不死身女喪屍！
無論係現實世界定虛構情節，之前你有幾巴閉都好，比人鎖住動彈不得嘅時候就只能任人魚肉，可憐美女就係咁比死飛仔淪為洩慾工具，仲要得閒招呼吓啲老死，最後比佢發現大量製造呢類活動吹氣公仔嘅竅門，初號機茅頭仲直指宅男心儀嘅女神...

青春片手法恐怖片格局，由人比喪屍追變成鎖住比人隊。最好比啲地產商睇吓，唔知咩叫物極必反都要記住唔好落難，落水狗就一定打硬！

伸摑師兄

自從輕判打女技術性擊倒公僕後，近排多咗暴民以身試摑，搞到要新任一哥開口求大家手下留情！叫大家體諒一下當差之苦，走在前線唔覺意得失真係好難免，有乜都唔好遷怒佢哋，大家比比面你好我好就一地河蟹，天下太平社會繁榮...
以前細細個就被灌輸警察哥哥係幾咁有威嚴，有乜頭暈身㷫搞你唔掂阿媽就撻警察叔叔個朵嚟嚇吓你，從前的大丈夫到101拘捕令都係講到啲公僕幾咁有型，令賊人聞風贍喪，叫萬眾欽敬仰望...當然無綫果啲淨係識爭女嘅所謂警匪片就一定例外。邊有話好似今時今日咁要低聲下氣勸市民放過佢哋，當初唔識殺一儆百家陣就任人掌摑。我諗要一睹警伯仲有幾心狠手辣，可能都係得番強行將菜園村遷拆，做得呢類大龍鳳就一味喊打喊殺！將平時啲抑鬱同怨念發洩响手無搏雞力嘅老人家窮苦主身上，幾威猛吓㗎都...

無phone起浪

難得食飯齊敘舊；
人人埃瘋揸响手；
神龍見面不見首；
個個都係dup低頭；
面對老友不投機；
只顧陌生人挑機；
講乜都話check吓先；
一部電話變字典；
咁多鴨屎任單撈；
有無一款叫....OH~NO!

鳳凰古城

不想回憶 未敢忘記

折翼鳳凰 8：出門旅行 要帶雙飛人

好辛苦咁捱多一晚超級巨聲後，第二朝早緊係拿拿聲離開，昨晚訂好10am車出張家界，預早出去食個早餐就上車，坐差不多四個多小時至到。都係三點未夠距離今晚十點機時間實在有夠充裕，不過如果唔去張家界景區遊覽，响市內實在沒多大作為，先找間cafe坐坐再算，點知呢一坐就爭啲坐到起唔到身...事關唔知點解忽爾又痾又嘔，彷彿中了脫皮降要將五內反轉大清洗一樣，搞到四肢無力面有菜色。除了不斷行出行入就係踎底起身，雖然話無乜地方好去都未至於要搞到邊度都唔洗去，就係咁一直响咖啡室滾搞咗幾粒鐘待狀況好轉一點才能動身去機場，寧願死响機上都要執意離開這個鬼地方。不過連最後一程的士都要比人昆，明明十蚊路程就架架都要收廿蚊先肯開車，歸心似箭就擺明比你賺錢，點都要順利去到機場無鞋挽屐走，行得出去就唔好再望番轉頭！

折翼鳳凰 7：風光易改 劣性難移

除咗幻彩詠沱江，歌聲遍鳳凰外，原來古城正進行著所謂的"亮化工程"。簡單嚟講即係將已經有好多燈嘅鳳凰再加好多好多燈，務求令古城黑夜如白晝，咁搞法除咗晚上有夠亮麗外，亦令日間瀏覽古城時多了更多斧鑿痕跡。已完成工程嘅哋方就全是燈具滿古樓，霓虹繞城牆，還動工中的就是棚架圍城，加燈的加燈，棄古木換新"力架立立令"木，就是要將好端端的一個秀氣古鎮銳變為俗氣歡樂谷...要賺遊客錢有好多方法，偏偏中國人就係鐘意乜都傭俗化，品味錯配，城市化嘈之巴閉乜都要一步到位，要參觀什麼什麼故居亦要梱綁式收費，話之你唔係個個都想睇。開發無錯統統都是膚淺惹的禍！越行越無癮唯有躲進無人的咖啡室，靜看喧鬧的沱江被同胞們催殘，千里迢迢換嚟三條茂利相視苦笑...

折翼鳳凰 6：萬水千山又老蘭

司機叔叔都熄機咪落車囉...打番個電話又真係有專車嚟接喎，仲快過香港call八折的。其實阿哥仔都係順路番鳳凰，不過最緊要坐得舒服就咩都無所謂。如是者又坐咗一個鐘，沿途少不免介紹你去邊度邊度住，仲安排好人嚟接車...
萬水千山排除萬難破咗魔咒嚟到鳳凰古城，下車一刻心裡終於感覺踏實一點，夜媽媽都無謂四圍騰，就跟嚟接車嘅阿嬸走一趟。阿嬸興高采烈咁帶咗我哋去沱江邊嘅賓館，喂！阿嬋！！你有無聽清楚我哋講乜呀？我係話要住吊腳樓呀，你帶我哋去你間賓館幫你沖水洗毛巾呀...
卒之係連番抗議下帶番我哋去虹橋附近嘅吊腳樓群，心儀嘅考拉小屋未問已經有人走出嚟話無房，就去咗隔離嘅沱江人家。一路行過嚟已經比響遍沱江不絕嘅唱K聲困擾，上到去睇房先知全吊腳樓對岸都係無隔音鬥大聲K場，仿如罝身現場一樣嘅極級CEO分貝，同胞們嘅超級巨聲直插天際彈射腦海盪氣迴腸七日繞樑！加上五光十色迷幻閃爍LED連射燈霓虹，令這個聖誕真有夠普天同慶齊唱詠，萬世歡騰樂昇平！真他媽的感動到不得了，原來萬水千山排除萬難破盡魔咒嚟到嘅鳳凰古城，係同蘭桂銅鑼老尖MK一模咁狗樣，住係地球村真係好難獨善其身啊。

折翼鳳凰 5：總算向目標進發

送住宿一晚原來只係一個晃子，搞搞吓又話假期太多人，都要收番錢不過最多平啲，心力交瘁嘅我哋都無你咁好氣，呢啲推銷手法都係最緊要你落疊，去到咪任你開價囉，住唔住嘅主動權最緊要响自己手，我淨係關心今日破唔破到咒！
搞多一輪又話唔使去西站，呢度三點幾有車去吉首，又話到咗吉首就會有專車載我哋去鳳凰咁話，留個電話到時記住打.....唯有係咁啦！
原來三點幾車都係車咗你去西站坐四點發嗰班車，咩嘢叫折騰...?? 我而家淨係好頭暈...
坐上架驚你無嘢做會悶唔係幾好意思所以成日播住VCD嘅大巴，嗰啲不知名國產電視劇同老番K歌係唔比你靜靜哋休息吓。坐咗三粒鐘又放你落車醫肚，買咗三條塑膠劣質肉腸同皮革粟米再加隻人造雞蛋就係三個人嘅晚餐。
一路坐到8:30pm, 正跟住電視唱no body no body but u 嘅時候就到咗吉首，全車人都唔捨得落車...住

折翼鳳凰 4：未逢苗族降 先中長沙咒

沉醉完浪漫嘅幻想空間，返嚟現實嘅殘酷世界，差不多到長沙嘅時候又真係無乜雪。白色世界不再但寒冷依舊，雖然已加添衣物才出站但寒風比預期更刺骨，唯有將包包內可作禦寒的都傾巢而出先未至變成冰棍一條。長沙南站又係一個又大又荒蕪嘅車站，又係與城區有一段距離。之不過騙徒就同你十分親近，呢頭出閘嗰頭就蜂湧而上將閣下重重包圍，隨口一問到鳳凰要開價2800人仔，又話自己部車幾咁勁係佢先去到，個血盤大口開咁大仲要迫人還價，我一句六舊去唔去即刻媽聲四起...
明知我哋比唔起都要死纏難打不停叫價，混亂中看見有長途汽車站指示牌，呢頭行緊去班友就係咁話無車去唔使睇，但係嗰頭LED顯示有即日去鳳凰大巴，擘大眼講大話得如此耍家真係眼界大開！一路買票仲要一路咒我哋今天去不了，你班仆街我今日唔搭車爬都要爬過去鳳凰！
每人145人仔四時多發車五小時車程仲要乾等四粒鐘，唯有响全站唯一嘅老麥呆坐，起碼都有暖氣呀...
坐坐吓賣票阿姐走過嚟話今日鳳凰班車返唔到嚟，唔通真係中咗今天去不了魔咒！？好彩阿姐未講完，話西站有車去，可以坐車過去兼三點就可以發車，又話為表歉意會贈送當地吊腳樓住宿一晚......你唔送好哋哋，你一話有嘢送我就反而有啲驚啦呢趟......

折翼鳳凰 3：輾過幾多菜園村

比人玩咗一晚，終於有個實用啲嘅建議，就係搭高鐵去長沙再轉車落鳳凰。呢條咁有爭議嘅高鐵終於有機會一試，三百多人仔三個小時唔使就到位，都係無辦法之中較好嘅方法，就咁決定，搞到差唔多十二點先食得飯，食完即刻返去間甩漏酒店瞓，第朝要一早起身...
話咁快就天光出門，因為專搭高鐵嘅廣州南站都有返咁上下距離，邊似得我哋响香港核心地帶可以起埋豪宅咁方便。擒晚有人話酒店call的80蚊人仔就到，平過自己截，不過都係信自己好過，你滷味去到原來都係六十幾，爭啲又瀨嘢！
入到一個比機場更靚更大更新嘅南站，真係嚇親我呢亭鄉下仔。無論去買票定去坐車都要行幾里路先到，呢個面子工程真係洗唔少錢，原來高鐵站要起到咁浮誇先見得吓人，咁香港嗰六百億真係算得乜...上面一個官仔要貪都唔止呢個數啦濕濕碎！
坐高鐵又快又舒適就真係唔係呃人，列車吓吓都去盡三百幾公里使站與站變得更近，不過車上嘅餐卡又真係輸晒，想買杯咖啡歎吓都話壞機，熱食更加諗都唔好諗...只係一個小賣部而已。
隨著列車一路北上，窗外境色亦漸被染白，早前南下冷鋒果然無令大家失望，讓我們過了一陣白色聖誕。

折翼鳳凰 2：出門遇廢人

走咗班機，知道自己無資格坐响度扭計，就唯有週圍問吓有乜計。被人由一個柜位點咗去另一個柜位又點咗去更遠嘅柜位之後...都仲係要再去多兩個柜位，先知其實係...無計。除咗要第二晚全票980外，再留响機場都係獻世，唯有返火車站睇吓有無臥鋪殺上去，搵路離開嘅時候竟然發現有新地鐵線直達，都係區區12蚊人仔，真係吹到啤一聲，只怪事前無做足功課抵Q死！咁反正時間多的是就不如試下呢條新幹線，話快唔快都要45分鐘，不過就有預算又便宜，下次上嚟就不作他選坐硬！
出咗站去買票口問下，都預咗唔係無床位就直情車都無，咁唯有响度過一晚再作打算，呢個時候就梗有人介紹你去某某大酒店，見價錢合理又話可以上網慢慢check機票就跟佢走一趟！當然事實就係住落後搞一大餐都上唔到網，火滾下又走番出去啲星級酒店機票部問問，得知翌日下午有機去貴州銅仁機場就仆鎚，不過碌唔到卡就唯有走番出去襟錢，頻頻撲撲番嚟先話比我哋聽check錯日子......聽日無機。